ජනාධිපතිවරණ ප්‍රචාරක රැළියක් අතරතුර බ්‍රසීල ජනාධිපති ජෙයර් බොල්සොනාරෝට පිහි ප්‍රහාරයක් එල්ල කළ පුද්ගලයා එම චෝදනාවලින් නිදහස් කර තිබේ.
අත්අඩංගුවට පත්ව සිටි පුද්ගලයා මානසික ව්‍යාධියකින් පෙළෙන්නකු බව අධිකරණය විසින් තීන්දු කිරීම නිසා මෙසේ නිදහස හිමිව ඇත. ඔහු පවසා ඇත්තේ දේව නියෝගයකට අනුව තමා එම ප්‍රහාරය එල්ල කළ බවය.
විනිසුරුවරයා කියා සිටියේ පිහි ඇනුම සිදුකළ අවස්ථාවේදී චූදිත ඇඩෙලියෝ බිස්පෝ ද ඔලිවෙරා තම ක්‍රියාව පිළිබඳ දැන නොසිට ඇති බවය.
එබැවින් බ්‍රසීල නීතිය යටතේ ඔහුට එරෙහිව නෛතික ක්‍රියාමාර්ග ගැනීමේ හැකියාවක් නොමැති බව අධිකරණය තීන්දු කළේය.
කෙසේ නමුත්, ඔලිවෙරා සම්බන්ධයෙන් පවතින ඉහළ අවදානම පිළිබඳ සලකා බලා ඔහු රඳවා තබා අගනිමින් අවශ්‍ය ප්‍රතිකාර ලබාදෙන ලෙස විනිසුරුවරයා වැඩිදුරටත් නියෝග කර ඇත.
කෙසේ වෙතත්, මෙම තීන්දුව අභියෝගයට ලක්කරන බව ජනාධිපති බොල්සොනාරෝ පවසා තිබේ. ඔහු එම පිහි ප්‍රහාරයෙන් ශල්‍යකර්ම කිහිපයකට ලක්වූ අතර, ඔහු පවසන්නේ මෙම ප්‍රහාරය පිටුපස සැබෑ ලෙසම දේශපාලන හස්තයක් සහ තවත් පුද්ගලයන් සිටින බවය.
