බහුපාර්ශ්විකත්වය ප්‍රගුණ කිරීම සහ සංවර්ධනය වෙමින් පවතින රටවල පොදු අවශ්‍යතා ආරක්ෂා කිරීම සඳහා කෙන්යාව සමග කටයුතු කිරීමට චීනය සූදානම් බව චීන රාජ්‍ය මන්ත්‍රී සහ විදේශ අමාත්‍ය වැන්ග් යී අවධාරණය කරයි.
කෙන්යානු විදේශ කටයුතු පිළිබඳ කැබිනට් ලේකම් රෙයිෂල් ඔමාමෝ සමග දුරකථන සංවාදයකදී වැන්ග් යී පැවසුවේ සමහර රටවල් බහුපාර්ශ්විකවාදයේ සහ ප්‍රජාතන්ත්‍රවාදයේ නාමයෙන් ඒකපාර්ශ්විකවාදය සහ ආධිපත්‍යය ක්‍රියාත්මක කරමින් පවතින යාන්ත්‍රණ සහ ජාත්‍යන්තර පිළිවෙලට වල කපන බවයි.
කෙන්යාව සැලකිය යුතු බලපෑමක් ඇති ප්‍රධාන අප්‍රිකානු රටක් ලෙස විස්තර කළ ඔහු, එය සැමවිටම ජාත්‍යන්තර තලයේ නිර්මාණාත්මක කාර්යභාරයක් ඉටුකර ඇති බවත්, ජාත්‍යන්තර සබඳතා පාලනය කරන මූලික ප්‍රමිතීන් ආරක්ෂා කිරීම සඳහා කෙන්යාව සමග ඒකාබද්ධ ප්‍රයත්න දැරීමට චීනය සූදානම් බවත් සඳහන් කළේය.
විශේෂයෙන්ම සංවර්ධනය වෙමින් පවතින රටවලට හැකි ඉක්මනින් කොවිඩ්-19 වසංගතයේ බලපෑමෙන් මිදීමට සහ ආර්ථික ප්‍රකෘතිය ප්‍රවර්ධනය කිරීමට ජාත්‍යන්තර ප්‍රජාව සහයෝගීතාව ශක්තිමත් කළ යුතු බවද කෙන්යාව විශ්වාස කරන බව ඔමාමෝ පැවසීය.
කෙන්යාව චීනයේ විස්තීර්ණ උපායමාර්ගික සහ සහයෝගී සහකරු බව සඳහන් කළ වැන්ග්, ද්විපාර්ශ්වික සබඳතා ඉතිහාසයේ හොඳම කාල පරිච්ඡේදයට අවතීර්ණ වී ඇති බව පැවසීය.
චීනයේ මූලික අවශ්‍යතා සම්බන්ධයෙන් කෙන්යාවේ ප්‍රබල සහයෝගය චීනය අගය කරන අතර චීන-අප්‍රිකා සහයෝගීතාව පිළිබඳ සංසදයේ (FOCAC) අටවැනි අමාත්‍ය සමුළුවේ ප්‍රතිඵල ක්‍රියාත්මක කිරීම වේගවත් කිරීම සඳහා කෙන්යාව සමග කටයුතු කිරීමට සූදානම් බව ඔහු පැවසීය.
අප්‍රිකානු රටේ චීන ආයතන, ව්‍යාපෘති සහ පුද්ගලයින්ගේ ආරක්ෂාව සහතික කරන ලෙස වැන්ග් කෙන්යාවෙන් ඉල්ලා සිටියේය.
පසුගිය වසරේ නොවැම්බරයේ පැවති FOCAC හි අටවැනි අමාත්‍ය සමුළුවේදී, අප්‍රිකාවට අතිරේක කොවිඩ්-19 එන්නත් මාත්‍රාව බිලියනයක් ලබා දීමටත්, අප්‍රිකාව සඳහා දරිද්‍රතාව පිටුදැකීම සහ කෘෂිකර්මාන්තය පිළිබඳ ව්‍යාපෘති 10ක් ක්‍රියාත්මක කිරීමටත්, අප්‍රිකාව සමඟ තවත් සහයෝගීතා වැඩසටහන් පැවැත්වීමටත් චීනය ප්‍රතිඥා දුන්නේය.
චීනය විසින් යෝජනා කරන ලද Global Development Initiative (GDI) සඳහා කෙන්යාවේ සහභාගීත්වය චීන පාර්ශවය අපේක්ෂා කරන බවද වැන්ග් පැවසීය.
ඔමාමෝ පැවසුවේ කෙන්යා-චීන සබඳතා උපායමාර්ගික වැදගත්කමක් ඇති බවත්, අන්‍යෝන්‍ය ප්‍රතිලාභ සහ ජයග්‍රාහී ප්‍රතිඵල සඳහා ආකෘතියක් සකසා ඇති බවත්ය.
චීනය අප්‍රිකාවේ වැදගත් උපායමාර්ගික හවුල්කරුවෙකු වන අතර, FOCAC හි අටවැනි අමාත්‍ය සමුළුවේදී ඇති කරගත් එකඟතාව ක්‍රියාත්මක කිරීම සඳහා කෙන්යාව සහ අනෙකුත් අප්‍රිකානු රටවල් චීනය සමග කටයුතු කිරීමට කැමැත්තෙන් සිටින බවද ඔමාමෝ පැවසීය.
කෙන්යාවේ ආර්ථික හා සමාජීය සංවර්ධනය සඳහා චීනය දක්වන සහයෝගය කෙන්යාව අවංකව අගය කරන අතර කෙන්යාවේ චීන ආයතන, ව්‍යාපෘති සහ පිරිස්වල ආරක්ෂාව සහතික කිරීම සඳහා ඵලදායී ක්‍රියාමාර්ග දිගටම ගන්නා බව ඔමාමෝ වැඩිදුරටත් පැවසීය.
