වතු කම්කරුවාගේ දෛනික වැටුප රුපියල් දහසක් බවට පත්කර ගැනීම සඳහා අද (23දා) රටපුරා පැවැත්වූ විරෝධතා ව්‍යාපාර පාගමන් හා තෝරාගත් වතුවල සිදුකළ වැඩ වර්ජනය අතිසාර්ථක බව ‘වතු කම්කරුවන්ට රුපියල් දහසක් දිනාදීමේ ව්‍යාපාරය’ සඳහන් කරයි.

ස්ථාන 27කදී විරෝධතා ව්‍යාපාර පැවැත්වූ බවත්, මේ නිසා වතු හාම්පුතුන් හා බලධාරීන් මෙම ක්‍රියාමාර්ග ගැන අවදානය යොමු කර වතු කම්කරුවාගේ දෛනික මූලික වැටුප රුපියල් දහසක් බවට පත්කළ යුතු බවත් එම ව්‍යාපාරයේ මාධ්‍ය සම්බන්ධීකාරක ධම්මික මුණසිංහ මහතා සඳහන් කළේය.

හෙට (24දා) ඒ පිළිබඳව අවසන් තීරණයක් ප්‍රකාශයට පත් නොකළහොත් ‘දාහේ ව්‍යාපාරය’ නියෝජනය කරන වෘත්තීය සමිති 30ක් එක්වී ඉදිරියට සිදුකරන වෘත්තීය ක්‍රියාමාර්ග පිළිබඳ තීරණය කරන බවද හෙතෙම පවසා සිටියේය.

වතු කම්කරුවන්ගේ දෛනික මූලික වැටුප රුපියල් දහසක් බවට පත්කරන ලෙස ඉල්ලා ඊයේ (22දා) කොළඹදී විරෝධතා පෙළපාළියක් හා රැළියක් පැවැත්වුණු අතර, එහිදී ගෑස්පහ හන්දියෙන් ආරම්භ කළ විරෝධතා පෙළපාළිය වරාය ඉදිරිපිටින් මල්වත්ත පාර හරහා පිටකොටුව බෝගස අසල දක්වා ගමන් කළේය. අනතුරුව එම ස්ථානයේ සිට විරෝධතා ව්‍යාපාරය පවත්වනු ලැබිණි.

ඡායාරූප -ඉසුරු පෙරේරා