අල්ට්‍රාපෝටබල් ගේමින්ග් ලැප්ටොප් ලෝකයේ අනාගතය
ලෝකයේ පරිගණක ක්‍රීඩා ලෝලීන් කෙතරම් සංඛ්‍යාවක් සිටීදැයි සංඛ්‍ය ාලේඛනයන් අප සතුව නොමැති වුවත්, එය සමස්ත පරිගණක පරිශීලකයන් ප්‍රමාණයෙන් අතිශයින්ම දැවැන්ත ප්‍රතිශතයක් බව අපට නිසැකවම කීමට හැකියාව තිබේ. එම ප්‍රමාණයෙන්ද සැලකිය යුතු කොටසක් තම පරිගණක ක්‍රීඩා අත්දැකීම් ලැබීම සඳහා ඉහළ හැකියාවන් සහිත පරිගණක යන්ත්‍ර, ඉහළ ක්‍රීඩා අත්දැකීමක් ලබාදීම සඳහාම නිර්මාණය කළ උපාංග සඳහා ආයෝජනය කරන්නන් වේ. ලෝකයේ ගේමින්ග් පරිගණක මෙන්ම පරිගණක ක්‍රීඩා සඳහාම සුවිශේෂී වූ අමතර උපාංගයන් නිෂ්පාදනය ඉහළ තලයක පවතින්නේද එබැවිනි.
කාලයකට පෙරාතුව තිබූ දැවැන්ත ඩෙක්ස්ටොප් පරිගණක ගේමින්ග් පද්ධතීන් හා තරග වැදීමට ගේමින්ග් ලැප්ටොප් උපාංගයන් බිහිවූ අතර, ඒවාද බොහෝ කාලයක් ගතවන තුරුම හැඩි දැඩි,
අධි තාක්ෂණික උපාංග ලෙසින් වෙළෙඳ පොළට ඉදිරිපත් විණි. කෙසේ වෙතත් මෙම ගේමින්ග් ලැප්ටොප් නිෂ්පාදනය කළ සමාගම් විය යුතු පරිද්දෙන්ම, තම උපාංගයන් ශක්‍යතා‍ෙවන් දියුණු කරනා අතරේම වඩ වඩාත් හුරුබුහුටි නිමාවෙන් ඉදිරිපත් කිරීමට වෙහෙස ගත් අතර, වර්තමානයේ දක්නට ලැබෙනා වඩාත් සිහින් හැඩයකින් සහ අධි තාක්ෂණික නිමාවකින් යුතු ගේමින්ග් ලැප්ටොප් උපාංග එම වෙහෙසේ ප්‍රතිඵල ලෙසින් ඉදිරිපත් කළ හැකිය. මෙම නව ගේමින්ග් ලැප්ටොප් පරම්පරාවක අනාගතය නියෝජනය කරනා මුහුණුවරකින් වෙළෙඳ පොළට ඉදිරිපත්ව ඇති නවතම උපාංගය ASUS ROG Zephyrus M නමින් හැඳින්විය හැක.
ඉන්ටෙල් සමාගමේ අට වැනි පරම්පරාවේ ප්‍රොසෙසරයකින් ධාවනය වන ලෝකයේ සිහින්ම ගේමින්ග් පරිගණකය ලෙසින් හඳුන්වා දෙනු ලබන මෙම ASUS ROG Zephyrus M උපාංගය
අඟල් 0.78 ක ප්‍රමාණයේ සිහින් බඳකින් යුක්ත වන අතර, එය දැනට වෙළෙඳ පොළේ ඇති අල්ට්‍රාපෝටබල් කාණ්ඩයේ ලැප්ටොප් උපාංගයකට වඩා හැඩි දැඩි නොවේ. මෙහි හුරුබුහුටි නිමාව සමගින් වුවත් මෙයට ඩෙක්ස්ටොප් ගේමින්ග් පරිගණක පද්ධතියක වැනි ප්‍රබල පරිගණක බලයක් ලබාදීමට හැකියාව තිබෙනා අතර, ඒ මගින් ඔබට වෙළෙඳ පොළේ දක්නට ලැබෙනා AAA කාණ්ඩයේ වඩාත් බරපතළ පරිගණක බලයක් අවශ්‍ය වන ක්‍රීඩාවන් වුවත් පහසුවෙන් ධාවනය කිරීමට හැකියාව ලබාදෙනු ඇත.
