චීනය විසින් දියුණු කරන ලද mRNA කොවිඩ්-19 එන්නත මුල් අවධියේ මානව අත්හදා බැලීම්වලදී ආරක්ෂිත සහ ඵලදායී බව පෙන්වා දී ඇතැයි ලැන්සෙට් වෛද්‍ය සඟරාව අඟහරුවාදා ප්‍රකාශයට පත් කරන ලද අධ්‍යයනයකින් අනාවරණය කරයි.

SARS-CoV-2 ස්පයික් ප්‍රෝටීන් ප්‍රතිග්‍රාහක-බන්ධන හඳුනා ගන්නා ARCoV එන්නත, චීන හමුදා වෛද්‍ය විද්‍යා ඇකඩමිය සහ එරට තවත් සමාගම් දෙකක් එක්ව සංවර්ධනය කරන ලද එන්නතකි.

පර්යේෂකයන් විසින් 2020 ඔක්තෝබර් 30 සිට දෙසැම්බර් 02දා දක්වා නැගෙනහිර චීනයේ සේජියෑන්ග් පළාතේ හැන්ග්සෝ හි රෝහලකදී පළමු අදියර අත්හදා බැලීම් සිදුකර ඇත. SARS-CoV-2 සඳහා සෘණාත්මක බව පරීක්‍ෂා කළ වයස අවුරුදු 18ත් 59ත් අතර නිරෝගී වැඩිහිටියන් 120ක් මෙම අත්හදා බැලීම් සඳහා සහභාගී වී තිබුණි.

එන්නත් කිරීමේ ක්‍රියාවලියට මාත්‍රා දෙකක් ඇතුළත් වූ අතර, එන්නත් ප්‍රමාණ 5ක් පරීක්ෂණවලදී ඇගයීමට ලක්කර ඇත. එනම්, මයික්‍රොග්‍රෑම් 5, මයික්‍රොග්‍රෑම් 10, මයික්‍රොග්‍රෑම් 15, මයික්‍රොග්‍රෑම් 20 සහ මයික්‍රොග්‍රෑම් 25 වශයෙනි.

මෙම චීන එන්නතෙහි කාර්යක්ෂමතාව පරීක්ෂා කිරීම සඳහා වැඩි සහභාගිවන්නන් සමග බහු-කලාපීය තුන්වැනි අදියර මිනිස් අත්හදා බැලීමක් දැනට සිදුවෙමින් පවතී.

එහි සංවර්ධකයින්ට අනුව, ARCoV දියර සංයුතියක් ලෙස නිපදවන ලද අතර එය ප්‍රවාහනය සහ ලබාදීම සඳහා පහසු වන සම්මත ශීතකළ තත්ත්ව (සෙල්සියස් අංශක 2-8ත් අතර) තුළ ගබඩා කළ හැකි බව කියයි.