ශ්‍රී ලංකාවේ සුරක්ෂිතතාව, ස්වෛරීභාවය, ස්ථාවරභාවය හා ඒකීයභාවය ආරක්ෂා කර ගැනීමට නම් දැනට පවතින ආණ්ඩුක්‍රම ව්‍යවස්ථාවේ යම් වෙනස්කම් සිදුවිය යුතුම යැයි අටවැනි පාර්ලිමේන්තුවේ සිවුවැනි සභාවාරය විවෘත කරමින් ජනාධිපති ගෝඨාභය රාජපක්ෂ මහතා අවධාරණය කළේය. සෞභාග්‍යයේ දැක්ම නම් වූ සිය ප්‍රතිපත්ති ප්‍රකාශනය සභාගත කරමින් ජනාධිපතිවරයා පාර්ලිමේන්තුවේදී පසුගියදා (03දා) සිදුකළ කතාව පහතින් දැක්වේ.
ගරු කථානායකතුමනි
ගරු අගමැතිතුමනි
ගරු විපක්ෂනායකතුමනි
ගරු ඇමතිවරුනි, ගරු රාජ්‍ය ඇමතිවරුනි
ගරු මන්ත්‍රීවරුනි
ශ්‍රී ලංකා ප්‍රජාතාන්ත්‍රික සමාජවාදී ජනරජයේ රාජ්‍ය නායකයා ලෙස ඔබ ඇමතීමේ අවස්ථාව මට ලැබී තිබෙන්නේ නොවැම්බර් 16දා මේ රටේ ජනතාව ලබාදුන් ඵෙතිහාසික ජයග්‍රහණය නිසයි.
සාමකාමී හා සාධාරණ මැතිවරණයක් වෙනුවෙන් කැප වූ සියලුම පුරවැසියන්ටත්, ආයතනවලටත්, සියලුම දේශපාලන පක්ෂවලටත් මා මේ අවස්ථාවේ මගේ කෘතවේදීත්වය ප්‍රකාශ කරනවා.
මේ උත්තරීතර සභාවේ අසුන්ගෙන සිටින ඔබ කුමන පක්ෂයකට අයිති වුණත් අප සියලු දෙනාගේම මූලික වගකීම වන්නේ මේ රටේ ජනතාවගේ සුබසෙත වෙනුවෙන් ක්‍රියා කිරීමයි.
මා සාටකය අඳින්නේ නැති වුවත් නියෝජනය කරන්නේ පීඩිත ජනතාව වෙනුවෙන් කැප වූ ඒ ගැඹුරු දර්ශනයයි.
මා වසර විස්සක් මේ රටේ හමුදා නිලධාරියෙකු ලෙසත්, වසර 10කට ආසන්න කාලයක් මේ රටේ ආරක්ෂක ලේකම්වරයා වශයෙනුත් සේවය කළා. මා ක්‍රියාකාරී දේශපාලනයේ යෙදුනේ නැති වුණත් ජනතා සේවය කුමක්ද යන්න මා කුඩා කාලයේ සිටම අත්දැක තිබෙනවා.
මගේ පියාගේ වැඩිමහල් සොහොයුරා, ඩී.එම්. රාජපක්ෂ මැතිතුමා තමන්ගේ දේශපාලන ගමන ආරම්භ කළේ 1936දී රාජ්‍ය මන්ත්‍රණ සභාවේ හම්බන්තොට ආසනය නියෝජනය කරමින්. 1945දී සිදු වූ ඔහුගේ අභාවයෙන් පසු හම්බන්තොට ජනතාව මගේ පියා, ඩී.ඒ. රාජපක්ෂ මැතිතුමාව රාජ්‍ය මන්ත්‍රණ සභාවට තෝරා ගත්තා. ඉන්පසු ඔහු ලංකාවේ පළමුවැනි පාර්ලිමේන්තුවටත්, මහජන ඡන්දයෙන් තේරී පත්වුණා.
එතැන් පටන් මේ වනතුරු රුහුණේ ගිරුවාපත්තුවේ පිටිසර ගම්මානයක් වූ මැදමුලන මූලාශ්‍ර කරගත් පරම්පරා තුනක රාජපක්ෂවරු ඡන්දයෙන් පත්වූ මහජන නියෝජිතයන් ලෙස සේවය කොට තිබෙනවා. මේ කාලය තුළ මන්ත්‍රීවරු, නියෝජ්‍ය ඇමතිවරු, කැබිනට් ඇමතිවරු, නියෝජ්‍ය කථානායකවරයෙක්, කථානායකවරයෙක්, විරුද්ධ පක්ෂ නායකයෙක්, අගමැතිවරයෙක් පමණක් නොවෙයි ජනාධිපතිවරු දෙදෙනෙක්ම අප ගැන විශ්වාසය තැබූ මේ රටේ පොදු මහජනතාව විසින් තෝරා පත්කරගෙන තිබෙනවා.
එදා රුහුණේ සිංහයා වශයෙන් හැඳින්වුණු ඩී.එම්. රාජපක්ෂ මැතිතුමා පාර්ලිමේන්තුවට පැමිණි මුල් දිනයේ සිටම කුරහන් පැහැය ඇති සාටකයක් පැලඳ සිටියා. එම සාටකයෙන් එතුමා සංකේතවත් කළේ ගිරුවාපත්තුවේ කුරක්කන් ගොවියන්වයි. ඩී.එම්. රාජපක්ෂ මැතිතුමාගෙන් පසු මගේ පියා ඩී.ඒ. රාජපක්ෂ මැතිතුමාත්, එතුමාගෙන් පසු පාර්ලිමේන්තුව නියෝජනය කළ රාජපක්ෂ පවුලේ අනෙකුත් සාමාජිකයන් සියලු දෙනාමත් මේ කුරහන් පාට සාටකය පැලඳ සිටියා. මා ඒ සාටකය අඳින්නේ නැති වුවත් මා නියෝජනය කරන්නේත් මේ රටේ පීඩිත ජනතාව වෙනුවෙන් සැමවිටම කැප වූ, කුරහන් සාටකයෙන් සංකේතවත් කරනා ගැඹුරු දර්ශනයමයි. එම දර්ශනය ජනාධිපතිවරණය සඳහා මා ඉදිරිපත් කළ ප්‍රතිපත්ති ප්‍රකාශනය තුළත් අන්තර්ගතව තිබෙනවා. ගරු කථානායකතුමනි, මා මේ අවස්ථාවේදී %සෞභාග්‍යයේ දැක්ම^ ප්‍රතිපත්ති ප්‍රකාශනය සභාගත කරනවා.
