පූජකයෙකු ලෙස පෙනී සිටි පුද්ගලයෙකු කෝල්ඩ්ස්ට්‍රීම් ආරක්ෂකයින්ගේ බැරැක්කවලට රිංගා ගැනීමට සමත් වූ බවට වාර්තා වීමෙන් පසුව තමන් පරීක්ෂණයක් ආරම්භ කළ බව බ්‍රිතාන්‍ය හමුදාව පවසයි.
රැජින ආරක්ෂා කිරීමේ වගකීම පැවරී ඇති ප්‍රභූ සොල්දාදුවන් සමග මෙම වංචනිකයා රැඳී සිට ඇති අතර, වින්ඩ්සර් කාසල් අසල වික්ටෝරියා බැරැක්කයේ රාත්‍රියක්ද ගතකර තිබේ.
ආරක්ෂක අමාත්‍යාංශයේ ප්‍රකාශකයෙකු පැවසුවේ, යුද හමුදාව මෙම ආරක්‍ෂාව කඩ කිරීම අතිශයින් බැරෑරුම් ලෙස සලකන අතර, එය ප්‍රමුඛතාවයේ කාරණයක් ලෙස තරයේ විමර්ශනය කරනු ලබන බවය. කෙසේ වෙතත් සිද්ධිය දැන් දිගටම පවතින විමර්ශනයක කොටසක් බැවින් වැඩිදුර අදහස් දැක්වීම ආරක්ෂක අමාත්‍යාංශ ප්‍රකාශකයා ප්‍රතික්ෂේප කළේය.
පසුගිය සතියේ සිදු වූ මෙම කඩකිරීම ප්‍රථම වරට වාර්තා කළේ 'ද සන්' පුවත්පත විසිනි. මෙම ටැබ්ලොයිඩ් පුවත්පතට අනුව, මෙම පුද්ගලයා බැරැක්කයේ ගේට්ටුව අසලට පැමිණ කිසිදු හැඳුනුම්පතක් නොපෙන්වා හෝ කිසිදු ලේඛනයක් නොපෙන්වා සාර්ථකව බැරැක්කය වෙත ඇතුළු වීමට සමත්ව තිබේ.
