සංචාරක දකුණු අප්‍රිකා කණ්ඩායම පරාජය කරමින් දෙරට අතර පැවැති සිවුවැනි එක්දින තරගයෙන් ලකුණු 3ක ජයක් වාර්තා කිරීමට ශ්‍රී ලංකා කණ්ඩායම සමත්විය.

පල්ලෙකැලේ පිටියේ පැවැති තරගයේ ජයග්‍රහණය සඳහා දකුණු අප්‍රිකාවට පන්දුවාර 21කදී ඩක්වර්ත් ලුවිස් න්‍යායට අනුව ලකුණු 191ක් රැස්කළ යුතුව තිබුණත් දකුණු අප්‍රිකාවට රැස්කළ හැකිවූයේ ලකුණු 187ක් පමණි.

සුරංග ලක්මාල් යොමුකළ අවසන් පන්දුවාරයට දකුණු අප්‍රිකාවට ලකුණු 8ක් ජයග්‍රහණය සඳහා අවශ්‍ය තිබුණ අතර එම පන්දුවාරයට සුරංග ලබාදුන්නේ ලකුණ 4ක් පමණි. එසේම ඔහු ප්‍රභල ක්‍රීඩක ඩේවිඩ් මිලර් දවා ගැනීමටත් සමත්විය. සුරංග ලක්මාල් ලකුණු 46ට කඩුලු 3ක් දවා ගැනීමට සමත්විය. ඊට අමතරව තිසර පෙරේරා කඩුලු දෙකක් දවාත්තේය.

තරගයේ මුලින්ම පන්දුවට පහරදුන් ශ්‍රී ලංකා කණ්ඩායම පන්දුවාර 39කදී ලකුණු 306ක් රැස්කිරීමට සමත්විය. මෙම ඉනිමේදී ශ්‍රී ලංකා පිතිකරුවන් කිහිප දෙනෙකුම ලකුණු අතරට පිවිසිමට සමත්විය. දික්වැල්ල 34, තරංග 36, කුසල් පෙරේරා 51, තිසර පෙරේරා 51* දසුන් ශානක 65 එසේ ලකුණු අතරට පිවිසි පිතිකරුවෝ වෙති.

දසුන් පන්දු 34කදී හයේ පහර පහක් හා හතරේ පහර හතරක් සමගින් සිය ලකුණු රැස්කිරීමට සමත්විය.එසේම තරගාවලියේදී දසුන්ට මේ දක්වා ලැබුණ එකම තරගයද මෙය විය.

කෙසේ වෙතත් තරග පහකින් සමන්විත එක්දින තරගාවලිය 3-1ක් ලෙස දැනටමත් දකුණු අප්‍රිකාව ජයගෙන තිබේ.

ඡායාරූප ශාන්ත රත්නායක