රුසියානු ජනාධිපති ව්ලැදිමීර් පූටින් ඇතැම් විදේශ රාජ්‍යයන් සහ ජාත්‍යන්තර සංවිධානවල මිත්‍රශීලී නොවන ක්‍රියාවලට ප්‍රතිචාර වශයෙන් පළිගැනීමේ ආර්ථික සම්බාධක පිළිබඳ නියෝගයකට අත්සන් කර ඇති බව ක්‍රෙම්ලිනය පවසයි.
කෙසේ වෙතත් මෙම පියවර මගින් බලපෑමට ලක්වූ පුද්ගලයන් හෝ ආයතන පිළිබඳ විස්තර ලේඛනයක් සපයා නැතත්, මෙම නියෝගයට අනුව එකී පුද්ගලයන්ට සහ ආයතනවලට නිෂ්පාදන සහ අමුද්‍රව්‍ය අපනයනය කිරීම රුසියාව විසින් තහනම් කර තිබේ.
රුසියාවේ පළිගැනීමේ සම්බාධකවලට ගොදුරු වූ විදේශීය පුද්ගලයන් සහ සමාගම් සමග ගනුදෙනු කිරීමද නියෝගයෙන් තහනම් කර ඇති අතර, රුසියානු සගයන්ට ඔවුන් කෙරෙහි ඇති වගකීම් හෝ බැඳී සිටින කාර්යයන් ඉටු නොකිරීමටද අවසර ලබාදී ඇත.
මෙම ආඥාව යටතේ, අවසර ලබාදිය යුතු විදේශීය පුද්ගලයන් සහ සමාගම් ලැයිස්තු සම්පාදනය කිරීමට මෙන්ම, සීමා කිරීම්වලට යටත් විය හැකි ගනුදෙනු ගණනාවක් සඳහා අමතර නිර්ණායක නිර්වචනය කිරීමට රුසියානු රජය දින 10ක සහන කාලයක් ලබාදී ඇත.
මෙම පියවර බටහිරින් සම්බාධකවලට එරෙහිව මොස්කව්හි නවතම වටයේ පළිගැනීම් ක්‍රියාව බව කියයි. මොස්කව් පෙබරවාරි 24දා යුක්රේනයේ විශේෂ හමුදා මෙහෙයුමක් ලෙස විස්තර කරනලද ප්‍රහාරයෙන් පසු එක්සත් ජනපදය සහ යුරෝපා රටවල් ඇතුළු ඊට පක්ෂපාතී රාජ්‍යයන් රුසියාවට එරෙහිව දැඩි සම්බාධක පනවා ඇත.
එක්සත් ජනපදය, බ්‍රිතාන්‍යය, යුරෝපා සංගමයේ සාමාජික රටවල්, ජපානය, කැනඩාව, නෝර්වේ, සිංගප්පූරුව, දකුණු කොරියාව, ස්විට්සර්ලන්තය සහ යුක්රේනය ඇතුළුව රුසියාවට හිතවත් නොවන රටවල් සහ කලාප ලැයිස්තුවක් රුසියාව මාර්තු මාසයේදී නිකුත් කළේය.
අප්‍රේල් මාසයේදී පූටින් මිත්‍රශීලී නොවන රටවල් සහ කලාපවලට එරෙහිව වීසා සීමා පැනවීමේ නියෝගයකට අත්සන් කළේය.