පටු දේශපාලන අරමුණු පසෙකලා ජාතිය ගොඩ නැගීමට එක්වන්න
2019 නොවැම්බර් 16දා පැවැති ඡන්දයෙන් මේ රටේ ජනතාව මට ඉතා පැහැදිලි ජනවරමක් ලබා දුන්නා. ඒ ජනවරම ලබා දුන්නේ මා ගැන මහත් විශ්වාසයෙන්. ඒ විශ්වාසය කිසි අයුරකින් කඩ නොකොට, ජනතාවට අප පොරොන්දු වූ ආකාරයටම සෞභාග්‍යමත් දේශයක් ගොඩනැගීමේ වැඩපිළිවෙළ ක්‍රියාත්මක කිරීමට මාත්, මගේ රජයත් ඇපකැප වෙනවා.
මට ඡන්දය දුන් ජනතාවට අවශ්‍ය වුණේ මේ රටේ දේශපාලනික සංස්කෘතියේ ප්‍රබල වෙනසක් කරන්නටයි. විශේෂයෙන්ම ජාතිවාදය මත පදනම් වූ දේශපාලන න්‍යායපත්‍ර ජනතාව ප්‍රතික්ෂේප කළා. තවදුරටත් රජුන් තනන්නන්ගේ භූමිකාව රඟපාමින් රටේ දේශපාලනය හසුරවන්නට කිසිවෙකුට ඉඩ නොතබන බව බහුතර ජනතාව ඔප්පු කළා.
මා ආරාධනා කරනවා අදාළ දේශපාලනඥයන්ට මේ යථාර්ථය තේරුම් ගන්න කියා. පසුගිය කාලයේ පටු දේශපාලන අරමුණු මුල් කරගෙන කළ දේශපාලනය දැන්වත් පසෙකලා ජාතීන් අතර භේද වපුරනවා වෙනුවට එකට එක්වී ජාතිය ගොඩනැගීමේ කර්තව්‍යය සඳහා එකතුවන ලෙස මා ඉල්ලා සිටිනවා. බහුතර ජනතාවගේ අපේක්ෂාවන්ට අපි හැමවිටම ගරුකළ යුතුයි. ජනතා පරමාධිපත්‍යය සුරකින්නට පුළුවන් වන්නේ එවිටයි. අපේ රටේ උත්තරීතර ව්‍යවස්ථාවට අනුව මගේ ධුර කාලය තුළ රටේ ඒකීය බව ආරක්ෂා කරන බවත්, බුද්ධ ශාසනය සුරක්ෂිත කොට පෝෂණය කරන බවත්, එසේම ඕනෑම පුරවැසියෙකුට තමන් අභිමත ආගමක් ඇදහීමේ නිදහස සැමවිටම සුරකින බවත් මෙහිදී ප්‍රකාශ කරන්නට කැමතියි.
මට මතකයි මා කුඩා කාලේ මගේ පියා පාර්ලිමේන්තුව නියෝජනය කරනවා. මම බොහෝවිට පාර්ලිමේන්තු මහජන ගැලරියේ සිට පාර්ලිමේන්තු ක්‍රියාකාරකම් නරඹලා තිබෙනවා. අතීතයේ අප දුටු පාර්ලිමේන්තුව ඉතාමත් ආදර්ශමත් ස්ථානයක්. මෙහි ඉතා වැදගත් හරබර දේශන පැවැත්වුණා. ඉතා තර්කානුකූල වාද විවාද සිදුවුණා. ඒවාට ඇහුම්කන් දීමට පාසල් දරුවන් මෙන්ම වැඩිහිටි ජනතාව ආශාවෙන් පාර්ලිමේන්තුවට ඇදී ආවා. පාර්ලිමේන්තුවේ උත්තරීතරභාවය රැකගන්නට මන්ත්‍රීවරුන් හැමවිටම උත්සාහ කළා. ජනතාව එදා පාර්ලිමේන්තුවට ගරු කළා. මහජන නියෝජිතයන්ට ගරු කළා. නමුත් පසුකාලීනව මේ ගෞරවය ක්‍රම ක්‍රමයෙන් හීන වී ගියා.
මෙම පාර්ලිමේන්තුව යළිත් වතාවක් ජනතාවගේ සැබෑ ගැටලු සාකච්ඡා කෙරෙන, ජාතික ප්‍රතිපත්ති සංවාදයට ලක්කරන, ව්‍යවස්ථාදායකයේ වගකීම නිසිලෙස ඉටු කරන, ආදර්ශමත් ස්ථානයක් බවට පත්විය යුතුයි. පාර්ලිමේන්තුව ජනතාවගේ ගෞරවය දිනාගත් ස්ථානයක් බවට පත්කිරීමේ මූලික වගකීම තිබෙන්නේ මෙහි සිටින මහජන නියෝජිතයන් අතයි.
තනතුරු වරප්‍රසාදයන් නොව වගකීම්ය
අද මේ රටේ සමාජ, ආර්ථික හා දේශපාලන අර්බුදයක් තිබෙනවා. නිදහසින් වසර 70කට පසුවත් අපේ රටේ සංවර්ධනය ගැන අපට සෑහීමකට පත්වන්නට බැහැ. මේ තත්ත්වය වෙනස් කරන්නට අප සියලු දෙනාටම වගකීමක් තිබෙනවා. ඒ වෙනුවෙන් අවශ්‍ය කැපවීම් කරන්නට අපි සූදානම් විය යුතුයි.
මහජන නියෝජිතයෙකුගේ මූලික වගකීම ජනතා සේවයයි. අපට ලැබී ඇති තනතුරු වරප්‍රසාදයන් නොව වගකීම් බව අප සියලු දෙනාම මතක තබාගත යුතුයි. රටක් දියුණු කරන්නට නිවැරදි දැක්මක් හා සැලසුම් අවශ්‍යයි. ජනාධිපතිවරණයේදී රටේ ජනතාවට හඳුන්වා දුන් %සෞභාග්‍යයේ දැක්ම^ ප්‍රතිපත්ති මාලාව වසර 4කට ආසන්න කාලයක් %වියත් මග^ වැනි ජාතික සංවිධාන හරහාත්, ශ්‍රී ලංකා පොදුජන පෙරමුණ මගින් සංවිධානය කළ %ගම සමග පිළිසඳරක්^ වැඩසටහන හරහාත්, අනෙක් දේශපාලන පක්ෂ සමග කළ සංවාද හරහාත්, ජනතාවගේ අදහස් ලබාගනිමින්, මගේ දැක්මත් එයට එක් කොට සකස් කළ ජාතික වැඩපිළිවෙළක්.
