ලොව ප්‍රමුඛ පෙළේ ටෙනිස් ක්‍රීඩක, සර්බියානු ජාතික නොවැක් ජොකොවික් එලැඹෙන ජනවාරි 17දා ආරම්භ වන ඔස්ට්‍රේලියානු විවෘත ටෙනිස් තරගාවලියට ක්‍රීඩා කිරීම සඳහා එන්නත් නීතිවලින් නිදහස් කිරීමක් සිදුවේවිද යන්න ගැන රට තුළ ආන්දෝලනයක් ඇති වී තිබේ.
ජොකොවික් එන්නත් ලබාගත්තේද නැද්ද යන්න පැහැදිලි නොමැතිව ඇත්තේ, ඔහුගේ සෞඛ්‍ය තොරතුරු ප්‍රසිද්ධ කර නොමැති බැවිනි.
කෙසේ වෙතත් ඔහු මීට පෙර පවසා තිබුණේ තමන් එන්නත් ලබාගැනීමට විරුද්ධ බවය. ඒ මතයේ ඔහු තවදුරටත් සිටී නම් ජෙකොවික් එන්නත් ලබාගෙන නොමැති විය යුතුය.
කෙසේ වෙතත් ඔස්ට්‍රේලියානු අගමැති ස්කොට් මොරිසන් පවසා ඇත්තේ, ජොකොවික්ට නිදහසේ රටට ඇතුළු වීමට නම් ඔහුගේ එන්නත්කරණය පිළිබඳ දත්ත ඉදිරිපත් කළ යුතු බවයි. එසේ නොමැති නම්, ඊළඟ ගුවන් යානයෙන් ඔහුට නැවතත් නිවෙස බලා ගිය හැකි බවත් අගමැතිවරයා සඳහන් කර තිබේ.
