ලොව ඕනෑම තැනක සිටින ඇමෙරිකානුවන්ට රුසියාව සමග කිසිදු ආයෝජනයක් සහ ගනුදෙනු තහනම් කරමින් එක්සත් ජනපද ජනාධිපති ජෝ බයිඩන් විසින් අද (07දා) විධායක නියෝගයකට අත්සන් කිරීමට නියමිතව තිබේ.
රුසියාව ගෝලීය ආර්ථිකයෙන් තවදුරටත් හුදකලා කිරීම සහ රුසියානු සමූහාණ්ඩුවේ ගෝලීය තරගකාරිත්වය බිඳ දැමීම ඉලක්ක කරමින් ඇමෙරිකානු ජනාධිපතිවරයා මෙම පියවර ගන්නා බව විදෙස් වාර්තා පවසයි.
එසේම, එක්සත් ජනපද භාණ්ඩාගාරය විසින් ඔවුන්ගේ සම්බාධක පැනවෙන සහ විවේචනාත්මක ප්‍රධාන රුසියානු රාජ්‍ය ව්‍යාපාර ලැයිස්තුවද අද දිනයේ ප්‍රකාශයට පත් කිරීමට නියමිතව තිබේ. ඒ අනුව, ඕනෑම ඇමෙරිකානුවෙකුට ඔවුන් සමග ව්‍යාපාර කිරීම තහනම් කිරීමට සහ එක්සත් ජනපද අධිකරණ බලයට යටත්ව එසේ ගනුදෙනු කරන ලොව ඕනෑම තැනක සිටින ඇමෙරිකානුවෙකුගේ සියලු වත්කම් අත්හිටුවීමටත් බලය පැවරෙනු ඇත.
