ෆයිසර් ප්‍රධාන විධායක ඇල්බට් බෝර්ලා පැවසුවේ කොවිඩ්-19 වසංගතයට එරෙහිව සටන් කිරීමේදී නිතර නිතර බූස්ටර එන්නත් ලබාදීමට වඩා වාර්ෂික කොවිඩ්-19 එන්නතක් වඩාත් සුදුසු බවයි.
ආසාදන ඉහළ යාමත් සමග ඇතැම් රටවල් කොවිඩ්-19 එන්නත් බූස්ටර් වැඩසටහන් පුළුල් කර හෝ ආරක්ෂාව වැඩි කිරීමට යුහුසුළු වීම නිසා එන්නත් අතර පරතරය කෙටි කර ඇත.
ඊශ්‍රායලයේ N12 ප්‍රවෘත්ති සමග සම්මුඛ සාකච්ඡාවකදී, බෝර්ලා ගෙන් අසන ලද්දේ සෑම මාස හතරකට හෝ පහකට වරක් නිතිපතා බූස්ටර් එන්නත් ලබාදීමට ඔහු අදහස් කරන්නේද යන්නයි.
"මෙය හොඳ අවස්ථාවක් වන්නේ නැහැ. මා බලාපොරොත්තු වන්නේ, ඔබට වසරකට වරක් ලබාදිය යුතු එන්නතක් ලබාදීමටයි" බෝර්ලා පැවසීය.
"වසරකට වරක් වුණොත් එය කිරීමට මිනිසුන්ට ඒත්තු ගැන්වීම පහසුයි. මිනිසුන්ට මතක තබා ගැනීමට පහසුයි. එබැවින් මහජන සෞඛ්‍ය දෘෂ්ටිකෝණයකින් එය පරමාදර්ශී තත්ත්වයක්. අපි ඔමික්‍රෝන් ප්‍රභේදය ආවරණය කරන සහ අනෙකුත් ප්‍රභේද අමතක නොවන එන්නතක් නිර්මාණය කළ හැකිද යන්න සොයා බලනවා. එය විසඳුමක් විය හැකියි" බෝර්ලා පැවසීය.
අධ්‍යයන තුනක් උපුටා දක්වමින්, එක්සත් ජනපදයේ රෝග පාලනය සහ වැළැක්වීමේ මධ්‍යස්ථාන සිකුරාදා පැවසුවේ, ඔමික්‍රෝන් සමග සටන් කිරීමට ෆයිසර් හි mRNA එන්නතෙහි තුන්වැනි මාත්‍රාව ප්‍රධාන වන බවත්, එය රෝහල්ගත වීමෙන් 90%ක ආරක්ෂාවක් සපයන බවයි.
කෙසේ වෙතත් ඔමික්‍රොන්වලට එරෙහිව සටන් කිරීම සඳහා ප්‍රතිනිර්මාණය කරන ලද එන්නතක් සඳහා අනුමැතිය සඳහා ගොනු කිරීමට ෆයිසර් සමාගම සූදානම් බවද බෝර්ලා පවසා ඇති අතර, එය මහා පරිමාණයෙන් නිෂ්පාදනය කරනු ඇති බවද සඳහන් කර තිබේ.
