එක්සත් ජනපදයේ රහස්‍ය තොරතුරු රැසක් හෙළිකළ එඩ්වඩ් ස්නොව්ඩන් ෆේස්බුක් හිමිකාරීත්වය දරන මෙටා හි කඩා වැටෙන කොටස් මිල තාවකාලික බවත් සමාගම තවමත් මානව වර්ගයාට තර්ජනයක් විය හැකි බවටත් අනතුරු අඟවයි.
මෙටා සමාගමෙහි කොටස් මිල ඔවුන් වාර්තා කළ ඉපැයීම් අපේක්ෂාවන්ට වඩා පහත වැටීමෙන් පසු කඩා වැටීමක් පෙන්නුම් කළේය.
කෙසේ වෙතත්, එඩ්වඩ් ස්නොව්ඩන් සමාගමේ බිඳවැටීම ඉතා ඉක්මනින් සැමරීමට ඉක්මන් නොවන ලෙස ට්විටර් පණිවුඩයකින් පවසා සිටියේය. ඔහු පෙන්වා දුන්නේ ෆෝස්බුක් යළිත් නැගී සිටිමින් සමාජයට තර්ජනයක් විය හැකි බවයි.
“සකර්බර්ග්ගේ කොටස් කඩාවැටීම ගැන නිසැකවම සිනාසෙන්න” ස්නෝඩන් බ්‍රහස්පතින්දා ට්වීට් කරමින් කියා සිටියේය. “නමුත් තවත් වසර පහකින් ඔහු ඔබේ ඇහිබැම අයිති කර ගන්නා අතර, ඔබ ඇසිපිය හෙළන සෑම අවස්ථාවකම ඔහු දැන්වීම් විරාමයක් තබනු ඇති බව මිනිසුන් අමතක නොකළ යුතුයි” ඔහු වැඩිදුරටත් පැවසීය.
දැනට රුසියාවේ පදිංචිව සිටින සහ මෑතකදී රුසියානු පුරවැසිභාවය ලබා ඇති ස්නොව්ඩන් විසින් සමාජ මාධ්‍ය දැවැන්තයා සහ එහි නිර්මාතෘ මාර්ක් සකර්බර්ග් විවේචනය කළ පළමු අවස්ථාව මෙය නොවේ.
