යුරෝපයේ ආතතීන් උත්සන්න වීමට එක්සත් ජනපදය වගකිව යුතු බව රුසියාවේ ජනාධිපති ව්ලැදිමීර් පූටින් අඟහරුවාදා කියා සිටියේය.
ජ්‍යෙෂ්ඨ හමුදා නිලධාරීන් අමතමින් පූටින් කියා පෙන්වා දුන්නේ රුසියාව ඕනෑම බටහිර ආක්‍රමණයකට ප්‍රමාණවත් ලෙස ප්‍රතිචාර දක්වන බවත් තම හමුදාව තවදුරටත් දියුණු කරන බවත්ය.
රුසියාවට හිතවත් නොවන පියවරවලට දැඩි ලෙස ප්‍රතිචාර දක්වන බව පැවසූ පූටින්, එසේ කිරීමට ඔවුන්ට සෑම අයිතියක්ම ඇති බව අවධාරණය කළේය.
2014 අප්‍රේල් මාසයේ සිට යුක්රේනයේ ඩොන්බාස් කලාපයේ ගැටුම සාමකාමීව අවසන් කිරීමට සැලසුම් කර ඇති මින්ස්ක් ගිවිසුම් ක්‍රියාත්මක කිරීම අඩපණ කරන බවට රුසියාව යුක්රේනයට චෝදනා කරන අතර, බටහිර රටවල් යුක්රේනයට ප්‍රහාරයක් එල්ල කළහොත් දැවැන්ත ප්‍රතිවිපාක ඇතිවිය හැකි බවට රුසියාවට තර්ජනය කරයි.
උතුරු අත්ලාන්තික් ගිවිසුම් සංවිධානය (නේටෝ) තවදුරටත් නැගෙනහිර දෙසට ව්‍යාප්ත කිරීමට එරෙහිව සහ රුසියාවේ අසල්වාසීන්, විශේෂයෙන්ම යුක්රේනය තුළ ආයුධ යෙදවීමට එරෙහිව පැහැදිලි සහ ජාත්‍යන්තරව නෛතික ගිවිසුම් පිළිබඳ වහා සාකච්ඡා කරන ලෙසද පූටින් ඉල්ලා සිටී.
එම රැස්වීමේදීම කතා කරමින් රුසියානු ආරක්ෂක අමාත්‍ය සර්ජි ෂොයිගු පැවසුවේ එක්සත් ජනපදය රුසියානු දේශසීමා අසල 8,000ක පමණ භට පිරිසක් යොදවා ඇති බවත්, නේටෝ හිතවතුන් සමග එක්ව රුසියාවට ආසන්නව බෝම්බ හෙළන ප්‍රහාරක යානා මගින් නිතර ගුවන් ගමන් සිදුකරන බවත්ය.
ඒ අනුව නේටෝ සන්ධානයේ ක්‍රියාකාරකම්වලට යුක්‍රේන හමුදාව සම්බන්ධ කර ගැනීමට ඔවුන් දරන උත්සාහයන් ආරක්ෂක තර්ජනයක් බව ෂෝයිගු පැවසීය.
