ප්ලාස්ටික් සැත්කම් පසුගිය කාලසීමාවේ වඩාත් කතාබහට ලක්වන මාතෘකාවක් බවට පත්වූයේ සැත්කම් වැරදී ජීවිත හානි හා වෙනත් සංකූලතා ඇතිවීම් වාර්තා වූ නිසයි. විශේෂයෙන් මෙරට කාන්තාවන් පැහැපත්වීමට, තරුණවීමට යැයි සිතා සිදුකරගන්නා ලද ප්ලාස්ටික් සැත්කම් හා ඖෂධ එන්නත් කර ගැනීම් වැඩිවීමේ සම්භාවිතාවක් පැවතීම මෙයට හේතුවී තිබුණි. ලංකාව පුරා හතු පිපෙන්නාක් මෙන් ප්ලාස්ටික් සැත්කම් සිදුකරන ස්ථාන බිහිවීම ඒවායේ නිත්‍යානුකූලභාවය පිළිබඳ ගැටලු ඇතිවීම නිසාත්, ප්ලාස්ටික් සැත්කමක් යනු කුමක්ද? එය කුමන තත්ත්වයක් යටතේ සිදුකරන්නක්ද යන්න බොහෝදෙනා නොදන්නා නිසාත් අපි ඒ ගැන රාගම ශික්ෂණ රෝහලේ ප්ලාස්ටික් ශල්‍ය විශේෂඥ වෛද්‍ය කෝලිත කරුණාරත්න මහතාගෙන් මෙලෙස විමසා බැලුවෙමු.
.gif)
Q ප්ලාස්ටික් සැත්කමක් යනු කුමක්ද?
ප්ලාස්ටික් සැත්කමක් පුළුල් පරාසයකට දිවෙන ශල්‍යකර්ම විෂයක්. මෙම සැත්කම් සිදුකළ යුත්තේ නිසි පුහුණුවලත් ප්ලාස්ටික් ශල්‍ය වෛද්‍යවරයෙක් විසින්. ප්ලාස්ටික් සැත්කම් විෂය අනුකොටස් කිහිපයකට බෙදා දැක්විය හැකියි. Hand Surgery යටතට අතේ සහ පර්යන්ත ස්නායු පද්ධතිය තිබෙන විවිධාකාරයේ රෝග තත්ත්වයන්වලට කරන ශල්‍යකර්ම ඇතුලත් වෙනවා. උපතේදී ඇතිවන විකෘතිතා සකස් කිරීම අනෙක් අනු කොටසයි. උදාහරණ තොල සහ තල්ල ඇලීම වැනි තත්ත්වයන් හා කන්පෙත්ත රහිතව ඉපදීම, අත්වල විකෘතිතා ඇතිව ඉපදෙන දරුවන්ට සිදුකරන ශල්‍යකර්ම මෙයට අයත්. මීළඟ අනු කොටස වන්නේ පිළිස්සුම් සහ විවිධාකාරයේ අනතුරුවලින් ඇතිවන විකෘතිතා ප්‍රකෘති තත්ත්වයට පත්කරන සැත්කම් වර්ගයයි.
මෙහි අනෙක් අනු කොටස වන්නේ Micro vascular Surgery යන්නයි. එහිදී ශරීරයේ කොටසක යම් හේතුවක් නිසා ඇතිවන අඩුවක් (එය ව්‍යුහමය වශයෙන් හෝ කෘත්‍රිම වශයෙන් සිදුවිය හැකියි) පිරවීම දැක්විය හැකියි. උදාහරණ ලෙස අනතුරකින් ශරීරයේ එක කොටසක් ගැලවී යාම, ශරීරයේ විශාල ගෙඩියක් ඉවත් කිරීම ගත හැකියි (පිළිකා නිසා/ පියයුරු පිළිකාව හේතුවෙන් සැත්කම් මගින් පියයුරු ඉවත් කිරීම). මෙවැනි අවස්ථාවක නැවත එම ව්‍යූහය සකස් කිරීම සිදුකෙරේ. එමෙන්ම ස්නායුවලට සිදුවන හානි වලදී ස්නායු යළි සකස් කිරීම සිදුකරනු ලබයි.