ඒ සැලැස්මට අනුව ජනතාවට බරක් වී තිබූ බදුබර ලිහිල් කිරීම, විනිවිද භාවයෙන් හා කාර්යක්ෂමතාවෙන් ඉහළ පරිපාලන ක්‍රමවේදයකට මුලපිරීම, අනවශ්‍ය රාජ්‍ය වියදම් කපා හැරීම වැනි පියවර රැසක් අපි මේ වනවිටත් ගෙන තිබෙනවා. අපේ ප්‍රතිපත්තීන් අතර ජාතික ආරක්ෂාවට ඉහළම ප්‍රමුඛත්වයක් හිමිවෙනවා.
ජාතික ආරක්ෂක යාන්ත්‍රණය නැවතත් ශක්තිමත් කරන්නට අවශ්‍ය පියවර අපි දැනටමත් ගෙන තිබෙනවා. දක්ෂ නිලධාරීන්ට නැවතත් වගකීම් භාරදී තිබෙනවා. ජාතික ආරක්ෂාවට වගකියන ත්‍රිවිධ හමුදාව හා පොලීසිය අතර මනා සම්බන්ධීකරණයක් ඇති කරන්නට අප පියවර ගෙන තිබෙනවා. ජාතික බුද්ධි අංශ ජාලය ප්‍රතිසංවිධානය කොට ශක්තිමත් කොට තිබෙනවා.
අපේ මවුබිම ත්‍රස්තවාදයෙන්, අන්තවාදයෙන්, පාතාල ක්‍රියාකාරකම්වලින්, සොර බියෙන්, කප්පම්කරුවන්ගෙන්, මත්ද්‍රව්‍ය උවදුරින්, සාමාන්‍ය ජන ජීවිතය කඩාකප්පල් කරන්නන්ගෙන්, කාන්තා හා ළමා හිංසනයෙන් තොර සුරක්ෂිත රටක් කරන්නට අවශ්‍ය සියලු පියවර ගන්නට කටයුතු කරනවා. අපේ මූලික අරමුණ ඵලදායී පුරවැසියෙක්, සතුටින් ජීවත්වන පවුලක්, විනයගරුක සමාජයක් හා සෞභාග්‍යමත් දේශයක් ඇතිකරලීමයි.
මේ රටේ ජීවත්වන, වැඩකළ හැකි වයසේ සිටින, සෑම නිරෝගී පුරවැසියෙකුම සමාජයට වැඩදායී, ඵලදායී පුරවැසියෙක් කිරීමට රජය මූලිකත්වය ගතයුතුයි. අපට අවශ්‍ය ඔවුන් සියලුදෙනාගේම දායකත්වය මේ රටේ ආර්ථිකයට ලබාගැනීමටයි.
සංවර්ධන ක්‍රියාවල ප්‍රතිලාභ රටේ ජනතාවගේ සෑම කොටසකටම බෙදීයන බවට අපි වගබලාගත යුතුයි. එමෙන්ම රටේ ජනතාවගේ අවශ්‍යතාවන් සැබවින්ම ඉටුවෙනවාද, ඔවුන් සතුටින් සිටිනවාද යන්න සොයා බැලීමට නවීන ක්‍රමවේදයක් හා දර්ශක භාවිත කළ යුතුයි. ආණ්ඩුවේ වැඩපිළිවෙළ ගැන ජනතාවගේ ප්‍රතිචාරය සොයා බැලීමට ඡන්දයක් එනතුරු බලා සිටින්නට අවශ්‍ය නැහැ.
ඉදිරි මාසය තුළදී තරුණ තරුණියන් ලක්ෂයකට රැකියා
ජනතාවගේ ජීවන බර අඩුකිරීමට අප ගන්නා උත්සාහයට සියලු දෙනාගේම සහාය අපට අවශ්‍යයි. පසුගිය දිනවල අපි ව්‍යාපාරික ක්ෂේත්‍රයට ලබාදුන් බදු සහනවලින් යම් ප්‍රතිශතයක් ඔවුන් විසින් ජනතාවට ලබාදිය යුතුයි. ඒ අනුව බදු අඩු කළ සෑම භාණ්ඩයකම හා සේවාවකම යම් මිල අඩුවීමක් අපි බලාපොරොත්තු වෙනවා.
දුප්පත්කම නැති කිරීම අපේ රජයේ ප්‍රමුඛතාවක් ලෙස සලකනවා. ඒ සඳහා අපි ජනතාව දුප්පත්වීමට හේතු වටහාගෙන ඒවාට විසඳුම් සැපයිය යුතුයි. නිසි අධ්‍යාපනයක් හෝ නිපුණත්වයක් නැතිකම, වගා කිරීමට ඉඩමක් නැතිකම, ස්වයං රැකියාවක් ආරම්භ කරන්නට ප්‍රාග්ධනයක් නැතිකම වැනි ගැටලුවලට විසඳුම් ලබාදීමෙන් දුප්පත්කම නැති කිරීමට ප්‍රායෝගික ප්‍රවේශයක් ලබාගත හැකියි. ඉදිරි මාසය තුළ මේ රටේ ආදායම් අඩු පවුල්වල තරුණ තරුණියන් ලක්ෂයකට රැකියා ලබාදීමට අපි සැලසුම් සකස් කොට තිබෙනවා. රාජ්‍ය අංශයත්, පෞද්ගලික අංශයත් එක්කරගෙන රැකියා වියුක්තියට ප්‍රායෝගික විසඳුම් ඉදිරිපත් කිරීමට මගේ රජය සූදානම්.
ගුණගරුක, නීතිගරුක, විනයගරුක සමාජයක් ගොඩ නගමු යන්න පසුගිය මැතිවරණයේදී අපේ තේමාවක් වුණා. ජනතාව ඒ සඳහා අපට වරමක් ලබාදී තිබෙනවා. අප ඉතා පැරණි ඉතිහාසයක් ඇති, බෞද්ධ දර්ශනය මෙන්ම තවත් ලොව පිළිගත් ආගම් කිහිපයකම ඉගැන්වීම්වලින් පෝෂණය වූ සමාජයක් සිටින රටක්. අපේ සාරධර්ම හා සංස්කෘතීන් අප හැමවිටම ආරක්ෂා කළ යුතුයි. අපේ ඉලක්කය ලංකාව සංවර්ධිත රටක් බවට පත්කිරීමයි. එය ස්වෛරී, නිදහස් රටක් විය යුතුයි. එමෙන්ම එය සුරක්ෂිත සාමකාමී රටක් විය යුතුයි. ලංකාව සැබවින්ම සෞභාග්‍යමත් දේශයක් වන්නේ මේ සියල්ල අංග සම්පූර්ණ වූ විටයි.
