2025 වසරේ ජාතික වෙසක් උත්සවය ජාතික සමගිය වර්ධනය කරමින් කලණ මිතුරු ඇසුර යන මැයෙන් නුවරඑලිය නගරය කෙන්ද්‍ර කරගනිමින් පවත්වන බව බුද්ධ ශාසන හා සංස්කෘතික කටයුතු අමාත්‍ය හිනිදුම සුනිල් සෙනෙවි මහතා පැවසිය.
ජාතික වෙසක් උත්සවය නුවරඑලියේ පැවැත්විම සම්බන්ධයෙන් (25) දින පස්වරුවේ නුවරඑලිය දිස්ත්‍රික් ලේකම් කාර්යාල ශ්‍රවණාගාරයේ පැවති සාකච්ඡාවෙන් අනතුරුව මාධ්‍යට අදහස් දක්වමින් අමාත්‍යවරයා කියා සිටියේ මැයි මස 10-16 දින දක්වා සතියක කාලයක් ජාතික වෙසක් උත්සවය පැවැත්විමට කටයුතු කරන බවයි.
ජනාධිපති අනුර කුමාර දිසානායක මහතාගේ ප්‍රධානත්වයෙන් ජාතික වෙසක් උත්සවය ආරම්භ කරන බවත්, මෙයට සමගාමිව නුවරඑලිය දිස්ත්‍රික්කයේ සියළුම පාසල්වල, ආගමික ස්ථානවලද බෞද්ධ සංස්කෘතික විදහා දක්වන ආකාරයෙන් සංස්කෘතික අංග ඉදිරිපත් කරන බවයි අමාත්‍යවරයා කියා සිටියේ.
ජාතික වෙසක් උත්සවය නැරඹිමට පැමිණෙන පිරිස් වෙනුවෙන් අවශ්‍ය ප්‍රවාහන පහසුකම් සහ ආරක්ෂාව ලබාදිමටත් මෙම සාකච්ඡාවේදි තිරණය කර ඇත.
මෙම සාකච්ඡාවට බුද්ධ ශාසන හා සංස්කෘතික කටයුතු නියෝජ්‍ය අමාත්‍ය ගමගෙදර දිසානායක මහතා, නුවරඑලිය දිස්ත්‍රික් ලේකම් තුෂාරි තෙන්නකොන් මහත්මිය, නුවරඑලිය දිස්ත්‍රික් සංවර්ධන කමිටුවේ සභාපති පා.ම මංජුල සුරවිරආරච්චි මහතා, ගෞතම ශ්‍රි පාදස්ථානාධිපති බෙන්ගමුවේ ධම්මදින්න නාහිමියන් ඇතුළු මහ සංඝ රත්නය, රාජ්‍ය සහ පෞද්ගලික අංශයේ නිලධාරින් රැසක් සහභාගි විය.
Leave a Reply