මීළඟට ප්ලාස්ටික් සැත්කම් බෙදෙන අනු කොටස වන්නේ Cosmetic/Aesthetic Surgery මේ වගේ සැත්කම් වලදී සිදුවන්නේ රෝගයක් නැති නමුත්, ශරීරයේ යම්කිසි තැනක වෙනසක් බලාපොරොත්තුවෙන් සිදුකරන සැත්කම්ය. උදාහරණ - වයසට යාමේදී සිදුවන වෙනස්කම්, මහත්වීම නිසා සිදුවන වෙනස්කම් මෙන්ම පියයුරු කුඩා කිරීම්, පියයුරු විශාල කිරීම්, බඩ අඩු කිරීම්, නහය, නිකට වෙනස් කිරීම් දැක්විය හැකියි.
ප්ලාස්ටික් සැත්කම් අතර ආන්දෝලනාත්මක තත්ත්වයක් ඇති කර තිබෙන්නේ මෙම අනුසැත්කම් අතරින් Cosmetic Surgery එහෙමත් නැත්නම් Aesthetic Surgery යටතට ගැනෙන සැත්කම්ය. මෙය ප්ලාස්ටික් සැත්කම්වල එක් කොටසක් පමණයි. ඒ නිසා සියලුම ප්ලාස්ටික් සැත්කම් Cosmetic Surgery වලට සමාන කිරීම සිදුකළ යුත්තක් නොවේ. Cosmetic Surgery වලට වඩා අනෙකුත් අනු කොටස් යටතේ තිබෙන ප්ලාස්ටික් සැත්කම් ඉතා සංකීර්ණයි. ප්ලාස්ටික් සැත්කම් යටතේ පුළුල් පරාසයක් කතා කළ හැකියි. ඇතැම් සැත්කම් හිරිවැට්ටවීම් පමණක් සිදුකර ශල්‍යකර්මයකට භාජනය කළ හැකි අතර, සිහි නැති කර පැය 3,4 ක් පමණ ගතවන විශාල ශල්‍යකර්මත් පවතිනවා. ඒවා ලෝකයේ ඉතාම සාර්ථකව සිදුකරනු ලබන ශල්‍යකර්මයි.
.gif)
Q ප්ලාස්ටික් ශල්‍යවෛද්‍යවරු ලංකාවේ සුලබද?
ලංකාවේ දැනට වෛද්‍ය සභාවෙන් පිළිගත් රජයේ ලියාපදිංචි ප්ලාස්ටික් ශල්‍යවෛද්‍යවරු සිටින්නේ සීමා සහිතවයි. මේ සියලුම ශල්‍ය‘වෛද්‍යවරුන් MBBS වලින් පසුව පශ්චාත් උපාධි වෛද්‍ය ආයතනය යටතේ පශ්චාත් උපාධිය ලබාගැනීමෙන් පසු විශේෂ පුහුණුවක් ලබා අවුරුදු දෙකක අවම විදේශීය ප්ලාස්ටික් ශල්‍ය‘වෛද්‍ය ආයතනයක (එංගලන්තය, ඔස්ට්‍රේලියාව, සිංගප්පූරුව වැනි ලෝකයේ පිළිගත් වෛද්‍ය ආයතනයක් විය යුතුයි) පුහුණුවක් ලැබිය යුතුයි.
මෙම පුහුණුව ලබා නැවත ලංකාවට පැමිණි පසු වෛද්‍ය සභාවෙන් ප්ලාස්ටික් ශල්‍ය‘වෛද්‍යවරයෙකු ලෙස සහතිකය පිරිනමනු ලබයි. මෙම සහතිකය සමග මහජන සේවා කොමිසමේ අනුමැතිය යටතේ ප්ලාස්ටික් ශල්‍ය‘වෛද්‍යවරු සේවාවේ යෙදේ. දිගු පුහුණුවක ප්‍රතිඵලයක් ලෙසට තමයි ප්ලාස්ටික් ශල්‍ය‘වෛද්‍යවරයෙකු බිහිවීම සිදුවන්නේ.
