බ්‍රිතාන්‍යයේ ත්‍රස්ත සංවිධානයක් ලෙස එල්.ටී.ටී.ඊ. සංවිධානය තහනමට ලක්ව තිබුණද, එම සංවිධානයට බ්‍රිතාන්‍යයේදී අනෙකුත් තහනම් සංවිධානවලට වඩා වැඩි නිදහසක් ලැබෙන බවත්, එල්.ටී.ටී.ඊ. සංවිධානය බ්‍රිතාන්‍යයේ සිදු කරන කටයුතු නීතිවිරෝධී බවත් පවසමින් 'බ්‍රිතාන්‍යයේ දේශප්‍රේමී ශ්‍රී ලාංකිකයෝ' යන තේමාව යටතේ බ්‍රිතාන්‍යයේ සිංහල සංවිධාන එකමුතුවෙන් සංවිධානය කළ විරෝධතාවක් ඊයේ (24දා) ප.ව. 2.00 සිට ප.ව.5.00 දක්වා ලන්ඩන් නුවර ඩවුනින් වීදියේ බ්‍රිතාන්‍ය අගමැතිවරියගේ නිල නිවස ඉදිරියේදී පැවැත්විණි.

මේ සඳහා ඉතා ඉහළ ජන සහභාගිත්වයක් ලැබුණු අතර, එල්.ටී.ටී.ඊ. සංවිධානය බ්‍රිතාන්‍යයේ දේශපාලඥයන්ට උදවු කරමින් වැඩි වාසි ලබා ගන්නා බවත් විරෝධතාකරුවෝ මෙහිදී චෝදනා කළහ.

එමෙන්ම සිංහල රණවිරුවන්ට යුද අපරාධ චෝදනා එල්ල කරන්නේ නම්, මේ වන විට ලන්ඩනයේ රැඳී සිටින එල්.ටී.ටී.ඊ. ළමා සොල්දාදුවන් බිහි කිරීමට මූලික වූ ඇන්ටන් බාලසිංහම්ගේ බිරිඳ ඇඩෙලා බාලසිංහම්ට විරුද්ධව කටයුතු නොකරන්නේ මන්දැයි ඔවුහු විමසා සිටියහ.

එල්.ටී.ටී.ඊ. කොඩි රැගත් කිහිපදෙනෙකු මෙම විරෝධතාවට බාධා කිරීමට උත්සාහ කළද, පොලීසිය මැදිහත්ව ඔවුන්ව වළක්වන අයුරුද දැකගත හැකි විය. 

ජනක අලහප්පෙරුම - ලන්ඩනයේ සිට