ඉතාම දීර්ඝ ඉතිහාසයක් හිමි ස්විස් හමුදා පිහිය (Swiss army knife) කියන්නේ ඇත්තටම බහුකාර්ය උපකරණයක්. නියම ස්විස් හමුදා පිහි අදටත් නිෂ්පාදනය කරන්නේ ස්විට්සර්ලන්තයේ වික්ටරිනොක්ස් සමාගමෙන්.
විශේෂයෙන්ම සංචාරයේදී, කඳවුරු බැඳීමකදී වැනි එළිමහන් ක්‍රියාකාරකම්වලදී ඇති වන අවශ්‍යතාවන් බොහෝමයක් ඉෂ්ට කර ගන්නට මේ ස්විස් හමුදා පිහියේ තිබෙන විවිධ මෙවලම් උපකාරී වෙනවා. උදාහරණයක් ලෙසින් දැක්වුවහොත්, ඕනෑම දෙයක් කැපීමට හැකි තියුණු පිහි තලයකට අමතරව, බෝතලයක මූඩිය විවෘත කළ හැකි මෙවලමක්, කෝක් මූඩියක් ඇද ගැලවිය හැකි මෙවලමක්, කියත් තලයක්, කතුරක්, ඉස්කුරුප්පු නියන් තල වැනි අංගෝපාංග ගණනාවක් හොඳ ස්විස් හමුදා පිහියකට ඇතුළත් වෙනවා.
බොහෝ විට අපට අවශ්‍ය වේ යැයි කලින් සිතීමට නොහැකි අවස්ථාවකදී මෙවන් ස්විස් හමුදා පිහියක ඇති මෙවලම් මහෝපකාරී විය හැකියි. එනිසාම, කඳවුරු බැඳීම් වැනි එළිමහන් ක්‍රියාකාරකම් සඳහා යන අයෙකුගේ ගමන් මල්ලේ ස්විස් හමුදා පිහියක් තිබීම කොයි මොහොතකටත් ප්‍රයෝජනවත් වනු ඇති.
