උතුරු කොරියාව පසුගිය සති අන්ත මිසයිල දියත් කිරීමකින් පසුව ඊට ප්‍රතිචාර ලෙස දකුණු කොරියාව සහ එක්සත් ජනපදය මිසයිල 08ක් එල්ල කිරීමෙන් පසු කොරියානු අර්ධද්වීපයේ න්‍යෂ්ටික ප්‍රශ්නය සම්බන්ධයෙන් සංයමයකින් කටයුතු කරන ලෙස චීනය මෙම රටවලට අවධාරණය කරයි.
"වර්තමාන තත්වයන් යටතේ, අදාළ පාර්ශ්වයන් සන්සුන්ව හා සංයමයෙන් කටයුතු කළ හැකි අතර ආතතීන් උත්සන්න කළ හැකි කිසිදු ක්‍රියාමාර්ගයක් ගැනීමෙන් වැළකී සිටිය හැකි යැයි අපි බලාපොරොත්තු වෙනවා" යනුවෙන් චීන විදේශ අමාත්‍යාංශයේ ප්‍රකාශක ෂාඕ ලිජියන් නිත්‍ය මාධ්‍ය හමුවකදී පැවසීය.
කොරියානු අර්ධද්වීපයේ සාමය සහ ස්ථාවරත්වය පවත්වා ගැනීමටත්, කොරියානු අර්ධද්වීපයේ ගැටලුව දේශපාලන සමථයකට පත් කිරීම ප්‍රවර්ධනය කිරීමටත් කටයුතු කළ යුතු අතර, එය සියලු පාර්ශ්වයන්ගේ පොදු අවශ්‍යතා ඉටු කරන බවත් ඔහු පැවසීය.
පෙර දින උතුරු කොරියාව විසින් සිදු කරන ලද මිසයිල දියත් කිරීම්වලට ප්‍රතිචාර වශයෙන් දකුණු කොරියාව සහ එක්සත් ජනපදය සඳුදා නැගෙනහිර මුහුදට බැලස්ටික් මිසයිල 08ක් එල්ල කළ බව දකුණු කොරියානු හමුදාව උපුටා දක්වමින් විදෙස් මාධ්‍ය වාර්තා කළේය.
