නැගෙනහිර අප්‍රිකාවට අයත් උගන්ඩාවේ රෝගය වාර්තා වී මාසයකට පසු ඉබෝලා පැතිරීම ශීඝ්‍රයෙන් පරිණාමය වෙමින් පවතින බවත්, සෞඛ්‍ය සේවකයින් සඳහා දුෂ්කර තත්ත්වයක් උදාවී ඇති බවත් ලෝක සෞඛ්‍ය සංවිධානයේ (WHO) ඉහළ නිලධාරියෙක් පවසයි.
ග්‍රාමීය ගොවි ප්‍රජාව තුළ බෝවන රෝගය පැතිරයාමට පටන් ගෙන දින කිහිපයකට පසු සැප්තැම්බර් 20දා උගන්ඩාව ඉබෝලා රෝගය පැතිර යන බව ප්‍රකාශ කළේය.
ඉබෝලා රෝගය පුද්ගලයන් 64දෙනෙකුට ආසාදනය වී 24දෙනෙකු මිය ගොස් ඇතත්, නිල සංඛ්‍යාලේඛනවලට රෝගය පැතිරයාම තහවුරු වීමට පෙර ඉබෝලාවෙන් මිය ගිය පුද්ගලයින් ඇතුළත් නොවන බව එක්සත් ජාතීන්ගේ සෞඛ්‍ය ඒජන්සියේ අප්‍රිකාවේ කලාපීය අධ්‍යක්ෂ වෛද්‍ය මැට්ෂිඩිසෝ මොයිටි වාර්තාකරුවන්ට පැවසීය.
තහවුරු වූ රෝගීන්ගෙන් අවම වශයෙන් තිදෙනෙකු මධ්‍යම උගන්ඩාවේ වෛරස් උණුසුම් ස්ථානයේ සිට කිලෝමීටර් 150ක් පමණ දුරින් පිහිටි අගනුවර වන කම්පාලා වෙත ගමන් කළ බව මොයිටි සඳහන් කළේය. ඉබෝලා පැතිරීමේ කේන්ද්‍රස්ථානයෙන් බොහෝ දුරට පැතිර යා හැකි බවට ඇති බිය නිසා බලධාරීන් විසින් ඉබෝලා රෝගීන් වාර්තා කරන දිස්ත්‍රික්ක පහෙන් දෙකකට රාත්‍රී කාලයේ ඇඳිරි නීතිය ඇතුළු අගුලු දැමීමක්ද පනවා තිබේ.
ඉබෝලා “අප දකින සංඛ්‍යා රට තුළ සහ එහි අසල්වැසියන් තුළ පැතිරීමේ අවදානමක් ඇති කරනවා” යනුවෙන් අප්‍රිකානු රෝග පාලනය සහ වැළැක්වීමේ මධ්‍යස්ථානවල වැඩ බලන ප්‍රධානී වෛද්‍ය අහමඩ් ඔග්වෙල් බ්‍රහස්පතින්දා වෙනම සාකච්ඡාවකදී පැවසීය.
ඉබෝලා බෝවන්නේ ආසාදිත පුද්ගලයෙකුගේ ශරීර තරල හෝ දූෂිත ද්‍රව්‍ය සමග ස්පර්ශ වීමෙනි. උණ, වමනය, පාචනය, මාංශ පේශි වේදනාව සහ සමහර විට අභ්‍යන්තර හා බාහිර රුධිර වහනය රෝග ලක්ෂණ වේ.
2000 වසරේදී උගන්ඩාවේ 200කට වැඩි පිරිසක් මිය ගිය එක් ඉබෝලා වසංගතයක් ඇතුළුව බහුවිධ ඉබෝලා පැතිරීම් වාර්තා විය. බටහිර අප්‍රිකාවේ 2014 සිට 2016 දක්වා ඉබෝලා පැතිරීම හේතුවෙන් පුද්ගලයින් 11,000කට වැඩි පිරිසක් මිය ගිය අතර එය රෝගයේ විශාලතම මරණ සංඛ්‍යාව විය.
ඉබෝලා 1976 දී දකුණු සුඩානයේ සහ කොංගෝවේ එකවර පැතිර යාමක් සමග සොයා ගන්නා ලද අතර, එය ඉබෝලා ගඟ අසල ගම්මානයක ඇති වූ හෙයින්, එම නමින් හැඳින්වීය.