Q මෙම ක්‍රියාවලියෙන් බැහැරව විදේශ පුහුණුව ලත් බවට සඳහන් කරන ප්ලාස්ටික් ශල්‍ය‘වෛද්‍යවරුන් ලංකාවේ සේවය කරනවා නේද? ඔවුන් සුදුසුකම්ලත් අය බවට තහවුරු කර ගැනීමට සේවා ලබාගන්නෙකුට හැකියාවක් තිබෙනවාද?
එලෙස තහවුරු කර ගැනීමට හැකියාවක් මහජනතාවට තිබිය යුතුයි. නමුත් දැනට අවාසනාවට වගේ ප්ලාස්ටික් ශල්‍ය‘වෛද්‍යවරුන්ගේ තොරතුරු සඳහන් ලේඛනයක් මෙරට නැහැ. විවිධ වෛද්‍ය කණ්ඩායම් මෙහි අවශ්‍යතාවය පෙන්වා දුන්නත්, විශේෂඥ වෛද්‍යවරුන්ගේ ලේඛනය ලෙස සඳහන් කරනු ලබන ලේඛනය තවම මෙරට සකසා නැහැ. විදේශ රටවල පුහුණුව ලබා පැමිණි බවට කටවචනයෙන් යමෙක් ප්‍රකාශ කරයි නම්, එය එලෙසම පිළිගැනීම සිදුනොකළ යුතුයි. එයට සාක්ෂි අවශ්‍ය වේ. විදේශ රටක පුහුණුව ලැබුවේ නම් අනිවාර්යයෙන් එම රටේ අදාළ ආයතනයේ පිරිනැමූ සහතිකයක් තිබිය යුතුම වේ. වෛද්‍යවරුන් ආවට ගියාට බිහිකරන, පුහුණුකරන තත්ත්වයක් විදේශයන්වල නැහැ.
ඒ වගේම මෙරටින් විදේශගතව වෛද්‍යසහතිකයක් ලබා පැමිණීම ආවාට ගියාට සිදුකළ නොහැකියි. යම් වෛද්‍යවරයෙක් විදේශ පුහුණුවකට යොමුකරන්නේත් සෞඛ්‍ය අමාත්‍යාංශය හරහායි.
අපේ රටේ තියෙන ප්‍රශ්නයක් තමයි සාමාන්‍ය ව්‍යාපාර වගේ වෛද්‍ය විද්‍යාව සම්බන්ධ ව්‍යාපාර පවත්වාගෙන යාම. හදවත් රෝග, මුත්‍රා ගල්, ලිංගික රෝග, ඇස් රෝග, ඩෙංගු, දියවැඩියාව වැනි රෝගවලට ප්‍රතිකාර කිරීම, ඒ වගේම මානසික රෝගවලට ප්‍රතිකාර කරන බවට පුවත්පත්, විද්‍යුත් මාධ්‍යයවල දැන්වීම් යොදමින් විවිධ පුද්ගලයින් වෛද්‍යවරුන් ලෙස ඉදිරිපත්වනු දැකගත හැකියි.
