ඔමික්‍රෝන් වෛරස ප්‍රභේදය ප්‍රංශයේ නව තහවුරු කරන ලද කොවිඩ්-19 රෝගීන්ගෙන් 10%ක් දක්වා වගකිව යුතු බවට දැන් සැක කෙරෙන බවත්, මේ තත්ත්වය තුළ ඇතැම් පොදු ස්ථානවලට ඇතුළුවීම සඳහා දැඩි සෞඛ්‍ය අවශ්‍යතා සැලසුම් කිරීමට එය ප්‍රධාන හේතුව බවත් ප්‍රංශ සෞඛ්‍ය අමාත්‍ය ඔලිවියර් වේරන් සෙනසුරාදා පැවසීය.
ලබන වසර මුලදී හඳුන්වා දීමට නියමිත නව එන්නත් අවසර පත්‍රය මගින් අවන්හල්වලට සහ දිගු දුර පොදු ප්‍රවාහනයට ඇතුළු වීමට එන්නත් ලබාදී ඇති බවට සාක්ෂි පෙන්වීම අත්‍යවශ්‍ය වෙයි. වත්මන් රෙගුලාසි යටතේ, බොහෝ ගෘහස්ථ පොදු ස්ථානවලට ඇතුළු වීම සඳහා මෑත කාලීන සෘණාත්මක කොවිඩ්-19 පරීක්ෂණයක් ප්‍රමාණවත් විය.
වයස අවුරුදු 5 සිට 11 දක්වා ළමයින් සඳහා එන්නත් ලබාදීම ලබන සතිය මුලදී ආරම්භ කිරීමට අධිකාරිය අවසර දෙනු ඇතැයි අපේක්ෂා කරන බවද සෞඛ්‍ය අමාත්‍යවරයා පැවසීය. දැනට, එන්නත් ලබාදිය හැක්කේ බරපතල සෞඛ්‍ය තත්ත්වයන් හෝ අමතර සෞඛ්‍ය අවදානම් සහිත දරුවන්ට පමණි.
නව අවසර පත්‍රය සඳහා වන සැලසුම් සිකුරාදා අගමැති ජීන් කැස්ටෙක්ස් විසින් ප්‍රකාශයට පත් කරන ලදී. ඔහු යුරෝපයේ ඔමික්‍රෝන් ප්‍රභේදයේ ව්‍යාප්තිය "අකුණු පහරකට" සමාන කළ අතර, එය 2022 ආරම්භයේ සිට ප්‍රංශයේ ප්‍රමුඛතම ප්‍රභේදය වනු ඇති බවටද අනතුරු ඇඟවීය.
කැස්ටෙක්ස් පැවසුවේ මෙම ප්‍රභේදය පිළිබඳව බොහෝ දේ නොදන්නා නමුත්, එය ඩෙල්ටා ප්‍රභේදයට වඩා භයානක නොවන බව දැනට පෙනී යන බවයි. ඒ අනුව ලබාගත හැකි දත්තවලින් පෙනී යන්නේ බූස්ටර් මාත්‍රාව සමග සම්පූර්ණ එන්නත් ආවරණය රෝගයේ දරුණු ආකාරවලින් හොඳින් ආරක්ෂාව සපයනු ඇති බවද අගමැතිවරයා සඳහන් කළේය.
එසේම කොරෝනා වෛරසය පැතිරීම සීමා කිරීම සඳහා අලුත් අවුරුදු රාත්‍රියේ ගිනිකෙළි සහ ප්‍රසංග අවලංගු කරන ලෙස කැස්ටෙක්ස් පළාත් පාලන ආයතනවලින් ඉල්ලා සිටි අතර සැමරුම් අතරතුර පොදු මාර්ගවල මත්පැන් පානය කිරීම තහනම් කරන බව පැවසීය.
