යුක්රේනය පූර්ණ නේටෝ සාමාජිකයෙකු වුවහොත් ක්‍රිමියාවට ප්‍රහාර එල්ල කිරීමෙන් ලෝක යුද්ධයක් සඳහා පදනම සිදුවිය හැකි බව හිටපු රුසියානු ජනාධිපති දිමිත්‍රි මෙද්වදෙව් අනතුරු අඟවා තිබේ.
"අපට, ක්‍රිමියාව රුසියාවේ කොටසක්. එය සදහටම එසේ වනු ඇති. ක්‍රිමියාව ආක්‍රමණය කිරීමට දරන ඕනෑම උත්සාහයක් අපේ ජාතියට එරෙහි යුද්ධය ප්‍රකාශ කිරීමක් වෙනවා. නේටෝ සාමාජිකයෙකු එසේ කරන්නේ නම්, එය සමස්ත උතුරු අත්ලාන්තික් සන්ධානය සමග ගැටුමක් අදහස් කරනු ඇති. එනම් තුන්වැනි ලෝක යුද්ධයක්. සම්පූර්ණ ව්‍යසනයක ආරම්භයක්" මෙද්වෙදෙව් අවධාරණය කළේය.
2014 කියෙව්හි සිදු වූ කුමන්ත්‍රණයෙන් පසුව ක්‍රිමියාව යුක්රේනයෙන් වෙන් වූ අතර ජනමත විචාරණයකදී රුසියාවට නැවත සම්බන්ධ වීමට ඡන්දය දුන්නේය. මෙම පියවර යුක්රේනය විසින් ප්‍රතික්ෂේප කරන ලද අතර, අර්ධද්වීපය රුසියාව විසින් අත්පත් කරගත් භූමියක් ලෙස සලකයි. යුක්රේන බලධාරීන් පවසා ඇත්තේ රුසියානු භූමියට එරෙහිව බටහිරින් සපයන ලද ආයුධ භාවිත නොකරන බවට ඔවුන්ගේ ප්‍රතිඥාව ක්‍රිමියාවට අදාළ නොවන බවයි.
දැනට රුසියාවේ ආරක්ෂක කවුන්සිලයේ නියෝජ්‍ය සභාපති ලෙස කටයුතු කරන හිටපු ජනපති මෙද්වෙදෙව්, ෆින්ලන්තය සහ ස්වීඩනය නේටෝ කණ්ඩායමට එක්වීමට වඩා යුක්රේනය වෙත නේටෝව ව්‍යාප්ත කිරීම භයානක වන්නේ මන්දැයි අදහස් දක්වමින් මෙම සිද්ධිය විස්තර කළේය.
