ශ්‍රී ලංකාවේ 70 වැනි නිදහස් දින සමරු උත්සවය ලන්ඩනයේ ශ්‍රී ලංකා මහකොමසාරිස් කාර්යාලයේදී අතිඋත්කර්ෂවත් ලෙස පැවතෙද්දී එම ස්ථානයට පැමිණි එල්.ටී.ටී.ඊ. හිතවාදී දෙමළ ජනතාව සටන් පාඨ කියමින් කලහකාරී ලෙස හැසිරෙමින් උද්ඝෝෂණයක් කළහ.
මහකොමසාරිස් කාර්යාලය අවට දැඩි පොලිස් රැකවල් දමා තිබුණද, නිදහස් උත්සවයට පැමිණි ශ්‍රී ලාංකිකයන් සමග ආවේගශීලීව ගැටුම් ඇතිකර ගැනීමට උත්සාහ කිරීමත් සමගම ලංඩන් මෙට්‍රොපොලිටන් පොලීසියට තත්ත්වය පාලනය කරගත නොහැකි විය.
වහාම කැරලි මර්දන පොලිස් නිලධාරීන් කැඳවූ ඔවුහු සිද්ධිය ගුවනේ සිට අධීක්ෂණය කිරීමට පොලිස් හෙලිකොප්ටර් යානා දෙකක්ද යෙදවීමට කටයුතු කළහ.
දෙමළ ඊළාම් රාජ්‍ය දිනා ගන්න තුරු සටන අත්නොහරින අතර, ශ්‍රී ලංකා රජය හා හමුදාව යුද අපරාධ සිදු කළ බවත්, රජය සහ හමුදාව තවමත් දෙමළ ජනතාව සමූල ඝාතනය කරමින් සිටින අතර, ජනාධිපතිවරයා යුද අපරාධකරුවෙකු බවත්, ඔවුන්ගේ එකම නායකයා ප්‍රභාකරන් බවත් ප්‍රධාන සටන් පාඨ ලෙස සටහන් කරමින් තිබිණි.
තවද රඳවාගෙන සිටින ද්‍රවිධ දේශපාලන සිරකරුවන් වහාම නිදහස් කරන ලෙසද ඔවුන් දැඩිව ප්‍රකාශ කළේය.කෙසේ වෙතත් උදෑසන 10.30ට පමණ නිදහස් සැමරුම් උත්සවය ආරම්භ කෙරිණි.
සියලු ජනවර්ග නියෝජනය කරමින් විශාල ශ්‍රී ලාංකිකයෝ පිරිසක් මෙන්ම සැලකිය යුතු බ්‍රිතාන්‍යය ජාතිකයෝද පිරිසක්ද මේ අවස්ථාවට එක්ව සිටියහ.
