රුසියාව එක්සත් ජනපද ජනාධිපති ජෝ බයිඩන්, රාජ්‍ය ලේකම් ටෝනි බ්ලින්කන්, ආරක්ෂක ලේකම් ලොයිඩ් ඔස්ටින් සහ තවත් පරිපාලන නිලධාරීන් සහ දේශපාලන චරිත 10කට සම්බාධක පනවා තිබේ. වොෂිංටනය ජනාධිපති ව්ලැදිමීර් පූටින් ඇතුළු ඉහළ පෙළේ රුසියානු නායකයින් අසාදු ලේඛනගත කිරීමෙන් පසු පනවන ලද මෙම සම්බාධක අන්‍යෝන්‍ය පියවරක් බව මොස්කව් පවසා තිබේ.
රුසියාවේ මෙම සම්බාධක ලැයිස්තුවට නවතම එකතු කිරීම් අඟහරුවාදා ක්‍රෙම්ලිනය විසින් ප්‍රකාශයට පත් කරන ලද අතර, "වත්මන් එ.ජ. පරිපාලනය විසින් ගනු ලබන අතිශය රුසෝෆෝබික් (රුසියානු විරෝධී) රෝගයට ප්‍රතිචාරයක්" ලෙස එය විස්තර කර ඇත.
මෙම ලැයිස්තුවේ ඉහළින්ම එක්සත් ජනපපදයේ ජනාධිපති බයිඩන් පසුවන අතර, අනතුරුව බ්ලින්කන් සහ ඔස්ටින් වෙති. ඒකාබද්ධ මාණ්ඩලික ප්‍රධානීන්ගේ සභාපති ජෙනරාල් මාර්ක් මිලී, ජාතික ආරක්ෂක උපදේශක ජේක් සුලිවන්, සීඅයිඒ අධ්‍යක්ෂ විලියම් බර්න්ස් සහ ධවල මන්දිර මාධ්‍ය ලේකම් ජෙන් සාකිද ඒ අතර වෙති. ලැයිස්තුවේ තව දුරටත් පහළින්, හිටපු රාජ්‍ය ලේකම් හිලරි ක්ලින්ටන් සහ බයිඩන්ගේ පුත් හන්ටර්ද ඇතුළත් වේ.
ලැයිස්තුවට ඇතුළත් කළ මෙම පුද්ගලයින්ගෙන් කිසිවෙකු රුසියානු සමූහාණ්ඩුවට ඇතුල් වීමට අවසරයක් නොමැත. කෙසේ වෙතත්, ක්‍රෙම්ලිනයේ ප්‍රකාශය කියා සිටියේ, "ඔවුන් අපගේ ජාතික අවශ්‍යතා සපුරාලන්නේ නම්" මොස්කව් ඇමෙරිකානු නිලධාරීන් සමග වූ සම්බන්ධතා ප්‍රතික්ෂේප නොකරන බවයි.
"නුදුරු අනාගතයේ දී" තවත් නම් ලැයිස්තුවට එකතු කෙරෙනු ඇති බව නිවේදනය තවදුරටත් අනතුරු ඇඟවීය. "රුසෝෆෝබික් හෝ රුසියාව කෙරෙහි වෛරය ඇති කිරීමට දායක වන ඉහළම එක්සත් ජනපද නිලධාරීන්, හමුදා නිලධාරීන්, නීති සම්පාදකයින්, ව්‍යාපාරිකයන්, විශේෂඥයින් සහ මාධ්‍යවේදීන්ද එසේ අසාදු ලේඛනගත විය හැකි බවට රුසියාව අනතුරු අඟවා තිබේ.
