බ්‍රිතාන්‍යයේ ප්‍රධාන විපක්ෂය වන කම්කරු පක්ෂයේ නායක කීර් ස්ටාමර් කොවිඩ්-19 සඳහා ධනාත්මක බව පරීක්‍ෂා කර ඇති බව වාර්තා වෙයි.

ස්ටාමර් දිනපතා කොවිඩ්-19 ඇන්ටිජන් පරීක්ෂාවක් සිදු කරන නමුත් ඔහු ධනාත්මක බව පරීක්‍ෂා කළ පළමු අවස්ථාව මෙය බව සඳහන් වේ.

පරීක්ෂණ ප්‍රතිඵලය හේතුවෙන්, බදාදා පස්වරුවේ බ්‍රිතාන්‍ය රජයේ නව අයවැය ලේඛනයට පුද්ගලිකව අභියෝග කිරීමේ අවස්ථාව ඔහුට මග හැරෙනු ඇති බවද කියයි.

ආසාදිත වීමෙන් පසු ඔහු දින 10 ක් ස්වයං හුදකලා වීමට සිදුවනු ඇත. ප්‍රාදේශීය මාධ්‍ය වාර්තාවලට අනුව, කොවිඩ්-19 වසංගතය ආරම්භයේ සිට ඔහුට ස්වයං හුදකලා වීමට සිදුවූ පස්වැනි අවස්ථාව මෙය වන අතර, පසුගිය ජූලි මාසයේදී ඔහුගේ එක් දරුවෙකුට කොවිඩ් ආසාදනය විය.

අඟහරුවාදා නිකුත් කරන ලද නිල සංඛ්‍යාලේඛනවලට අනුව බ්‍රිතාන්‍යයේ තවත් පුද්ගලයින් 40,954ක් වෛරසය සඳහා ධනාත්මක බව පරීක්‍ෂා කර ඇති අතර, රටේ සමස්ත කොවිඩ්-19 ආසාදිතයන් සංඛ්‍යාව 8,853,227ක් දක්වා ඉහළ ගොස් තිබේ.

එමෙන්ම වෛරසය ආශ්‍රිත මරණ 263ක්ද රට තුළ වාර්තා විය. බ්‍රිතාන්‍යයේ කොරෝනා වෛරස් ආශ්‍රිත මුළු මරණ සංඛ්‍යාව මේ වනවිට 139,834 කි.

බ්‍රිතාන්‍යයේ වයස අවුරුදු 12 සහ ඊට වැඩි පුද්ගලයින්ගෙන් 86%කට වැඩි ප්‍රමාණයක් ඔවුන්ගේ පළමු එන්නත් මාත්‍රාව ලබාගෙන ඇති අතර, 79%කට වැඩි පිරිසකට මාත්‍රා දෙකම ලැබී ඇති බව නවතම සංඛ්‍යාලේඛන පෙන්වා දෙයි.

ජීවිතය යථා තත්ත්වයට පත් කිරීම සඳහා, බ්‍රිතාන්‍යය, චීනය, ජර්මනිය, රුසියාව සහ එක්සත් ජනපදය වැනි රටවල් කොරෝනා වයිරස් එන්නත් ක්‍රියාත්මක කිරීමට කාලයට එරෙහිව තරඟ කරමින් සිටිති.