ශ්‍රී ලංකා කණ්ඩායමේ අත්දැකීම් සහිත තුන් ඉරියව් ක්‍රීඩක ඇන්ජලෝ මැතිව්ස්ට නැවත කණ්ඩායමට පැමිණීමට තමන් ආරාධනා නොකළ බවත්, ඔහු ක්‍රීඩාවෙන් සමුගත් ක්‍රීඩකයකු නොවන බවත් වනිදු හසරංග පැවසීය. එමෙන්ම ඔහුගේ පිතිකරණය පළමු විස්සයි20 තරගය ජය ගැනීමට ඉතා වැදගත් වූ බව ද ඔහු මෙහිදී පැවසීය.
මෑතක දී ශ්‍රී ලංකා කණ්ඩායමෙන් විශ්‍රාම ගත් ක්‍රීඩකයන් කිහිප දෙනෙකුට නැවත ආරාධනා කිරීමට සූදානමක් ඇත්දැයි මාධ්‍යවේදියෙකු ඇසූ පැනයකට පිළිතුරු දෙමින් ඔහු මේ බව පැවසීය. ඒ ඊයේ (15දා) කොළඹ දී පැවති මාධ්‍ය හමුවකදීය.
' මැතිව්ස් කියන්නේ රිටයර් වෙච්ච ක්‍රීඩකයෙක් නෙමෙයි. අපි දැක්ක පහුගිය තරගයේදී ඔහුගේ අත්දැකීම් කොච්චර වැදගත් උනාද කියලා. ඉරියේදී පැවැත්වෙන විස්සයි20 ලෝක කුසලානයේදීත් මේ වගේ අත්දැකීම් සහිත ක්‍රීඩකයෙක් තමයි අපිට වැදගත් වෙන්නේ.
සමුගත්ත ක්‍රීඩකයෙක් කණ්ඩායමට නැවත කැඳෙව්වත් ඔහු එතරම් හොඳින් කණ්ඩායමේ ක්‍රීඩා කරයි කියලා මම හිතන්නෙ නෑ. මැතිව්ස් කියන්නේ ටෙස්ට්, එක් දින හා විස්සයි 20 අංශ තුනම තවමත් ක්‍රීඩා කරන ක්‍රීඩකයෙක්. ඔහු එල්.පී.එල්. ක්‍රිකට් තරගාවලියේදීත් හොඳින් දක්ෂතා දැක්වූවා."