දූෂණ ක්‍රියාවල යෙදෙන්නන්ට එරෙහිව තරාතිරම නොතකා නීතිය කඩිනමින්
සෞභාග්‍යයේ දැක්ම තුළින් අප හඳුන්වා දෙන්නේ ජනතා කේන්ද්‍රීය ආර්ථික ප්‍රතිපත්තියක්. සෑම පුරවැසියෙකුටම පිළිගත හැකි මට්ටමේ ආර්ථික ස්ථාවරත්වයක් සහතික කිරීම, දියුණු වීමට උත්සාහ ගන්නා සෑම අයෙකුටම සම අවස්ථා ලබාදීම, ජනතා සේවය වෙනුවෙන් කැපවූ පිරිසුදු, කාර්යක්ෂම රාජ්‍ය සේවයක් තහවුරු කිරීම හා දේශීය ව්‍යවසායකයන් ආරක්ෂා කොට ඔවුන් සවිබල ගැන්වීම එහි ප්‍රධාන අරමුණුයි. ජනතා කේන්ද්‍රීය ආර්ථිකයක් සාර්ථකව ස්ථාපිත කිරීමට නම් රජයේ ඉහළම නිලධාරියාගේ සිට පහළම නිලධාරියා දක්වා ර‍ටෙහි සංවර්ධනය පිළිබඳව අපේ දැක්ම හා අරමුණු ගැන දැනුම්වත් විය යුතුයි. එවිට ඔවුන්ගේ රාජකාරි වඩාත් ඵලදායී ලෙස ඉටුකරන්නට පුළුවන්.
දූෂණය හා වංචාව පිටුදැකීමට විශේෂ වැඩපිළිවෙළකුත් අපට ක්‍රියාත්මක කරන්නට සිදුවෙනවා. දූෂණ ක්‍රියාවල යෙදෙන්නන්ට එරෙහිව තරාතිරම නොතකා අප නීතිය කඩිනමින් ක්‍රියාත්මක කරනවා. අද බොහෝ රටවල් රාජ්‍ය අංශයේ කාර්යක්ෂමතාව ඉහළ දැමීමට තාක්ෂණය විසඳුමක් ලෙස යොදාගෙන තිබෙනවා. ඒ හරහා සැමට සමාන අවස්ථා ලබාදෙන්නටත් පුළුවන්. ඒ නිසා රාජ්‍ය ආයතන තුළ තාක්ෂණය භාවිතය ප්‍රචලිත කිරීමට විශේෂ අවධානයක් යොමු කරනවා.
අප අනාගතය සැලසුම් කළ යුත්තේ අපේ රටේ භූගෝලීය පිහිටීම, භෞතික සම්පත් හා මානව සම්පත පාදක කරගෙනයි. මීට වසර දහස් ගණනකට පෙර ලංකාව ග්‍රීක, රෝම, අරාබි, චීන ඇතුළු විවිධ ජාතික වෙළෙන්දන් පැමිණෙන ජාත්‍යන්තර වෙළෙඳ මධ්‍යස්ථානයක්ව තිබුණා. එසේ ලොව සුපතළ වන්නට ප්‍රධාන හේතුව වූයේ පෙර අපරදිග යා කරන මුහුදු මාර්ගයේ ඉතා සුවිශේෂී තැනක අපේ රට පිහිටා තිබීමයි. අදත් අපට ඒ වාසිය ඒ ආකාරයෙන්ම ලබාගත හැකියි.
දුම්රිය සේවාව වැඩිදියුණු කිරීම අවශ්‍යතම අංගයක්
2005 -2014 කාලයේ මහින්ද රාජපක්ෂ ජනාධිපතිතුමාගේ රජය, ලංකාව දකුණු ආසියාවේ ආර්ථික කේන්ද්‍රස්ථානය ලෙස දියුණු කරන්නට සැලසුම් කළා. මත්තල ගුවන් තොටුපොළ හා හම්බන්තොට වරාය තෝරාගනු ලැබුවේ දකුණේ විශාල කාර්මික නගරයක් ගොඩනැගීමේ අරමුණ ඇතිවයි.
කොළඹ වරාය නගරය ගොඩනගන්නට තීරණය කළේ ලංකාව ආසියාව තුළ මූල්‍ය හා වාණිජ කේන්ද්‍රස්ථානයක් බවට පත්කිරීම සඳහායි. දීර්ඝකාලීන අරමුණු ඇතුව සැලසුම් කළ ඒ ව්‍යාපෘති අපි ඉදිරියට ගෙන යා යුතුයි.
අප නිවැරදි සැලැස්මකට අනුව කටයුතු කළහොත්, කලාපීය අසල්වැසි රටවලට භාණ්ඩ හා සේවා සපයන විවිධ ජාත්‍යන්තර ව්‍යාපාර ලංකාවේ ස්ථානගත කරවා ගන්නට පුළුවන්. ඒ සඳහා ආයෝජකයන් දිරිගැන්වීම සඳහාත්, එම ආයෝජකයන්ට ලංකාව තුළ අවශ්‍ය පහසුකම් සියල්ල කඩිනමින් සැපයීම සඳහාත් අප සූදානම්ව සිටිය යුතුයි.
අධිවේගී මාර්ග පද්ධතිය මෙන්ම මහාමාර්ග පද්ධතිය දියුණු කිරීමේ වැඩකටයුතු වේගවත් කොට රටේ ඕනෑම තැනක සිට තවත් තැනකට පැය කිහිපයක් ඇතුළත ගමන්කළ හැකි වාතාවරණයක් ඇතිකිරීම ආර්ථික සංවර්ධනයට ඉතා වැදගත් වෙනවා. දුම්රිය සේවාව වැඩිදියුණු කිරීමත් මේ වැඩපිළිවෙළේ අවශ්‍යතම අංගයක්. කාර්යක්ෂම හා සුවපහසු දුම්රිය සේවාවක් මගින් අද බරපතළ ගැටලුවක්ව පවතින මාර්ග තදබදයටත් විසඳුම් සොයන්නට පුළුවන්.
සූර්ය බලය, සුළං බලය, ජල විදුලිය ගැන විශේෂ අවධානයක්
නාගරීකරණය රටකට යහපත් මෙන්ම අයහපත් ප්‍රතිඵල ගෙන දෙනවා. සංවර්ධනය රටේ සෑම ප්‍රදේශයකටම බෙදීයෑම සහතික කිරීම සඳහා අපට ප්‍රතිනාගරීකරණ වැඩපිළිවෙළක් අවශ්‍ය වෙනවා. නාගරික තදබදය අඩු කිරීමට, පරිසර දූෂණය අඩු කිරීමට මෙන්ම ජීවන වියදම අඩුකිරීමට මේ හරහා අපට පහසු වෙනවා. ලංකාව පුරා විසිරී සිටින ජනතාවට තම අධ්‍යාපන කටයුතු, සෞඛ්‍ය සේවා හා රැකියා සඳහා තම ප්‍රදේශය තුළම අවශ්‍ය පහසුකම් තිබිය යුතුයි. මාර්ග හා දුම්රිය මාර්ග පද්ධතියේ දියුණුව මෙන්ම රට පුරා අධිවේගී අන්තර්ජාල පහසුකම් හා සන්නිවේදන පහසුකම් ලබාදීමත් මේ සඳහා වැදගත් වෙනවා.
