ගිනිගත්හේන පේරගොල්ල ප‍්‍රදේශයේ හැටන් - කොළඹ ප‍්‍රධාන මාර්ගය අබියස දෙමහල් ගොඩනැගිල්ලක් සහිත වෙළෙඳසැලක් ගිලා බැසීම හේතුවෙන් එම දෙමහල් ගොඩනැගිල්ලට පහළින් වූ නිවාස දෙකක පදිංචි පවුල් හයක් එම ස්ථානයෙන් ඉවත් කළ බව ගිනිගත්හේන ප‍්‍රාදේශීය ලේකම් ආර්.ටී.පී. සුමනසේකර මහතා සඳහන් කළේය.
ඒ අනුව ඊයේ (06දා) පස්වරු 05.00ට පමණ මෙම ගිලා බැසිම පටන් ගත් බවත් අද (07දා) අලුයම වනවිට ගිලා බැසිම ක‍්‍රමයෙන් වර්ධනය වෙමින් පවතින බවත් ප‍්‍රාදේශීය ලේකම්වරයා පවසා සිටියේය.
මෙම ගිලා බැසිම හේතුවෙන් ප‍්‍රධාන මාර්ගයේ කොටසක්ද ගිලා බැසීමේ අවදානමක් පවතින නිසා එම ගිලා බසින ස්ථානයේ රථ වාහන ගමනාගමනය එක් මංතිරුවකට පමණක් සීමා කර ඇත.
මහවැලි ගඟේ ප‍්‍රධාන අතු ශාඛාවක් වන හැටන් ඔයට ඉහළින් මෙම ගිලා බැසිම ආරම්භ වි තිබෙන අතර ගිලා බසින දෙමහල් ගොඩනැගිල්ල අවහන් හලක් සේ පවත්වාගෙන ගොස් ඇත.
මේ ගිලා බැසීම හේතුවෙන් ඊට පහළින් වු නිවාසවල පදිංචිකරුවන් මෙම අවදානම් තත්ත්වය පහව යන තෙක් එම ස්ථානයෙන් ඉවත්වන ලෙස උපදෙස් ලබාදුන් බවත් මේ සම්බන්ධයෙන් ජාතික ගොඩනැගිලි පර්යේෂණ ආයතනය වෙත දැනුම් දීමක්ද සිදුකරන ලද බවද ප‍්‍රාදේශීය ලේකම්වරයා පැවසීය.
මීට අමතරව එම ස්ථානයේ ප‍්‍රධාන මාර්ගයේ රථ වාහන ගමනාගමනය පාලනය කිරීම සඳහා දිවා රාති‍්‍ර දෙකෙහිම රාජකාරිය සඳහා ගිනිගත්හේන පොලිස් නිලධාරීන් අනුයුක්ත කර තිබේ.
ජායාරූප - හැටන් රංජිත් රාජපක්ෂ