මෙම ASUS ROG Zephyrus M ගේමින්ග් ලැප්ටොප් උපාංගය ඉන්ටෙල් සමාගමේ අට වැනි පරම්පරාවේ 3.9GHz Intel Core i7-8750H ප්‍රොසෙසරයකින් ධාවනය වන අතර, එයට එතෙක් මෙතෙක් නිර්මාණය වී ඇති ප්‍රොසෙසර බලය ඉතාමත් අධිකව භාවිත කරන නවීන මෘදුකාංගයක් ඉතාමත් පහසුවෙන් ධාවනය කිරීමට හැකියාව ඇත. මේ හා සම වීම සඳහා මෙහි ගිගාබයිට් 16ක DDR4 රැම් මතකයක්ද ස්ථාපනය කොට ඇත. මෙම රැම් මතකය අවශ්‍ය නම් ඔබට ගිගාබයිට් 32 දක්වා ඉහළ දැමීමටද අවකාශය ඇත. මෙහි පද්ධතිය තුළම වන ග්‍රැ‍ෆික් ප්‍රොසෙසරයක් මෙන්ම වඩාත් ප්‍රබල ගිගාබයිට් 8ක NVIDIA GeForce GTX 1070 ග්‍රැ‍ෆික් ප්‍රොසෙසරයක්ද NVIDIA G-SYNC™ තාක්ෂණය ද සමගින් ස්ථාපනය කොට ඇත. මෙවැනි සැකසුමක් තිබීම මගින් ලැබෙන වැඩිමනත් වාසිය වන්නේ, ඔබ සිදුකරන කාර්යයට අනුකූලව භාවිතා කරනා ග්‍රැ‍ෆික් ප්‍රොසෙසරය වෙනස් කිරීම ඉතාමත් පහසුවෙන් සිදුකිරීමට ඔබට අවකාශය තිබීමත්, ඒ අනුසාරයෙන් ASUS ROG Zephyrus M උපාංගයේ බැටරි ආරෝපණය පවත්නා කාලය දීර්ඝ කරගැනීමට හැකියාව ලැබීමත් වේ. මෙහි මතක ධාරිතාවන් සම්බන්ධයෙන් සඳහන් කිරීමේදී, මෙහෙයුම් පද්ධතිය සහ වෙනත් අත්‍යවශය සහායක යෙදුම් සඳහා මෙහි ගිගාබයිට් 256ක හෝ 512ක NVME PCIE® SSD මතකයක් අතුරින් එක් සංස්කරණයක් ඔබට තෝරාගැනීමට හැකිය. පරිගණක ක්‍රීඩා ඇතුළු ඔබට අවශ්‍ය අනෙකුත් ගොනු සඳහා ටෙරාබයිට් 1ක FIRECUDA™ SSHD මතකයක්ද මෙහි ස්ථාපනය කොට ඇත.
මෙහි නවීන ගේමින්ග් පරිගණකයකටම සුදුසු වන ආකාරයේ අඟල් 15.6ක Full HD IPS පැනලයක් ලෙසින් තිබේ. එසේම මෙහි NVIDIA frame synchronization තාක්ෂණයද භාවිත වන්නේ පරිගණක ක්‍රීඩාවක් අතරතුරදී අතිශයින්ම මටසිලි‍ටු ග්‍රැ‍ෆික් අත්දැකීමක් ලබාදීම සඳහා වේ. එසේම Wide-view තාක්ෂණය මගින්, අංශක 178ක කෝණයකදී වුවද පරිගණක තිරයට ඉතාම නිවැරදි වර්ණයන් දර්ශනය කරවීමට හැකියාව ඇත. එසේම ඕනෑම ගේමින්ග් පරිගණකයක මෙන් මෙහිද ඔබට අවශ්‍ය ලෙසින් වර්ණ සැකසුම් කළ හැකි, වර්ණ රටා ක්ෂේත්‍රයන් 4කට අයත් යතුරු පුවරුවක්ද මෙහි ඇත.