ආර්ථික සංවර්ධන ක්‍රියාවලියේදී විදුලි මිල වැදගත් සාධකයක්. විශේෂයෙන්ම කාර්මික ක්ෂේත්‍ර සඳහා ආයෝජකයන් ගෙන්වා ගැනීමේදී මෙය බලපානවා. සාධාරණ මිලකට බලශක්තිය නිෂ්පාදනය කිරීම සඳහා අපට කෙටිකාලීන මෙන්ම දීර්ඝකාලීන විසඳුම් අවශ්‍යයි. දීර්ඝකාලීන විසඳුම් සෙවීමේදී සූර්ය බලය, සුළං බලය, ජල විදුලිය වැනි පරිසර හිතකාමී පුනර්ජනනීය බලශක්ති ප්‍රභවයන් ගැන විශේෂ අවධානය යොමු කිරීම අපේ ප්‍රතිපත්තිය වෙනවා.
සාම්ප්‍රදායික ජීවනෝපායන්ට බාධා කිරීමට ඉඩ දෙන්නේ නෑ
අපේ රට මැණික් හා ඛනිජ සම්පත්වලින් පොහොසත් රටක් වූවාට අගය වැඩි කිරීමේ කර්මාන්ත තවමත් ජාත්‍යන්තර මට්ටමට දියුණු වී නැහැ. අගය වැඩිකිරීමෙන් තොරව මේ ස්වාභාවික සම්පත් අපනයනය කිරීමෙන් රටට ලබාගතහැකි විශාල විදේශ විනිමයක් වාර්ෂිකව අහිමි වෙනවා. ලංකාවේ පමණක් නොව අප්‍රිකානු කලාපීය රටවලින් පවා ගෙනෙනා මැණික් අගය වැඩිකොට අලෙවි කළ හැකි ජාත්‍යන්තර මට්ටමේ මැණික් වෙළෙඳ සංකීර්ණයක් ලංකාවේ පිහිටුවීමට අප කටයුතු කළ යුතුයි.
සාගර හා භූ විද්‍යා සමීක්ෂණ සඳහා නවීන තාක්ෂණ පහසුකම් ලබාදිය යුතු අතර, ලංකාවේ ඛනිජ සම්පත්වලට අගය එකතු කිරීමේ කර්මාන්ත සඳහා වූ ආයෝජනවලට විශේෂ සහන සලසා ඒවා දිරිමත් කළ යුතුයි. විවිධ නීතිරීති, බලපත්‍ර, තහංචි මගින් ශ්‍රී ලංකාවේ සාම්ප්‍රදායික ජීවනෝපායන් වූ මැණික් කර්මාන්තය, උළු කර්මාන්තය, ගඩොල් කර්මාන්තය, වඩු කර්මාන්තය, හස්ත කර්මාන්ත වැනි ක්ෂේත්‍ර සඳහා අනවශ්‍ය හා අසාධාරණ සීමාවන් පනවමින් රටේ සංවර්ධනයට බාධා කිරීමට අපි ඉඩ දෙන්නේ නැහැ.
අනාගතය සැලසුම් කරනවිට කෘෂිකර්මාන්තය, වැවිලි කර්මාන්තය හා ධීවර කර්මාන්තය සම්බන්ධයෙන් දැනට තිබෙනවාට වඩා විශේෂ අවධානයක් යොමු විය යුතුයි. හොඳ දේශගුණයක් තිබෙන විශාල මුහුදු ආර්ථික කලාපයකට හිමිකම් තිබෙන රටක් වශයෙන් අපට මේ කර්මාන්ත මීට වඩා බොහෝ දියුණු කරන්නට පුළුවන්.
කුළුබඩු, පලතුරු, එළවළු, ධාන්‍ය, මස් සහ මාළු වැනි අපනයනය කළ හැකි කෘෂි නිෂ්පාදන රැසක් තිබියදී, මෙයට වඩා අපනයන ආදායමක් අප ලබාගත යුතුයි. රටේ ජනතාවගෙන් 1/3ක් ජීවත්වන්නේ කෘෂිකර්මාන්තය හා වැවිලි කර්මාන්තය හා ධීවර කර්මාන්තය මතයි. අපි මේ ජනතාවගේ ජීවන මට්ටම ඉහළ නැංවිය යුතුයි.
මෙම කර්මාන්ත දියුණු කිරීම සඳහා සාම්ප්‍රදායික වගා ක්‍රමවලින් ඔබ්බට ගිය තාක්ෂණය මුල් කරගත් නව ප්‍රවේශයක් අවශ්‍යව තිබෙනවා. එමෙන්ම වස විසෙන් තොර ආහාර නිෂ්පාදනය අරමුණු කොට කෘෂිකර්මාන්තය සඳහා කාබනික පොහොර භාවිතය ප්‍රචලිත කිරීමත්, අපේ ප්‍රතිපත්තියේ කොටසක්.
ඉදිරි දශකය තුළ ශ්‍රී ලංකාවේ කෘෂිකර්මාන්තය මුළුමනින්ම කාබනික පොහොර භාවිතයට යොමු කිරීම සඳහා අවශ්‍ය කරන සැලසුම් අපි සකස් කළ යුතුයි. දේශීයව කාබනික පොහොර නිෂ්පාදනය වර්ධනය කිරීමේ වැඩපිළිවෙළකුත් මෙයට අයත් වෙනවා.කෘෂි නිෂ්පාදන සීමාවකින් තොරව ප්‍රතිඅපනයනයට ඉඩදී තිබීම නිසා සුළු අපනයන භෝග වගාකරුවන්ට ඇති වී තිබුණු ගැටලු විසඳන්නට අපි නව රජය පත් වූ වහාම ක්‍රියා කළා. කෘෂි නිෂ්පාදන ප්‍රතිඅපනයනය සම්පූර්ණයෙන්ම නතර කිරීමට මේ වනවිට නියෝග දී තිබෙනවා.