ඒ වගේම තමයි ප්ලාස්ටික් සැත්කම් සිදුකරන බවට සඳහන් කරන පුද්ගලයින්ගේ වෙළෙඳ දැන්වීම්ද දැකගත හැකියි. මෙවැනි පුද්ගලයින් සිදුකරන ප්‍රධාන දෙයක් වන්නේ දැන්වීම්කරණයයි. නමුත් වෛද්‍ය විද්‍යාවේ ප්‍රචාරණය තහනම්. වෛද්‍යවරුන්ට දැන්වීම්කරණය සදාචාරාත්මක නොවන නීත්‍යානුකූල නොවන දෙයක්. මේ නිසා මහජනතාව දැනුවත් විය යුතුයි යමෙක් ලෙඩ රෝග සුව කරන බවට හෝ මෙවැනි සැත්කම් කරන බවට වෙළෙඳ දැන්වීම් හරහා පවසනවා නම් එය නිවැරදි නොවන තත්ත්වයක් බවට. අන්තර්ජාලයේ, විද්‍යුත් මාධ්‍යයේ, මුද්‍රිත මාධ්‍යයේ මෙවැනි ප්‍රචාරණයන් තිබේ නම් මහජනතාව වඩාත් ඒ පිළිබඳව සැලකිලමත්විය යුතුයි.
නමුත් එවැනි ප්‍රචාරණයන් පළවුණත් මහජනතාව ඊට එරෙහිව පියවර ගන්නා තත්ත්වයක් මෙරට දැකගත හැකිවන්නේ නැහැ. යමෙකුට මෙවැනි තත්ත්වයක් පිළිබඳ පැමිණිලි කිරීමට අවස්ථාවක් පවතී. ඒ සඳහා දිවුරුම් පෙත්සමක් හැටියට ශ්‍රී ලංකා වෛද්‍ය සභාවට පැමිණිලි ඉදිරිපත් කිරීමේ හැකියාවක් තිබේ. එලෙස ඉදිරිපත් කරන පැමිණිලි පිළිබඳව පරීක්ෂා කිරීමේ හැකියාවක් ශ්‍රී ලංකා වෛද්‍ය සභාවට පවතියි.
මෙවැනි වෛද්‍යවරුන් වෙත යාමට ප්‍රථමයෙන් මහජනතාව තේරුම් ගත යුත්තක් වන්නේ යම් අයෙක් ප්‍රචාරණයක් සිදුකරයි නම්, ඔහු හෝ ඇය මුදල් බලාපොරොත්තුවෙන් මෙම ප්‍රතිකාර සිදුකරන බව. එහිදී ප්‍රතිකාර කරන මුවාවෙන් කුමක්ද සිදුකරන්නේ යන්න පිළිබඳ හොඳ අවධානයක් යොමුකළ යුතුයි.
නවීන වෛද්‍ය විද්‍යාවේ ඉදිරි ගමන තීරණය වී තිබෙන්නේ එක් මූලික සිද්ධාන්තයක් වන විද්‍යාත්මක පරීක්ෂණවලින් ගත් නිගමන හරහායි.
මේ හරහා රෝගීන්ට ප්‍රතිකාර කිරීමයි සිදුවන්නේ. නමුත් යමෙක් කියනවානම් ඔහු හෝ ඇය සකසා ගත් ඖෂධයක් හෝ ප්‍රතිකාර ක්‍රමයක් ඔස්සේ ප්‍රතිකාර කිරීම සිදුකළ හැකියි කියා එහි පවතින මූලික පරීක්ෂණවලින් ගත් නිගමන මොනවාදැයි සොයාබැලිය යුතුයි. එනම් ලෝකයේ ඕනෑම නව ඖෂධ වර්ගයක් හෝ ප්‍රතිකාර ක්‍රමයක් ඔප්පු කර පිළිගත හැකි වෛද්‍ය ජර්නලයකට මුදාහැර තිබිය යුතුයි. එවිට pubmed හරහා කේතනය වීම සිදුවේ. පසුව ලෝකයේ ඕනෑම අයෙකුට එම ඖෂධය හෝ ප්‍රතිකාර ක්‍රමය පිළිබඳ අන්තර්ජාලය හරහා විමසා බැලීමේ හැකියාවක් ලැබේ. එසේ නොමැතිව මම රෝගීන් මෙතරම් ප්‍රමාණයක් සුව කර තිබෙන බව පැවසීම ප්‍රමාණවත් නොවේ.
