ඔමික්‍රෝන් කොවිඩ්-19 වෛරසයේ ව්‍යාප්තියත් සමග ලොව බොහෝ රටවල් සිදුකරන සංචාරක සීමා කිරීම් සහ අනෙකුත් කොවිඩ්-19 වැළැක්වීම සහ පාලන පියවරයන් විද්‍යාව සහ ජාත්‍යන්තර සෞඛ්‍ය රෙගුලාසි (2005) මත පදනම්ව ක්‍රියාත්මක කළ යුතු බව අප්‍රිකාව සඳහා වන ලෝක සෞඛ්‍ය සංවිධානයේ (WHO) කලාපීය කාර්යාලය අවධාරණය කරයි.
ඔමික්‍රෝන් වෛරස ප්‍රභේදය පැතිරීම වැළැක්වීම සඳහා, බොහෝ රටවල් දකුණු අප්‍රිකාවේ සහ අනෙකුත් අප්‍රිකානු රටවලින් පැමිණෙන ගුවන් ගමන් සහ මගීන්ට ඇතුළුවීමේ සීමාවන් පනවා ඇති අතර වැළැක්වීමේ සහ පාලන පියවර වැඩි දියුණු කර ඇත.
"කොවිඩ්-19 පැතිරීම මඳක් අඩු කිරීම සඳහා සංචාරක සීමාවන් භූමිකාවක් ඉටු කළ හැකි නමුත් ජීවිත සහ ජීවනෝපායන් මත විශාල බරක් පටවනු ඇති" යැයි WHO හි අප්‍රිකාවේ කලාපීය අධ්‍යක්ෂිකා මට්ෂීඩිසෝ මොඑටි නිවේදනයක් නිකුත් කරමින් කියා සිටියේය.
"සීමාවන් ක්‍රියාත්මක කරන්නේ නම්, ඒවා අනවශ්‍ය ලෙස ආක්‍රමණශීලී නොවිය යුතු අතර, ජාතීන් 190 කට අධික සංඛ්‍යාවක් විසින් පිළිගත් ජාත්‍යන්තර නීතියේ නීත්‍යානුකූලව බැඳී ඇති මෙවලමක් වන ජාත්‍යන්තර සෞඛ්‍ය රෙගුලාසිවලට අනුව විද්‍යාත්මකව පදනම් විය යුතුයි." කොරෝනා වෛරසය පරාජය කළ හැක්කේ රටවල් එක්ව විසඳුම් සෙවීමෙන් පමණක් බව ඇය පෙන්වා දුන්නාය.
ලෝක සෞඛ්‍ය සංවිධානය නොවැම්බර් 26 වැනි දින සමහර රටවල මෑතකදී මතු වූ කොරෝනා වෛරසයේ ඔමික්‍රෝන් ප්‍රභේදය සඳහා විශේෂ රැස්වීමක් කැඳවූ අතර, එහිදී මෙම "ප්‍රභේදය අවධානයට ලක්වන වෛරස ප්‍රභේදයක්" ලෙස වර්ගීකරණය කරමින්, නිරීක්ෂණ සහ සෞඛ්‍ය රෙගුලාසි ශක්තිමත් කරන ලෙස රටවල්වලින් ඉල්ලා සිටියේය.
