මධ්‍යම අප්‍රිකාවේ කැමරූන් රාජ්‍යයේ පැතිර යන කොලරා වසංගතයෙන් මේ වනවිට අවම වශයෙන් පුද්ගලයන් 34දෙනෙකු මියගොස් ඇති බව එක්සත් ජාතීන්ගේ මානුෂීය කටයුතු සම්බන්ධීකරණ කාර්යාලය (OCHA) ප්‍රකාශ කරයි.

වාණිජ අගනුවර වන ඩූවාලා පිහිටා ඇති ලිටෝරල් කලාපය ඇතුළුව අවම වශයෙන් කලාප හතරකට වසංගතය බලපා තිබේ.

නිරිතදිග කලාපයේ පුද්ගලයින් 28දෙනෙකු මියගොස් ඇති අතර තවත් 1,055දෙනෙකුට වසංගතය ආසාදනය වී ඇත. ලිටෝරල් කලාපයේ රෝගීන් 77ක් සහ මරණ 4ක් ඇති අතර, දකුණු කලාපයේ රෝගීන් 52ක් සහ මරණ 2ක් සහ ඈත උතුරු කලාපයේ රෝගීන් 8ක් වාර්තා වී ඇති බව OCHA පවසයි.

කොලරා රෝගීන් ප්‍රථම වරට ජනවාරි මස මුලදී රටේ ලිටෝරල් සහ නිරිතදිග ප්‍රදේශවල ප්‍රදේශවලින් වාර්තා විය.

පසුගිය සතියේ, කැමරූන් හි මහජන සෞඛ්‍ය අමාත්‍ය මලාචී මනාවුඩා ජනතාවගෙන් ඉල්ලා සිටියේ සෞඛ්‍ය සම්පන්නව සිටින ලෙසත්, ඕනෑම ආසාදනයක් රෝහලට වාර්තා කරන ලෙසත්ය.

එරට ජලයෙන් බෝවන රෝගය පැතිරීම නිරන්තරයෙන් දැකිය හැකි අතර, ප්‍රධාන වශයෙන් දුර්වල සනීපාරක්ෂාව සහ පිරිසිදු පානීය ජලය සඳහා ප්‍රවේශය නොමැතිකම ඊට හේතුව බව සෞඛ්‍ය බලධාරීන් පවසයි.

මලපහ හේතුවෙන් බෝවන කොලරාව උග්‍ර ජලීය පාචනය ඇති කරන අතර ප්‍රතිකාර නොකළහොත් පැය කිහිපයක් ඇතුළත මිය යා හැකිය.