LED Clip-on book reading light

ජංගම භාවිතාවකට වඩාත් ගැළපෙන, ඇසට කරදරකාරී නොවන තරමේ සෞම්‍ය, එසේම පොතක පි‍ටු කියවීමට තරම් ප්‍රබල ආලෝකයක් ලබාදෙන උපාංගයක් තිබේ නම් බොහෝදෙනා එය ආශාවෙන් වැළඳ ගනු ඇත. LED Clip-on book reading light යනුවෙන් හැඳින්වෙන්නේ රාත්‍රී කියවීම් ලාම්පු සඳහා මේ වනවිට දැකිය හැකි සාර්ථකම විකල්පයකි. LED Clip-on book reading light උපාංග මේ වනවිට Energizer වැනි අන්තර්ජාතිකව නමක් දිනාගත් සමාගම් මගින් මෙන්ම ඉලෙක්ට්‍රොනික උපාංග නිර්මාණය කරනා කුඩා සමාගම් මගින්ද නිෂ්පාදනය කෙරෙනා බව දැකිය හැකිවේ. මෙවැනි LED Clip-on book reading light උපාංගයක ක්‍රියාකාරීත්වය සරල වේ.

නම්‍යශීලී බඳක් සහිත මෙහි එක් අග්‍රයක පහසුවෙන්ම පොතකට ක්ලිප් කළ හැකි සැකැස්මක් තිබෙනා අතර, අනෙක් අග්‍රයේ ප්‍රබල එහෙත් සෞම්‍ය ආලෝකයක් ලබාදෙන LED බල්බ එකක් හෝ කිහිපයක් පවතී. එසේම මේවා බලගැන්වීම සඳහා බොහෝ විට Coin Cell වර්ගයේ කුඩා වටකු‍රු බැටරි භාවිත වන අතර, මෙම උපාංගයන්ගේ අඩු විද්‍යුත් පරිභෝජනයක් ඇති නිසා එක් වරක් බැටරි යෙදීමෙන් පසුව සැලකිය යුතු කාලයක් ඔබට LED Clip-on book reading light උපාංගය භාවිත කිරීමට හැකිවනු ඇත.

මෙවැනි උපකරණයක් වැදගත් වන්නේ සාම්ප්‍රදායික පොතක් කියවන්නෙකුට පමණක් නොවේ. පැරණි තාලයේ E-ink තිරයන් සහිත E-book reader උපාංගයන්හි ඇති ගැටලුවකටද මෙය හොඳ විකල්පයකි. එනම්, එවැනි ඊබුක් රීඩරයන්හි නවීන tablet උපාංගයන්ගේ මෙන් Backlit තිරයක් නොමැති නිසා, අඳු‍රු ස්ථානයකදී එය කියවීම කළ නොහැකි වෙයි. ඒ නිසා ඔබට මෙම LED Clip-on book reading light උපාංගය ඔබේ ඊබුක් රීඩරයටද පහසුවෙන් සවි කර රාත්‍රියේදී භාවිත කළ හැකිවේ.

ශ්‍රී ලංකාව තුළද සුපිරි වෙළෙඳසැල් වල සිට ප්‍රධාන පෙළේ ඉලෙක්ට්‍රොනික භාණ්ඩ අලෙවි සැල් දක්වා ස්ථානයන්හිදී මෙම LED Clip-on book reading light උපාංග මිලදී ගැනීමේ හැකියාව තිබේ. කෙසේ වුවත් ebay වැනි වෙබ් අඩවියක් ඔස්සේ ඔබට ඊටත් වඩා ඉතාමත් අඩු මිලකට, හොඳ ගුණාත්මක තත්ත්වයකින් සහ හොඳ කල්පැවැත්මකින් යුතු LED Clip-on book reading light උපාංගයක් ගෙන්වා ගැනීමටද හැකියාව තිබෙනා බව සඳහන් කළ යුතුය.