.gif)
ඒ වගේම විවිධ වෛද්‍යවරු ලෙස පෙනී සිටින අය තමන් වෙන වෙන රටවල් වලින් පුහුණුව ලබා ආ බව සඳහන් කරයි නම් ඒ පිළිබඳව විමසා බැලීම මහජනතාව සිදුකළයුත්තකි. නමුත් සිදුවන්නේ බොහෝදෙනා වෙළෙඳ දැන්වීම් හරහා මොවුන්ගෙන් ප්‍රතිකාර ලබා අමාරුවේ වැටුන විට රජයේ රෝහලකට ඇතුල්වීමයි. එවිට රජයේ මුදල් පාවිච්චි කර ඔවුන්ගේ සංකූලතා මගහරවා ගැනීම සිදුකළ යුතුයි.
පසුගිය දිනවල සිදුවුණු ප්ලාස්ටික් සැත්කම් (Cosmetic Surgery) නිසා ඇතිවුණු සංකූලතා නිසා රෝහල් ගතවීමේ සිද්ධිවලදී ඔවුන් එම සංකූලතා වලින් මුදවා ගැනීමට රජයේ රෝහල්වලට මහත් පරිශ්‍රමයක් දැරීමට සිදුවුණා. එමෙන්ම එවැනි ප්‍රතිකාර කරන මධ්‍යස්ථානවලට ගොස් විවිධ සංකූලතා ඇතිවූ බොහෝ රෝගීන් එම සංකූලතා තත්ත්ව විඳදරාගෙන තමන්ට වෙච්ච පාඩුවද විඳදරාගෙන ජීවත්වන බවටද ඕනෑතරම් සාක්ෂි පවත්වනවා.
Q ප්ලාස්ටික් සැත්කම්වලදී සංකූලතා මතුවීමේ ඉඩකඩ වැඩිද?
ඕනෑම සැත්කමකදී සංකූලතාවන් ඇතිවිය හැකියි. එය ප්ලාස්ටික් සැත්කම්වලට පමණක් පොදු වූවක් නොවේ. ඕනෑම දියුණු රටක කරන සැත්කමකදී වුවත් සංකූලතා ඇතිවිය හැකියි. උදාහරණ ලෙස තුවාලයක් පැසවීම වුවත් දැක්විය හැකියි. නමුත් රජයේ රෝහලක සැත්කමක් සිදුකරන්නේ සංකූලතා අවම වන ලෙසයි. ඒ වගේම නොසිතන අවස්ථාවල සංකූලතා ඇතිවීමට ඉඩක් පවතින නිසා හොඳ සූදානමකින් තමයි සැත්කම් සිදුකරනු ලබන්නේ. ඒ වගේම ආසාත්මිකතා ඕනෑම අයෙකුට ඇතිවිය හැකියි. ඒ නිසා රෝගියෙකුට සැත්කමක් කිරීමට ප්‍රථම ආසාත්මිකතාවන් පිළිබඳව විමසා බලා ඒවාට අවශ්‍ය පෙර සූදානම් සිදුකර සැත්කම්වලට ලක්කිරීමයි සිදුකරන්නේ.
අපේ සෑම ශල්‍යාගාරයකම, සෑම වාට්ටුවකම, සෑම දැඩිසත්කාර ඒකකයකම හදිසි ප්‍රතිකාර සඳහා අවශ්‍ය සියලු දෑ සූදානම් කර තිබෙනවා මෙන්ම සියලුම හෙද කාර්ය මණ්ඩලය පවා එම තත්ත්වයන් වලදී ක්‍රියාකළ යුතු ආකාරය පිළිබඳ පුහුණුවක් ලබා සිටිනවා. රජයේ වගේම පෞද්ගලික රෝහල්වල මෙම තත්ත්වය දැකගත හැකි නමුත් නිවසක නැත්නම් වෙනත් සායනවල මෙවැනි සූදානමක් පවතිනවාද යන්න සැකසහිතයි.