අවශ්‍යතාවන්ට අනුව අලුතින් වරායවල්
සාගර ආර්ථිකය සම්බන්ධයෙනුත් මීට වඩා අවධානයක් යොමු විය යුතුයි. ධීවර කර්මාන්තය දියුණු කිරීම සඳහා අවශ්‍ය කරන නව තාක්ෂණය හා යන්ත්‍රෝපකරණ ලබාදීම සඳහා ක්‍රමවත් වැඩපිළිවෙළක් අපි හඳුන්වා දෙනවා. ගැඹුරු මුහුදේ ධීවර කර්මාන්තයේ යෙදෙන බහුදින යාත්‍රාවලට අවශ්‍ය පහසුකම් සැපයීම සඳහා සියලුම ධීවර වරායන් නවීකරණය කරන අතර, අවශ්‍යතාවන්ට අනුව අලුතින් වරායවල් ඉදිකිරීමටත් කටයුතු කරනවා.
මිරිදිය මත්ස්‍ය කර්මාන්තය දියුණු කිරීම සඳහා නව තාක්ෂණය හඳුන්වා දීමත් අපේ සැලැස්මේ කොටසක්. අනාගත පරපුර වෙනුවෙන් පරිසරය සුරැකීම අපේ මූලික වගකීමක්. රාජ්‍ය ප්‍රතිපත්ති සකස් කිරීමේදී හා ක්‍රියාත්මක කිරීමේදී පරිසර ආරක්ෂණය ගැන අපි විශේෂයෙන්ම සැලකිලිමත් වෙනවා. එක්සත් ජාතීන්ගේ තිරසාර සංවර්ධන අරමුණු ඉටුකිරීමේදී ලෝකයේ ඉදිරියෙන්ම සිටින රටක් බවට ලංකාව පත්කිරීමට අප බලාපොරොත්තු වෙනවා.
වෙළෙඳ පොළ ඉලක්ක කරගනිමින් පාඨමාලා සැකසීමට විශ්වවිද්‍යාලවලට වැඩි නිදහසක්
රටක් වශයෙන් අපට ඇති වටිනාම සම්පත අපේ අනාගත පරපුරයි. ඒ නිසා මානව සම්පත් සංවර්ධනය, අපේ රජයේ මූලික වගකීමක් ලෙස අපි හඳුනාගෙන තිබෙනවා.
රටේ අනාගත පරපුර ඵලදායී පුරවැසියන් කරන්නට අවශ්‍ය දැනුමින් ඔවුන් පෝෂණය කරන්නට, ඔවුන්ගේ කුසලතා හා නිපුණතා වර්ධනයට විශේෂ අවධානයක් යොමු කරන්නට අපට සිදුවෙනවා. තරුණ තරුණියන්ට අධ්‍යාපන ක්ෂේත්‍රය තුළ අතරමං වීමට ඉඩනොදී ඔවුන්ට උසස් අධ්‍යාපනයට හා තාක්ෂණික අධ්‍යාපනයට ඇති අවස්ථා පුළුල් කළ යුතුයි. මේ සඳහා අවශ්‍ය කරන යටිතල පහසුකම් ඉතා කෙටි කාලයක් තුළ ගොඩනැගිය යුතුයි. රජයේ විශ්වවිද්‍යාලවල හා රජයේ විවිධ උසස් අධ්‍යාපන ආයතනවල ඇති ධාරිතාවන් කාර්යක්ෂමව ප්‍රයෝජනයට ගැනීම තුළින්, විශ්වවිද්‍යාලවලට ඇතුළත් කර ගන්නා ශිෂ්‍යයන් සංඛ්‍යාව වැඩිකළ යුතුයි.
අද විශ්වවිද්‍යාලවල උගන්වන සමහර පාඨමාලා රැකියා වෙළෙඳ පොළට ගැළපෙන්නේ නැහැ. වර්තමාන රැකියා වෙළෙඳ පොළ අවශ්‍යතාවන් සඳහා අපේ විශ්වවිද්‍යාල ශිෂ්‍යයන් පුහුණු කිරීම සඳහා දැනට හදාරන පාඨමාලාවලට අමතරව ඔවුන්ට ස්වේච්ඡාවෙන් සහභාගි විය හැකි කෙටිකාලීන අමතර පාඨමාලා හඳුන්වා දීමට අපි බලාපොරොත්තු වෙනවා. සිසුන් ඇතුළත් කිරීමේදී මෙන්ම වෙළෙඳ පොළ අවශ්‍යතා ඉලක්ක කරගෙන පාඨමාලා ප්‍රතිසංස්කරණය කිරීමේදී විශ්වවිද්‍යාල හා අනෙකුත් උසස් අධ්‍යාපන ආයතනවලට වැඩි නිදහසක් ලබාදිය යුතුයි.
රටේ දැනට තිබෙන ඩිප්ලෝමා මට්ටමේ පාඨමාලා හදාරන ආයතන ක්‍රමයෙන් උපාධි පිරිනමන මට්ටමට උසස් කිරීම අවශ්‍යයි. මේ සඳහා ආරම්භයක් ලෙස අපේ ගුරු පුහුණු පාසල් හා හෙදි පුහුණු පාසල් උපාධි මට්ටමට ගෙන එන්නට අපි බලාපොරොත්තු වෙනවා. පුහුණු උපාධිධාරී ගුරු හිඟය දැනටමත් අධ්‍යාපන ක්ෂේත්‍රය තුළ ගැටලුවක්. ඒ වගේම හෙදියන් සඳහා දැනට ලබාදෙන වසර 3ක ඩිප්ලෝමාව වසර4ක උපාධියක් දක්වා උසස් කිරීමෙන්ද, ඔවුන්ගේ ඉංග්‍රීසි දැනුම වර්ධනය කිරීමට ක්‍රියා කිරීමෙන්ද, ඔවුන්ට ජාත්‍යන්තර ප්‍රමිතීන්ට අනුව විදේශ රටවල්වල පවා සේවය කිරීමටත් ඉඩ සැලසෙනවා.
උසස් පෙළ අසමත්වන සහ සාමාන්‍ය පෙළ දක්වා ඉගෙනගත් ශිෂ්‍යයන්ට තාක්ෂණික සහ කාර්මික අංශයේ දැනුම වැඩි කිරීම සඳහා, කාර්මික සහ තාක්ෂණික විද්‍යාල පද්ධතිය ශක්තිමත් කළ යුතුයි. එම ආයතන සඳහා ලබාදෙන ප්‍රතිපාදන හා පහසුකම් වැඩිකළ යුතුයි. මේ හරහා ජාත්‍යන්තර මට්ටමේ වෘත්තීය පුහුණුවක් ලද ශ්‍රමබළකායක් ඇතිකළ හැකි අතර, දේශීය මෙන්ම විදේශීය රැකියා වෙළෙඳ පොළ තුළ ඉහළ වේතනයක් ලබාග තහැකි රැකියා අවස්ථා අපේ තරුණ තරුණියන්ට ලබාදිය හැකියි.රැකියා ක්ෂේත්‍රය තුළ ඉංග්‍රීසි දැනුම මදිකම බොහෝ තරුණ තරුණියන්ට අවස්ථාවන් අහිමි කරවනවා. මේ නිසා ලංකාවේ සෑම පාසලකම ඉංග්‍රීසි භාෂාව ඉගැන්වීමේ පහසුකම් දියුණු කිරීමටත්, ඒ සඳහා අවශ්‍ය ගුරුවරුන් අනුයුක්ත කිරීමටත් විශේෂ ක්‍රමවේදයක් අපි හඳුන්වා දෙනවා.