මෙවැනි අධිබලැති යන්ත්‍රයක් සිසිලනය කිරීම සඳහා සුවිශේෂී ක්‍රමවේදයන් ස්ථාපනය කොට තිබිය යුතු බැව් නොකිවමනායි. මෙහි අධිබලැති දුහුවිලි-ප්‍රතිරෝධී තාපන පංකා දෙකක් පිහි‍ටුවා ඇති අතර, මධ්‍යම සැකසුම් ඒකකය, ග්‍රැ‍ෆික් ප්‍රොසෙසරය ඇතුළු සෑම බලගැන්වුම් කොටසක්ම ආවරණය කරමින් විහිද යන තාපන-නළ පද්ධතියක්ද තිබේ. එසේම මෙහි ඇති සුවිශේෂී සිසිලන ක්‍රමවේදයක් වන්නේ, උපාංගයේ තිරය විවෘත කිරීමත් සමගින් උපාංගය එහි පාදමෙන් මඳක් ඉහළට එසැවී වායු සංසරණය වඩාත් කාර්යක්ෂම කිරීමයි. මෙහි නිෂ්පාදකයන්ට අනුව එම ක්‍රමවේදය මගින් සාමාන්‍ය ලැප්ටොප් සැලසුමකට වඩා 20%ක් කාර්යක්ෂමව වායු සංසරණයත්, අභ්‍යන්තර උෂ්ණත්ව පාලනයත් සිදුවේ.
කිලෝග්‍රෑම් 2.45ක් බ‍රැති මෙම උපාංගය සහ වර්ණයන්ගෙන් යුතුව, ඔපදැමූ ඇලුමිනියම් නිමාවකින් යුක්ත වන අතර, ගේමින්ග් ලැප්ටොප් පරිගණකයක තිබිය යුතු අධිතාක්ෂණික, නවීන පෙනුම එයින් ලබාදී ඇත. මෙහි USB 3.1 Gen2 Type C පෝට් එකක්, USB 3.1 Gen2 පෝට් 4ක්, HDMI 2.0 පෝට් එකක් සහ 3.5mm හෙඩ්ෆෝන් සහ මයික්‍රොෆෝන් කොම්බෝ ජැක් එකක්ද තිබේ. එසේම මෙහි Wi-Fi සහ Bluetooth රැහැන් රහිත සම්බන්ධතාවන්ද තිබේ. ඔබට ASUS ROG Zephyrus M උපාංගයේ තිරය ඔබේ පරිගණක ක්‍රීඩා අත්දැකීම් සඳහා ප්‍රමාණවත් නොවන බව හැ‍ඟෙන්නේ නම්, පහසුවෙන්ම සුවිශාල මොනිටරයන් කිහිපයක් වෙත මෙය සම්බන්ධ කිරීමටද හැකියාව ඇත.
මෙවැනි අතිශයින්ම සිහින්, හුරුබුහුටි නිමැවුමක සිර වූ අධිබලැති පරිගණක යන්ත්‍රයක් තුළ ගැටළුවක් තිබීමට නොහැකිද? සැබවින්ම මෙහි එක් අඩුවක් තිබෙන නමුත් එය සැලකිය යුතු එකක් නොවේ. එනම් මෙහි බැටරි බලයයි. සාමාන්‍ය ග්‍රැ‍ෆික් ප්‍රොසෙසරයෙන් ක්‍රියාත්මක වීමේදී එක දිගට පැය 6කට ආසන්න කාලයක් ASUS ROG Zephyrus M උපාංගය ක්‍රියාත්මක වන අතර, සමගින් අධිබලැති ග්‍රැ‍ෆික් ප්‍රොසෙසරය හා ක්‍රියාත්මක වීමේදී එම බැටරි ආරෝපණය පවත්නා කාලය පැය 3 කට ආසන්න කාලයක් දක්වා පහත බසිනු ඇත. මෙම ගැටළුව විසඳා ගැනීමට අපහසු එකක් නොවෙනා අතර, ASUS ROG Zephyrus M ගේමින්ග් ලැප්ටොප් උපාංගයේ ශක්‍යතාවන් හා සසඳා බැලීමේදී එය නොතකා හැරීමට සිදුවනු ඇත.
යූටියුබ් වීඩියෝව නරඹන්න:
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
