රුහුණු මහා කතරගම දේවාලයේ ඇසළ මංගල්‍යයේ 10 වැනි පෙරහර පෙරේදා (22දා) රාති‍්‍රයේ උත්කර්ෂවත් අයුරින් වීථි සංචාරය කෙරිණි.

ඒ අනුව රාත්‍රී 7.15ට යෙදුණු සුබ නැකැතින් ඇසළ මංගල්‍යය දෙවියන් වැඩමවා ගෙන දේවාල භූමියෙන් පිටත්වූ පෙරහර ප්‍රධාන වාහල්කඩ දොරටුවෙන් ගමන්කර, පිටවීදිය ඔස්සේ වල්ලි අම්මා දේවාලය වෙත ගමන්ගෙන දුටුගැමුණු රජු විසින් නියෝග කරන ලද රජ අණ අනුව චාරිත්‍ර ඉටු කිරීමෙන් පසු පෙරහර නැවත මහා වීදිය ඔස්සේ මහා දේවාලය වෙත ගමන්කර පෙරහර මංගල්‍යය අවසන් කෙරිණි.

පසුගිය 13 වැනිදා ආරම්භ වූ කතරගම ඇසළ පෙරහරේ 10 වැනි දිනය වූ පෙරේදා (22දා) පෙරහර නැරඹීමට විශාල බැතිමතුන් පිරිසක් පැමිණ සිටි අතර, පෙරහරට සමගාමීව පවත්වනු ලබන ගිනි පෑගීමේ උළෙල අද (24දා) දින රාත්‍රියේ ආරම්භ වී හෙට (25දා) උදෑසන 4.00ට අවසන් කෙරෙන බව කතරගම දේවාලයේ බස්නායක නිලමේ දිල්රුවන් රාජපක්‍ෂ මහතා පැවසීය.

කතරගම ඇසළ මංගල්‍යය ලබන 27 වැනිදා දක්වා පවත්වා 28 වැනිදා උදෑසන මැණික් ග‍ඟේ ජීවමාලි තොටුපොළේදී දිය කැපීමේ මංගල්‍යයෙන් නිමාවට පත්වේ.

මෙවර ගිනි පෑගීමේ උළෙල සංවිධානය කිරීමේ භාරකරු ලෙස  ගිනිමැල තර්ණය කිරීමේ සහතික ලත් ටී. උපාලි ද සොයිසා මහතා පත්කර ඇත.

කතරගම දේවාලයේ ඇසළ මංගල්‍යයේ 12 වැනි පෙරහර අද (24දා) දින වීථි සංචාරය කිරීමට නියමිතය.

කතරගම - සන්දිම දේවප්‍රිය