බටහිර සම්බාධකවලින් රුසියාව සැබවින්ම හුදකලා වනු ඇතැයි අදහස් නොකොරෙන අතර, ලෝක සන්ධර්භය තුළ මෙන්ම, රුසියාව තුළම එය තවදුරටත් කුඩා රාජ්‍යයක් නොවන බව ක්‍රෙම්ලිනයේ ප්‍රකාශක දිමිත්‍රි පෙස්කොව් පවසයි.
පෙස්කොව් පැවසුවේ යුක්රේනයේ ප්‍රහාරයෙන් පසුව සම්බන්ධතා ප්‍රතික්ෂේප කිරීම සහ යුරෝපය, එක්සත් ජනපදය, කැනඩාව, ජපානය සහ වෙනත් රටවල් විසින් සීමා කිරීම් හඳුන්වාදීම, රුසියාව හුදකලා කිරීමක් ලෙස අදහස් කරන්නේ නම් එය වැරදීමක් බවයි.
පෙබරවාරි 24දා යුක්රේනයෙහි ආරම්භ කළ මෙහෙයුම සමග රුසියානු ආර්ථිකයේ විවිධ අංශ ඉලක්ක කර ගනිමින් දැඩි සම්බාධක හඳුන්වා දීමට එක්සත් ජනපදය, යුරෝපා සංගමය, එක්සත් රාජධානිය සහ තවත් බොහෝ ජාතීන් පෙළඹී ඇත.
"යුරෝපයට සහ ඇමරිකාවට ඕනෑම රටක්, විශේෂයෙන් රුසියාව තරම් විශාල රටක් හුදකලා කිරීමට ලෝකය විශාල වැඩියි. ලෝකයේ, ඔබ දන්නා පරිදි, ජාත්‍යන්තර සබඳතා වර්ධනය කිරීමේ ගතිකතාවයන් කෙරෙහි වඩා සමබර, සමහර විට වඩා සාධාරණ ආකල්පයක් ඇති තවත් බොහෝ රටවල් තිබෙනවා." පෙස්කොව් පැවසීය.
මොස්කව්හි බටහිර හවුල්කරුවන් ඔවුන්ගේ දැඩි චිත්තවේගී ප්‍රවේශය වෙනස් කරනු ඇතැයි යන බලාපොරොත්තුව තබමින්, ජනාධිපති ව්ලැදිමීර් පූටින්ගේ ප්‍රකාශකයා රුසියාව සිය ආර්ථික කොල්ලකෑම් සඳහා සුදුසු ප්‍රතිචාරයක් දක්වන බවටද පොරොන්දු විය.
බටහිර විසින් පනවා ඇති සම්බාධක අතර රුසියානු ගුවන් යානා සඳහා ගුවන් අවකාශය වසා දැමීම සහ SWIFT ජාත්‍යන්තර ගෙවීම් පද්ධතියෙන් රුසියානු බැංකු කපා හැරීම ප්‍රබල අවස්ථාවන් ලෙස සැලකෙයි.
සියලුම අංශ හරහා සමාගම් දුසිම් ගනනක් රුසියාවේ ඔවුන්ගේ මෙහෙයුම් අත්හිටුවන බව නිවේදනය කර ඇති අතර ලැයිස්තුව දිනෙන් දින වැඩි වෙයි. එවැනි වර්ධනයන්, චීනය සහ අනෙකුත් BRICS රටවල් - එනම් බ්‍රසීලය, රුසියාව, ඉන්දියාව, චීනය සහ දකුණු අප්‍රිකාව සමග අභ්‍යවකාශ සහ ක්‍රීඩා ඇතුළු විවිධ ක්ෂේත්‍රයන්හි සිය සහයෝගීතාව පුළුල් කිරීමට මොස්කව් පොළඹවා ඇත.
