වත්මන් ආණ්ඩුව බලයට පත්කිරීමට දායක වූ හැටදෙලක්‍ෂයකගේ ජනතා පැතුම්වලට ඇහුම්කන් දීමට ආණ්ඩුවට සිදුවන බව සාධාරණ සමාජයක් සංවිධානයේ සාමාජික පූජ්‍ය දබර අමිල හිමියෝ සඳහන් කළහ.
හැටදෙලක්‍ෂයේ ජනතා සම්මුතිය රැකගැනීමේ ව්‍යාපාරය අද විහාරමහාදේවී උද්‍යානයේ පැවැති ජනතා සත්‍යග්‍රහයට එක්වෙමින් අමිල හිමියෝ මේ බව පැවසූහ.
වත්මන් රජය බලයට පත්ව වසර දෙකක් සපිරුණුද, රජය බලයට පත්වන අවස්ථාවේ දුන් පොරොන්දු ඉටුකරන ලෙස රජයට බලකරමින් මෙම සත්‍යග්‍රහය සංවිධානය කර තිබිණි.
පසුගිය ආණ්ඩු සමයේ සිදුවූ වංචා, දූෂණ විමර්ශනය කර දඬුවම් ලබාදීම ජනතා අභිලාෂය බවත්, එය සිදුකිරීමට වත්මන් ආණ්ඩුව මෙතෙක් අපොහොසත් වී ඇති බවත් අමිල හිමියෝ ප්‍රකාශ කළහ.
වසර දෙකක් ගතවීමෙන් පසු හෝ ජනතා හඬට ඇහුම්කන් දීමට ආණ්ඩුවට සිදුවනු ඇති බවද උන්වහන්සේ සඳහන් කළහ.
සමාජ සංවිධාන, දේශපාලන කණ්ඩායම්, වෘත්තීය සමිති, කලාකරුවන්, වෘත්තිකයන් ආදී විවිධ පිරිස් මේ අවස්ථාවට සහභාගි වූහ.
ඡයාරූප - ඉසුරු පෙරේරා
