ශිෂ්‍ය ව්‍යාපාරය මර්දනය කර සයිටම් නීතිගත කිරීමට ආණ්ඩුව උත්සාහ කරමින් සිටින බව අන්තර් විශ්වවිද්‍යාලයීය භික්ෂු බලමණ්ඩලය සඳහන් කරයි.
ආණ්ඩුවේ මර්දනයට, සිරගත කිරීම්වලට හෝ තුවක්කුවලට බියෙන් ශිෂ්‍ය ව්‍යාපාරයේ සටන් නවතා නොදමන බවත්, සයිටම් අහෝසි කර නිදහස් අධ්‍යාපනය හා නිදහස් සෞඛ්‍ය රැක ගන්නා තෙක් සටන් ක්‍රියාමාර්ග දියත් කරන බවත් එම සංගමයේ වැඩ බලන කැඳවුම්කරු රත්කරව්වේ ජිනරතන හිමියෝ අවධාරණය කළහ.
සයිටම් අහෝසි කරන ලෙස ඉල්ලා අද (21දා) කොටුව දුම්රියපළ ඉදිරිපිට පැවැති විරෝධතා රැලියට සහභාගි වෙමින් උන්වහන්සේ මේ බව සඳහන් කළේය.
සයිටම් අහෝසි කරන ලෙස සහ දැනට ගැසට් කර තිබෙන වෛද්‍ය අධ්‍යාපනයේ අවම ප්‍රමිතිය පිළිබඳ ගැසට් නිවේදනය අහෝසි කරන ලෙස ඉල්ලා මෙම රැලිය පැවැත්වූ අතර, මේ සඳහා වෛද්‍ය පීඨ විශ්වවිද්‍යාල ශිෂ්‍යයෝ සහා වෘත්තීය සමිති නියෝජිතයෝ විශාල පිරිසක් සහභාගි වූහ.
ඡායාරූප ඒෂාන් ප්‍රනාන්දු
