මොරටුව විශ්වවිද්‍යාලයෙන් විලාසිතා නිර්මාණකරණය හා නිපැයුම් ප්‍රවර්ධනය උපාධිය හැදෑරූ තරුණියෝ දෙදෙනෙක් පැවිදි බිමට පිවිස සිටිති. මහරගම ධම්මතුසිතා මෙහෙණින් වහන්සේ නමින් හා අතුරිගිරියේ ධම්ම සුඛිතා මෙහෙණින් වහන්සේ නමින් ඔවුහු පැවිදි බිමට ඇතුළත්ව සිටිති.
බද්දේගම ගිණිමැල්ලගහ ආලෝකෝ උදපාදි සිල්මාතා භාවනා ආරාමයේදී මෙම මෙහෙණින් වහන්සේලා දෙනම පසුගියදා අපට මුණගැසුණි.
මෙම මෙහෙණින් වහන්සේලා දෙනම සමග මෙහෙණින් වහන්සේලා හයනමක් භාවනානුයෝගීව ආලෝකෝ උදපාදි ආරාමයේ වැඩ වසති. මහරගම ධම්ම තුසිතා මෙහෙණින් වහන්සේ ගිහි කල ස්වාමිපුරුෂයාද පැවිදි දිවියට පත්ව සිටියි. උන්වහන්සේද ගිහි කල මොරටුව විශ්වවිද්‍යාලයේ විලාසිතා නිර්මාණකරණය හා නිපැයුම් ප්‍රවර්ධනය පිළිබඳ උපාධිධාරියෙකි.
මේ තිදෙනාම ගිහි කල මෙරට ප්‍රධාන පෙළේ ඇඟලුම් කම්හලක සේවයේ නිරතව සිට තිබේ. රැකියාවේ නියුතු අවධියේදී බණ ඇසිමට යොමු වී ධර්ම මාර්ගය ගැන පැහැදීමෙන් පසුව පැවිදි දිවියට ඇතුළත්ව සිටිති.
''අපි දෙන්න කතා කරගෙන තමයි මහණ වෙන්න තීන්දු කළේ. ගිහි කාලයේ මගේ සැමියා මට කලින් මහණ වුණා. ඔහු මහණ වුණේ මගේ මහණ පිංකමට අවශ්‍ය සියලුදේවල් සකස් කරලයි. උන්වහන්සේගේ මහණ පිංකමට මමත් සහභාගි වුණා. ඒ වේලාවේ මට හිතුණේ අනේ සාදු කියලා. අපි කොහෙද මේ ඉන්නේ අපිට මොනවා දාලා යන්න බැරිවද ඉන්නේ කියලා හිතුණා. ඇත්තටම අත්හරින්න බැරි දෙයක් නැහැ. මගේ මහණ පිංකමට උන්වහන්සේත් සහභාගි වුණා. තලගුනේ මෙත්තා ධම්මශීලි මෙහෙණින් වහන්සේ තමයි මාව මහණ කළේ.
.jpg)
මේ වනවිට මොරටුව විශ්වවිද්‍යාලයේ උපාධිය ලැබු හයදෙනෙක් පැවිදි වෙලා ඉන්නවා. ඒ අය අතර වෛද්‍යවරු, ඉංජිනේරුවන්ද ඉන්නවා.'' යැයි මහරගම ධම්මතුසිතා මෙහෙණින් වහන්සේ පවසා සිටියහ. ධම්ම තුසිතා මෙහෙණින් වහන්සේ තිස් එක් හැවිරිදි වියේ පසුවෙයි.
අතුරිගිරියේ ධම්ම සුඛිතා මෙහෙණින් වහන්සේ ගිහි කල සිප් සතර හදාරා ඇත්තේ කොළඹ මියුසියස් විද්‍යාලයෙනි. උසස් පෙළ සමත්වීමෙන් පසු මොරටුව විශ්වවිද්‍යාලයට ඇතුළත් වී උපාධිය ලබාගෙන ඇත.
''මගේ තාත්තා ඉංජිනේරුවරයෙක්. අම්මා විධායක නිලධාරිනියක්. බුදුපියාණන් වහන්සේගේ ධර්මය අවබෝධ කරගත්තු විට ඕනෑම දෙයක් අත්හරින්න පුළුවන්. ඉන්පසු මහණ වෙන්න තීන්දු කළා. මෙහෙණින් වහන්සේලාට වනගතව ආරණ්‍යගතව භාවනා කටයුතු කරන්න බැහැ. ආරක්ෂක තැනක ඉන්න ඕන කර්කෂක නාගරික පරිසරයෙන් මිදී භාවනා කරන්න පුළුවන් ස්ථානයක් තනා දෙන්න මාලනි දොඩංගොඩ යුවළගේ අරමුණක් තිබුණා.
එය අපගේත් අවශ්‍යතාවක්. ත්‍රිපිටකට හදාරමින් භාවනා කටයුතු කරන්න ගිහි පිරිසට අප හදාරන දේවල්වලින් මගපෙන්වීමක් කරන්න කොහොමද ධර්ම මාර්ගයේ යන්නේ ජීවිතය කොහොමද ධර්ම මාර්ගය අනුව හැඩ ගස්වා ගන්නේ. බුදුරජාණන් වහන්සේ දේශනා කළ ධර්මය අපට තියෙන්නේ පොත්වල තබාගන්න නෙවෙයි ඒවා කියලා දෙන්නයි.
මේ සඳහා මෙම ආරාමයේ වැඩසටහන් කිහිපයක් පවත්වනවා. සතියේ දිනවල අපි භාවනානුයෝගීව මෙම ස්ථානයේ වැඩ ඉන්නවා. ධර්ම දේශනා හා කර්මස්ථාන භාවනා සිදුකරනවා'' යැයි අතුරිගිරියේ ධම්ම සුඛිතා මෙහෙණින් වහන්සේ පැවසූහ.
හිටපු අමාත්‍යවරයකු වූ අමරසිරි දොඩංගොඩ මහතාගේ නැගණියක වන මාලනි දොඩංගොඩ මහත්මිය විසින් තමන් සතු නිවස මෙම ආරාමයට පරිත්‍යාග කර ඇත.
