යුරෝපීය සංක්‍රමණික අර්බුදය අතරතුර මිනිසුන් දහස් ගණනක් ජාවාරම් කිරීම සම්බන්ධයෙන් වරදකරු වූ කුප්‍රකට මිනිස් ජාවාරම්කරුවෙකු එක්සත් අරාබි එමීර් රාජ්‍යය විසින් ජාත්‍යන්තර පොලිසිය සමග සම්බන්ධීකරණයෙන් මෙහෙයවන ලද ජාත්‍යන්තර මෙහෙයුමකදී අත්අඩංගුවට ගෙන තිබේ.
2019 වසරේ සිට ඉන්ටර්පෝල් උකුසු ඇසට නතුව සිටි එරිත්‍රියානු ජාතික කයිඩානේ මෙසේ අත්අඩංගුවට පත්ව තිබේ. එක්සත් අරාබි එමීර් රාජ්‍යයේ අභ්‍යන්තර කටයුතු අමාත්‍යාංශයට අනුව, ඔහු නැගෙනහිර අප්‍රිකානු සංක්‍රමණිකයන් පැහැරගෙන ගොස් ඔවුන්ව යුරෝපයට ගෙනඒම සඳහා කප්පම් ගත් සංවිධානයකට නායකත්වය දී ඇත.
මොහු මුලින් 2020 වසරේදී ඉතියෝපියාවේදී අත්අඩංගුවට ගත් නමුත් ඊළඟ වසරේ අඩිස් අබාබා හි උසාවි ගොඩනැගිල්ලකින් පැන ගියේය. 2021 දී මිනිස් ජාවාරම් සම්බන්ධයෙන් ඉතියෝපියානු අධිකරණයක් ඔහුට ජීවිතාන්තය දක්වා සිරදඬුවම්ද නියම කළේය. සරණාගතයින් සහ සංක්‍රමණිකයන් ලිබියාවේ ගබඩාවල රඳවා තබා ගැනීම සහ ඔවුන්ගෙන් සහ ඔවුන්ගේ පවුල්වලින් ඩොලර් දහස් ගණනක් කප්පම් ගැනීම සම්බන්ධයෙන් මොහුට චෝදනා එල්ල වී ඇත. .
ඔහු නෙදර්ලන්තයට අවශ්‍යව සිටි අතර, එරට රජය ඔහුව විස්තර කළේ "ලෝකයේ වඩාත්ම කුප්‍රකට සහ කුරිරුම මිනිස් ජාවාරම්කරුවෙකු" ලෙසිනි.
