මේෂ, වෘෂභ, මිථුන, කන්‍යා, වෘශ්චික, ධනු, මකර,
කුම්භ, මීන වැනි ලග්න හිමියන්ට මේ සතියේ ධනය දේපළ ඉපැයීම් මාර්ග මෙන්ම උරුම හිමිකම් අයිතිවාසිකම් හා කිසියම් ලාභ ප්‍රයෝජනාදියක් හිමිවීමේ භාග්‍යයන් උදාවන අතරම, තම ජීවනෝපාය මාර්ගයන් රැකියා ව්‍යාපාර සමගම තම දෛනික ජීවන ගමනේ බොහෝ අත්‍යාවශ්‍ය කාර්යන්හී ප්‍රගතියක්, සාර්ථකත්වයක් ස්ථාවරභාවයක් සතිය පුරා ගෙනදෙන, ගොඩනගන ශුභඵලදායී සතියකි.
එබැවින් මෙවැනි ලග්නයකින් උපන් ඔබට පසුගිය දිනවල අතපසු වූ වැඩ කරගන්නට හැකිවන සතියකි. සමාජ සේවා හා ආගමික කටයුතුවලට කාලය වැඩි වශයෙන් යොමු වේ. තනතුරු ලාභ මෙන්ම රාජකාරියේ වගකීම්ද බහුල වීමටත් අවස්ථාව සැලසේ. රැකියා හා අධ්‍යාපනික කටයුතුවල නව මුහුණුවරක් ඇති වේ. මිල මුදල් උපයා ගැනීමේ උනන්දුව වැඩි වේ. ගමන් බිමන්වලින් වුව වාසි සැලසේ. ඔබට සතුට සැනසුම සතිය පුරා ඇති කරයි. ඉදිරිපත් වන කටයුතුවලින් ජයග්‍රහණ අත් වේ. අතපසු වෙමින් පැවැති වැදගත් කාර්යයක් ඉටුකර ගැනීමට විශේෂ පුද්ගලයකුගේ උදව් ලැබේ. පෙම් කරන්නන්ගේ සිතුම් පැතුම් සඵල වන සතියක් ද වේ. එසේම මෙය ඔබට යම් යම් ලාභ ප්‍රයෝජන ලැබෙන සතියක් ද වේ.
මෙහිදී ඔබට වාසිදායක ගමන් බිමන් බහුල වන අතර, වන්දනා හෝ විනෝද සංචාරක ගමන්වල පවා යෙදීමටත් අවස්ථාව සැලසේ. අලුත් හිතමිතුරු සබඳතා ගොඩනැගෙනවා මෙන්ම එමගින් යම් යම් වාසි ප්‍රයෝජනයන්ද ලැබෙනු ඇත. අතමිට සරු වෙයි. සිතට ගතට සුවයක් දැනෙන ප්‍රබෝධමත් සතියකි. සැලසුම් සාර්ථක වේ. පොදුවේ මෙය ප්‍රමාද වෙමින් පැවැති කටයුතු කිහිපයක් ඉටුකර ගැනීමට අවස්ථාව සැලසෙයි.
සිංහ, තුලා, මකර වැනි ලග්න හිමියන්ට මේ සතිය තම අධ්‍යාපන කටයුතු දැනුම කුසලතාවට සම්බන්ධ සියලු කාර්යයන් මෙන්ම ඊට සම්බන්ධ අරමුණු සැලසුම්, ගමන් බිමන්වලට අදාළ කාර්යන් මෙන්ම තම දෛනික ජීවන ගමනේ බොහෝ අත්‍යාවශ්‍ය කාර්යන්ට අවහිර බාධා ප්‍රමාදවීම් ඇති කිරීමට හේතු ගෙනෙන සතියකි.
එබැවින් මෙවැනි ලග්නයකින් උපන් ඔබට මෙම සතිය තුළ තම අධ්‍යාපන කටයුතුවලට පවුලේ අයගෙන් ලැබෙන සහයෝගය, උදව් උපකාර තරමක් දුරට අඩු වීමට ඉඩ තිබේ. එනමුදු උත්සාහය අත්නොහරින්න. පොතපත හා විෂය දැනුම දියුණු කර ගැනීමට වැඩි උනන්දුවක් නොදක්වයි. උදාසීනභාවයෙන් මිදෙන්න. දෛනික අධ්‍යාපන කටයුතු ඉටුකර ගැනීමට වැඩි වෙහෙසක් දැරීමට සිදුවේ. විරුද්ධවාදීන් හෝ අකමැති පිරිසක් සමග හෝ එකට එක්වී කටයුතු කිරීමට සිදුවීමෙන් සිතට කලකිරීමක්ද ඇති වේ. නින්දට බාධා හෝ නින්ද නොයාමටද ඉඩ ඇත. සුබ ඵල හීන සතියකි. සටකපට ප්‍රයෝගකාරී ක්‍රියාවලට මැදි වීමෙන් තම තත්ත්වයට හානිදායක වන කරදරවලට වුව ලක්වීමට ඉඩ ඇති නිසා ඥානාන්විතව කටයුතු කරන්න. ඊට නතු නොවන්න.
තවද මේෂ, කටක, සිංහ, තුලා, වෘශ්චික, මකර ලග්නයෙන් උපන් ඔබට මේ සතියේ ආදර සබඳතා හා යුගදිවියේ මෙන්ම ගෘහජීවිතයේ කාර්යයන්ට අදාළව යම් යම් ප්‍රශ්නකාරී ගැටලුකාරී ස්වභාවයන් මතුවන, පැනනගින සතියකි.
එබැවින් මෙම ලග්නයකින් උපන් ඔබට මෙම සතිය තුළ යුගදිවියේ අසමගිකම් ඇති වීමට ඉඩ තිබේ. පෙම් සබඳකම් වැනි ප්‍රශ්න වලදීද ඉතාම සැලකිලිමත් වන්න. යම් යම් අයගේ මැදිහත් වීම මත මේවායේ අනවශ්‍ය අවුල්ද හට ගනී. කුමන අයුරින් හෝ යුගදිවියේ හා ප්‍රේම දිවියේ කටයුතුවලදී අර්බුදකාරී තත්ත්වයන් හට ගනී. අවස්ථාවාදීන්ගේ හා ප්‍රයෝගකාරීන්ගේ කූට උපක්‍රමවලට හසුවීමෙන් වැරදි ක්‍රියාවන්ටද පෙලඹේ. මේ කෙරේ ඥානාන්විත වන්න. ඊට නතු නොවන්න. තමාගේ මුදල් අපේක්‍ෂවන්ට පරිදි අවශ්‍යතාවන් පිරිමැසීමට සරිලන පරිදි නොලැබේ. නොසැලකිලිමත්කම නිසා ආදායම් මාර්ගයන්හී අවුල්සහගත ගති ඇති කරයි. වියදමට සරිලන ලෙසට මිල මුදල් නොලැබේ. මුදල් වියදම් නොකොට පැහැර හැරිය නොහැකි වැඩ ඔබ වෙත පැවරෙනු ඇත.
බෙන්තොට - හේමන්ත.
www.hirumadala.lk අපගේ වෙබ් පිටුවෙන්
ඔබගේ ජ්‍යෝතිෂ අවශ්‍යතා රැසක් සපුරනු ලැබේ.