Q Cosmetic Surgery එකක් සිදුකර ගැනීමට යම් ස්ථානයකට පුද්ගලයෙක් යොමුවේ නම්, එම ස්ථානයේ තත්ත්වය පිළිබඳ අදහසක් ගැනීමට හැකියාවක් තිබේද?
ශල්‍යකර්මයක් හෝ පුද්ගලයෙකුගේ සම ඇතුළට යන කැපීමක්, ලේ ගැලීමක් සිදුවන දෙයක්, මැස්මක්, එන්නත් කිරීමක් වැනි දෙයක් සිදුකරයි නම්, එම ස්ථානය ආරක්ෂාකාරී ස්ථානයක් විය යුතුයි. යම් පුද්ගලයෙකුට ආසාත්මිකතාවක් ඇතිවුවහොත් නැවත ප්‍රතිජීවය ලබාදිය හැකි පහසුකම් එම ස්ථානයේ පවතීද යන්න සොයා බැලිය යුතුයි. ඒ වගේම ශල්‍යකර්මයක් සිදුකරන ස්ථානයක ජීවානුහරණ පද්ධතිය නිසියාකාරව තිබිය යුතුයි. නමුත් ජීවානුහරණය නිවැරදිව තබාගැනීම ඉතාම මිලාධික කටයුත්තක්.
ඒ නිසා සියලුම රජයේ රෝහල් හා ඇතැම් පෞද්ගලික රෝහල් හැර අනෙකුත් වෛද්‍ය ආයතනවල ජීවනුහරණය නිවැරදිව පවතීද යන්න පිළිබඳ සැකයක් මතුවේ. ඒ වගේම හදිසි අවස්ථාවකදී ප්‍ර‘යෝජනයට ගැනීමට ගිලන්රථයක් එම ස්ථානයේ තිබිය යුතුයි. තවද මෙවැනි ප්‍රතිකාර මධ්‍යස්ථාන බොහෝවිට පවතින්නේ තට්ටුනිවාස සංකීර්ණයක හෝ මහල් වෙළෙඳසංකීර්ණවල බැවින්හදිසි අවස්ථාවකදී ප්‍රතිකාර සඳහා රෝහලවෙත රැගෙන යාමේ පහසුකම් නොමැති වන අවස්ථාද බහුලයි.
ඒ නිසා එවැනි ස්ථානයක හදිසියකදී රෝහලක් වෙත රැගෙන යාමට ගිලන් ඇඳන්, විදුලි සෝපාන පහසුකම්, ගිලන්රථ පවතීද යන්න ප්‍රතිකාර ගැනීමට පෙර සොයාබැලිය යුතුයි. අපේ රටේ බොහෝදෙනෙක් රෝහල්ගතව ප්‍රතිකාර ලබාගන්න බියක් දක්වනවා. එම අකමැත්ත සහ බිය නිසා කෙටි ක්‍රම මගින් කොහේ හෝ ස්ථානයක කඩයකින් බඩු ගන්නා මෙන්, සැලෝන් එකකින් ෆේෂල් එකක් දාගන්නාක් මෙන් මෙවැනි සැත්කම් කෙටි ක්‍රම මගින් සිදුකර ගැනීමට උත්සාහ දරනවා.
.gif)
Q මෙම දිනවල ග්ලූටොතයොන් නමැති ඖෂධයක් ජනප්‍රිය ලෙස Cosmetic Surgery වලට යොදාගන්නා බව දැකගත හැකියි. මෙය ඇත්තවශයෙන්ම සම පැහැපත්වීමට, තරුණ බව රැකගැනීමට භාවිතා කළ හැකි ඖෂධ වර්ගයක්ද?