අලුත් රැකියා අවස්ථා තරුණ තරුණියන් සඳහා සොයා දීමට අපේ විදේශ තානාපති අංශවලට විශේෂ වගකීම් පවරන්නට අපි බලාපොරොත්තු වෙනවා. නුපුහුණු සේවකයන් විශාල වශයෙන් පිටරට යවනවා වෙනුවට සෑම ක්ෂේත්‍රයකම පුහුණු සේවකයන් පිටරට යැවීමෙන් අපේ රටට ලැබෙන විදේශ විනිමය වැඩිකර ගන්නවා මෙන්ම ජාත්‍යන්තර රැකියා වෙළෙඳ පොළ තුළ අපේ රටේ ප්‍රතිරූපයත් වර්ධනය කරගත හැකියි.
අධ්‍යාපන ක්ෂේත්‍රය රටකට හොඳ විදේශ විනිමය උපයාගත හැකි මාර්ගයක්. ශ්‍රී ලාංකික දරුවන්ද විශාල ප්‍රමාණයක් අද ආසියාතික උසස් අධ්‍යාපනික ආයතනවල ඉගෙනුම ලබනවා. අධ්‍යාපනය සඳහා අපේ දරුවන් විශාල වියදමක් දරා පිටරට යවනවා වෙනුවට විදේශීය ශිෂ්‍යයනුත් ලංකාවට ආකර්ෂණය කරගැනීමේ වැඩපිළිවෙළක් අපි සකස් කළ යුතුයි. සියලුම විශ්වවිද්‍යාල ජාත්‍යන්තර වශයෙන් තම ශ්‍රේණිගත කිරීම්වලින් ඉහළට පැමිණීම සඳහා කෙටිකාලීන හා දීර්ඝකාලීන සැලසුම් සකස් කළ යුතුයි.
නව තාක්ෂණයන් හඳුන්වාදෙන ආයෝජකයන්ට විශේෂ පහසුකම් හා සහන
නිදහසින් වසර 70කට පසුවත් අපව හඳුන්වනු ලබන්නේ දියුණු වෙමින් පවතින රටක් ලෙසයි. අපට මේ තත්ත්වයෙන් මිදී සැබවින්ම දියුණු රටක් වීමට නම් අපි ඒ සඳහා ඇති අවස්ථා හඳුනාගත යුතුයි. බිලියන 5කට වැඩි ජනතාවක් වාසය කරන ආසියාව තුළ අද විශාල ආර්ථික පිබිදීමක් ඇතිවී, ලෝක ආර්ථිකයේ බල කේන්ද්‍රය ආසියාව දෙසට නැඹුරු වෙමින් පවතිනවා. මුදල් වැයකිරීමේ හැකියාව ඇති මධ්‍යම පන්තියේ ප්‍රජාව ශීඝ්‍රයෙන්ම වර්ධනය වන්නේ මේ කලාපය තුළයි. ඒ නිසා අපේ දේශීය ව්‍යවසායකයන් ආසියානු කලාපය තුළ නව වෙළෙඳ පොළවල් සොයා යෑමට දිරිගන්වනවා.
21 වැනි සියවස හඳුන්වනු ලබන්නේ දැනුම කේන්ද්‍රික ශතවර්ෂයක් ලෙසයි. කෘතිම බුද්ධිය (Artificial Intelligence), ජෛව තාක්ෂණය (Biotechnology), රොබෝ විද්‍යාව (Robotics), 3D මුද්‍රණය, IOT උපාංග (Internet of Things), වැනි අතිනවීන තාක්ෂණයන් ලෝකය වෙනස් කරමින් තිබෙනවා. ලෝකයේ දියුණුවන රටවල් රැසක් මේ යථාර්ථය වටහාගෙන තිබෙනවා. තාක්ෂණික කේන්ද්‍රීය ආයෝජන සඳහා ඔවුන් විශාල මුදලක් වැය කරනවා.
අපේ ආයෝජන ප්‍රතිපත්තිය කළමනාකරණයේදීත් අපි මේ ගැන අවධානය යොමු කළ යුතුයි. රටේ අනාගත සංවර්ධනය සඳහා අපට අවශ්‍ය කුමන ආකාරයේ ආයෝජනද යන්න අපි වටහා ගතයුතුයි. ඒ අනුව රටට නව තාක්ෂණයන් හඳුන්වා දෙන ආයෝජකයන්ට විශේෂ පහසුකම් හා සහන ලබාදී ඔවුන්ව දිරිමත් කරන්නට අපි කටයුතු කරනවා. අපේ තරුණ පරපුර නව තාක්ෂණයන් හැදෑරීමට හා ඒවාට අදාළ පර්යේෂණ කිරීමට යොමු කරවීමත් ඉතාමත්ම වැදගත්. ඒ සඳහා ප්‍රමාද නොවී කඩිනමින් සූදානම් වීමට අපේ අධ්‍යාපන ක්ෂේත්‍රයට සහාය දිය යුතුයි. ඒ වගේම තරුණ පරපුර තුළ ඉංග්‍රීසි අධ්‍යාපනය හා තොරතුරු තාක්ෂණය භාවිතය ප්‍රවර්ධනය කිරීමට අප පියවර ගත යුතුයි.
අපට වෙළෙඳ පොළ අවස්ථා තිබෙන්නේ තාක්ෂණික ක්ෂේත්‍රවල පමණක් නොවන බවත් මෙහිදී වටහාගත යුතුයි. අනාගතයේ අපට පහසුවෙන්ම දියුණු කළ හැකි තවත් ක්ෂේත්‍රයක් වන්නේ සංචාරක කර්මාන්තයයි. 2018 වසරේදී ඇමෙරිකානු ඩොලර් බිලියන 4.4ක පමණ ආදායමක් ඉපැයූ සංචාරක කර්මාන්තයට තව වසර කිහිපයක් තුළ ඇමෙරිකානු ඩොලර් බිලියන 10ක පමණ ආදායමක් ගෙනෙනා කර්මාන්තයක් බවට පත්වන්නට අවකාශය තිබෙනවා. ඒ සඳහා ඉතා ක්‍රමවත් වැඩපිළිවෙළක් අපි හඳුන්වා දෙනවා.
