නයිජීරියාවේ අගනුවර වන අබුජා හි බන්ධනාගාරයකට ප්‍රහාරයක් එල්ල කිරීමේදී අවම වශයෙන් රැඳවියන් 300ක් පලා ගොස් ඇති අතර එක් රැඳවියෙකු මිය ගොස් තවත් තිදෙනෙකු තුවාල ලබා තිබේ.

ප්‍රහාරකයින් අබුජා හි නිරිත දෙසින් පිහිටි කුජා ප්‍රදේශයේ බන්ධනාගාරයකට අඟහරුවාදා රාත්‍රියේ කඩා වැදී සිරකරුවන් 600ක් පමණ නිදහස් කර ඇතත්, පලා යන රැඳවියන් සංඛ්‍යාවෙන් අඩක් මේ වනවිට නැවත අත්අඩංගුවට ගෙන ඇති බව අභ්‍යන්තර කටයුතු අමාත්‍යාංශයේ ස්ථිර ලේකම් ෂුඅයිබු බෙගෝර් පැවසීය.

බෙගෝර් බදාදා එම ස්ථානයට ගිය අවස්ථාවේදී වාර්තාකරුවන්ට පැවසුවේ ප්‍රහාරයේදී එක් රැඳවියෙකු මිය ගොස් තවත් තිදෙනෙකු තුවාල ලැබූ බවත්, එය අන්තවාදී කණ්ඩායමක් වන බොකෝ හරාම් සටන්කාමීන් විසින් සිදු කළ බවට සැක කරන බවත්ය.

බොකෝ හරාම් ත්‍රස්ත සාමාජිකයන් සහ නඩු විභාගවලට පෙනී සිටින හෝ දැනටමත් වරදකරුවන් වූ ඉහළ පෙළේ රාජ්‍ය නිලධාරීන් ඇතුළු රැඳවියන් 994ක් අඟහරුවාදා අග ප්‍රහාරයට පෙර එම ස්ථානයේ සිටි බව ඔහු කීවේය.

"ඔවුන් බොකෝ හරාම් ත්‍රස්තවාදීන් බවත් විශේෂයෙන් ඔවුන්ගේ කුමන්ත්‍රණකරුවන් සඳහා පැමිණි බවත් අපට වැටහෙනවා. ඔවුන්ගෙන් බොහෝ දෙනෙක් ආපසු අල්ලා ගත්තා. සමහරක් ඔවුන් සැඟවී සිටි ලඳු කැලෑවලින් සොයා ගත්තා. සිරගෙයින් එළියට පැමිණි 600න් 300ක් පමණ අපි අල්ලාගෙන තිබෙනවා" නිලධාරියා පැවසීය.

නිවේදනයක් නිකුත් කරමින් නයිජීරියාවේ විශෝධන සේවයේ (NCS) ජාතික ප්‍රකාශක අබුබකර් උමර් පැවසුවේ ප්‍රහාරය ආරක්ෂක ආයතන විසින් සාර්ථකව මැඬපැවැත්වූ බවයි.