ග්ලූටොතයොන් ඖෂධය තවම ලංකාවේ ලියාපදිංචි නොමැති ඖෂධයක්. ඒ වගේම එය ඇමරිකාවේ භාවිතයෙන් ඉවත් කළ ඖෂධයක්. ලෝකයේ Cosmetic Surgery බහුලව දැකගත හැකි රටක් තමයි ඇමරිකාව. සම පැහැපත් කරන හෝ තරුණ බව රැකගන්නා ඖෂධයක් ලෙසඇමරිකාවේ FDA (ආහාර හා ඖෂධ පාලක මණ්ඩලය) සංවිධානය අනුමැතිය මෙම ඖෂධයට ලැබී නැහැ.
ග්ලූටොතයොන් වෙන වෙන රෝගාබාධවලට භාවිත කරන ඖෂධයක්. මගේ දැනුම අනුව ලංකාවේ ආහාර ඖෂධ හා උපකරණ අධිකාරියේ ලියාපදිංචිය මෙම ඖෂධයට තවමත් ලැබී නැහැ. මෙම ඖෂධය විතරක් නොවෙයි ගුවන් විදුලිය, රූපවාහිනිය, නරඹා බලන්න දවසකට කෙතරම් නම් ඖෂධ වර්ග ප්‍රචාරය කරනවාද කියා. මේවා ස්වාභාවික ද්‍රව්‍ය අඩංගු ඖෂධ ලෙස නම් කරනු බොහෝවිට දැකගත හැකියි. අපි භාවිත කරන සියලුම වර්ගයේ ඖෂධ ස්වාභාවික ද්‍රව්‍ය අඩංගු ඒවා තමයි. නමුත් ඒවා ඖෂධ ලෙස නිස්සාරණය කර සකස් කළ පසු ස්වාභාවික ද්‍රව්‍ය සංඝටක නොවෙයි පවතින්නේ. එම සාන්ද්‍රණ නොවෙයි පවතින්නේ. ඒවායේ ඖෂධ වශයෙන් වෙනත් දෙයක් පවතින්නේ. උදහරණ ලෙස කොත්තමල්ලි ඇට තම්බා බීමෙන් ලැබෙන ප්‍රතිඵලත් කොත්තමල්ලි නිස්සාරණය කර ලබාගන්නා ඖෂධයකින් ලැබෙන ප්‍රතිඵල වෙනස් වෙනවා.
ඒ නිසා ස්වාභාවික දෑ අඩංගු යැයි පවසා ලබාගන්නා සියලුම ඖෂධ රජයේ ලියාපදිංචි විය යුතුයි. නමුත් එවැනි තත්ත්වයක් තිබෙනවාද යන්නයි ගැටලුව වී තිබෙන්නේ. අනෙක් අතට අපේ රටේ ප්‍රශ්නය වී තිබෙන්නේ සුදු වීම ලස්සන යැයි මතයක් ගොඩනගාගෙන තිබීමයි. ලස්සන යනු සුදු වීම නොවන බව සැමදෙනා වටහාගත යුතුයි. අපේ අම්මලා කළු ළමයාටත් සුදු පුතා කියලා ආමන්ත්‍රණය කරන්න පුරුදුවෙලා තියෙනවා. නමුත් සුදු ලස්සනට සමාන නෑ කියලා තේරුම් ගත යුතුයි.
Q වර්තමානයේ රැල්ලක් බවට පත්වී ඇති සම සුදු කිරීම හා ශරීරයේ අවයව වෙනස් කිරීම කුමන හෝ පුද්ගලයෙකුට සිදුකර ගැනීමට අවශ්‍යම නම් ඒ සඳහා රජයේ රෝහලක් වෙත යොමුවීමේ පහසුකමක් පවතීද?
රජයේ රෝහල්වල ප්ලාස්ටික් සැත්කම් සේවාව ඉතාම සීමා සහිතයි. මම සේවය කරන රාගම රෝහලේ පවා ප්ලාස්ටික් සැත්කම් සායනයේ මමත් ඇතුළුව සිටින්නේ වෛද්‍යවරුන් දෙදෙනෙකුත්, හෙදියන් දෙදෙනෙකුත් පමණයි. නමුත් අපිට විශාල රෝගීන් ප්‍රමාණයක් රූපලාවන්‍ය සැත්කම්වලින් හැර අනෙකුත් සැත්කම් සඳහා දෛනිකව සිටිනවා. ඒ නිසා රූපලාවන්‍ය සැත්කම් සිදුකිරීමට ඉඩක් වෙන්වන්නේ නැති තරම්.