දක්ෂ පරිපාලනයක් හරහා වේගවත් සංවර්ධනයක්
ප්‍රජාතන්ත්‍රවාදයේ උපරිම ප්‍රයෝජන ලබාගැනීමට නම් රාජ්‍ය පරිපාලනයත් නිසියාකාරව ක්‍රියාත්මක විය යුතුයි. රාජ්‍ය ආයතන ලාභදායී හා කාර්යක්ෂම ලෙස පාලනය කිරීම සඳහා ඉහළ තනතුරුවලට සුදුස්සන් තෝරා ගැනීමේදී අදාළ ක්ෂේත්‍රය පිළිබඳව දැනුමක් හා වගකීම දැරීම සඳහා සුදුසුකම් ඇති අය පත්කරන බවට අපි ප්‍රතිපත්ති ප්‍රකාශනයේ සඳහන් කළා. මේ අනුව නව රජය පිහිට වූ පසු රාජ්‍ය ආයතන පාලනය සඳහා සුදුස්සන් නිර්දේශ කිරීමට අප කමිටුවක් පිහිටුවා තිබෙනවා.
2004 - 2014 කාලය තුළ අපි ලංකාවේ ආර්ථිකයේ වේගවත් සංවර්ධනයක් සිදුවන ආකාරය දුටුවා. මාර්ග පද්ධතිය, නිවාස, විදුලිය, ජලය, සන්නිවේදන පහසුකම් වැනි යටිතල පහසුකම්වලත් කසළ කළමනාකරණය, නගර අලංකරණය වැනි ක්ෂේත්‍රවලත් විශාල දියුණුවක් සිදුවුණා. දක්ෂ පරිපාලනයක් ස්ථාපිත කිරීම මගින් අපට මේ තත්ත්වය යළිත් උදාකරගන්නට පුළුවන්.
මැතිවරණ ක්‍රමයේ වෙනස්කම් අවශ්‍යයි
ගරු කථානායකතුමනි,
ප්‍රජාතන්ත්‍රවාදී රාජ්‍යයක සාර්ථකත්වය රඳා පවතින පදනම වන්නේ ආණ්ඩුක්‍රම ව්‍යවස්ථාවයි. 1978 සිට 19 වතාවක් සංශෝධනය වී ඇති අපේ ආණ්ඩුක්‍රම ව්‍යවස්ථාව තුළ ඇති අවිනිශ්චිතභාවය හා ව්‍යාකූලත්වය නිසා වර්තමානයේ ගැටලු රැසක් නිර්මාණය වී තිබෙනවා. අපේ රටේ සුරක්ෂිතතාව, ස්වෛරීභාවය, ස්ථාවරභාවය හා ඒකීයභාවය ආරක්ෂා කර ගැනීමට නම් දැනට පවතින ආණ්ඩුක්‍රම ව්‍යවස්ථාවේ යම් වෙනස්කම් සිදුවිය යුතුමයි.
සමානුපාතික ඡන්ද ක්‍රමය තුළ ඇති සාධනීය ලක්ෂණ රැකගන්නා අතරම පාර්ලිමේන්තුවේ ස්ථාවරභාවයද, ජනතාවගේ ඍජු නියෝජනයද තහවුරු කිරීම සඳහා වර්තමාන මැතිවරණ ක්‍රමයේ වෙනස්කම් අවශ්‍ය වෙනවා. ඉලක්කම්වලින් මැතිවරණ ජයග්‍රහණ වාර්තාකළ හැකිවුවද, පැහැදිලි තීන්දු තීරණගත නොහැකි, අන්තවාදයේ බලපෑමට නිරන්තරයෙන් යටපත් වන, අස්ථාවර පාර්ලිමේන්තුවක් රටකට සුදුසු නැහැ. ජනතා පරමාධිපත්‍ය තහවුරු වන ප්‍රබල විධායකයක්, ව්‍යවස්ථා දායකයක් සහ ස්වාධීන අධිකරණයක් ස්ථාපිත කිරීම ව්‍යවස්ථා වෙනසක් තුළින්ම විසඳාගත යුතුයි. අපේ රටේ සුවිශේෂී පිහිටීම නිසා ලෝක භූ දේශපාලනය තුළ විශේෂ අවධානයක් මේ වනවිට ලංකාව දෙසට යොමු වී තිබෙනවා.
විදේශයන් ඉදිරියේ දණින් නොවැටෙන ගෞරවාන්විත පාලනයක්
අප මධ්‍යස්ථ විදේශ ප්‍රතිපත්තියක් අනුගමනය කරනවා. අප සෑම රටක් සමගම මිතුරුදම් පවත්වා ගැනීමට උත්සාහ කළ යුතුයි. නමුත් කිසිම විටක අපට අපේ ස්වාධීනත්වය පාවා දෙන්නට බැහැ. රාජ්‍ය තාන්ත්‍රික සබඳතාවලදී හෝ, ජාත්‍යන්තර වෙළෙඳ ගනුදෙනුවලදී කිසිදු විදේශ රටක් හමුවේ දණින් නොවැටෙන, රටේ ස්වෛරීත්වය හැමවිටම ආරක්ෂා කරන, ඕනෑම රටක් සමග සම තත්ත්වයෙන් ගනුදෙනු කරන, දේශීය අභිමානය සුරකින, ගෞරවාන්විත පාලනයක් අපි ස්ථාපිත කරනවා.
විශේෂයෙන්ම ආර්ථික වැදගත්කමක් තියෙන අපේ භූ ප්‍රදේශ හෝ භෞතික සම්පත්, කිසිවිටෙකත් වෙනත් රටවල් සතු නොකිරීම අපේ ප්‍රතිපත්තියයි. ශ්‍රී ලාංකේය ජාතිය ජාත්‍යන්තර වශයෙන් පිළිගැනීමක් ඇති අභිමානවත් ජාතියක් බවට පත්කිරීම මගේ අභිලාෂයයි. ඒ අරමුණ කරා යන ගමනේදී ජාතියක් ලෙස එක්ව ක්‍රියා කිරීමෙන් අප හමුවේ ඇති සියලු අභියෝග ජයගන්නට පුළුවන්.
මම මගේ රටට ආදරය කරනවා. මම මගේ රට ගැන ආඩම්බර වෙනවා. මට මගේ රට ගැන දැක්මක් තිබෙනවා. ඉතිහාසය විසින් වත්මන් පරපුර මත පවරා ඇති ඵෙතිහාසික වගකීම භාරගන්නට මා සමග එක්වන මෙන් ඔබ සියලු දෙනාගෙන්ම ඉල්ලා සිටිනවා.ඔබ සියලු දෙනාටම ස්තූතියි. තෙරුවන් සරණයි*