නමුත් පියයුරු විශාල කාන්තාවක් ඒ නිසා ආබාධ වලට ලක්වී (කොන්දෙ කැක්කුම්, තනපටේ පටි වලට සිදුවන කැපීම්) අපහසුතාවලට ලක්වී ඇත්නම් රෝහලක් තුළදී පියයුරු කුඩා කිරීමේ සැත්කම් සිදුකිරීම් සිදුකළ හැකියි. ඒ වගේම පියයුරු විශාල පිරිමි පුද්ගලයකු පැමිණියේ නම් ඔහු සමාජීය වශයෙන් මුහුණ දෙන අපහසුතාවය බලා සැත්කමක් සිදු කිරීමට හැකියාවක් පවතිනවා. නමුත්, අපිට තිබෙන අනෙකුත් සැත්කම් නිසා මෙවැනි සැත්කම් සිදුකරනවා අඩුයි. එය ලංකාවේ පමණක් නොවෙයි පිටරටවල්වලත් පවතින තත්ත්වයක්.
Q මෙරට රූපලාවන්‍ය සැත්කම් සිදුකරන ආයතනවලින් සේවය ලබාගෙන එම ප්‍රතිකාර වැරදී රජයේ රෝහල්වෙත ප්‍රතිකාර සඳහා පැමිණෙන අයගේ සුලභම තත්ත්වයන් කවරේද?
එක එක තැන්වලට ගිහින් ශල්‍යකර්ම කරගෙන සංකූලතා මතු වී, වැරදි සැත්කම් සිදුකිරීම මගින් විශාල කැළල් මතුව සමමතුපිට විකෘතිතා ඇතිව එන රෝගීන් සිටිනවා. එම රෝගීන් කැමති නෑ මාධ්‍ය වෙත හෝ ප්‍රසිද්ධියේ මෙම තත්ත්වයන් නිරාවරණය කරන්න. අපේ සායනයටත්, නිරන්තරයෙන් රෝගීන් පැමිණෙනවා. අහවලාගෙන් ප්‍රතිකාර ලබාගත්තා, දැන් මම ගොඩක් කණගාටුවෙනවා එතනට ගියපු එක ගැන, මගේ සල්ලි අපරාදෙ නාස්ති වුණා, දැන් මට වෙලා තියෙන්නේ මානසික වශයෙනුත්, කායික වශයෙනුත් ඇතිවුණු පීඩාවක් දරාගෙන ඉන්නයි යනුවෙන් ඔවුන් පවසන්නේ.
Q ප්ලාස්ටික් සැත්කම් වලදී ජීවිත තර්ජනයක් මතුවෙනවාද?
බොහෝමත්ම කලාතුරකින් සිදුවිය හැකියි. ඕනෑම ශල්‍යකර්මයක ජීවිත අවදානමක් පවතිනවා. ඒ වගේම කොණ්ඩය කළු කරන්න පාවිච්චි කරන ඩයි වර්ග අසාත්මික වී මිනිසුන් මියගිය අවස්ථා පවා ඕනෑතරම් වාර්තා වෙනවා. ඒ නිසා ජීවිත අවදානම පවතින මෙවැනි සැත්කම් හා ප්‍රතිකාර වර්ග සිදුකර ගැනීමේදී හදිසි අවස්ථාවක ප්‍රතිකාර ලබාගත හැකි ආයතනයක් වෙත යාම අවශ්‍ය වෙනවා. ඒ වගේම ප්ලාස්ටික් සැත්කම් මාරාන්තිකයි කියා අනියත බියක් ඇතිකර ගැනීමත් නුවණට හුරු නැහැ.
.gif)
