රුසියාව තවදුරටත් යුක්රේනය ආක්‍රමණය නොකරන්නේ නම්, ප්‍රංශයේ මැදිහත්වීමෙන් සිදුකිරීමට බලාපොරොත්තු වන රුසියානු ජනාධිපති ව්ලැඩිමීර් පූටින් සමග සමුලු සාකච්ඡා සඳහා ජනාධිපති ජෝ බයිඩන් ප්‍රතිපත්තිමය වශයෙන් එකඟ වී ඇති බව ධවල මන්දිරය පවසයි.
මාධ්‍ය ලේකම් ජීන් පාස්කිට අනුව, එක්සත් ජනපද රාජ්‍ය ලේකම් ඇන්තනී බ්ලින්කන් සහ රුසියානු විදේශ අමාත්‍ය සර්ජි ලැව්රෝව් පෙබරවාරි 24 වැනි දින හමුවීමෙන් පසුව මෙම හමුව සිදුවනු ඇත.
කෙසේ වෙතත්, ප්‍රකාශයක් නිකුත් කරමින් පාස්කි කියා සිටියේ, පූටින් ඉක්මනින් ආක්‍රමණයක් දියත් කළ හැකි බවට එක්සත් ජනපද නිලධාරීන් පවසා ඇති ඉහළ සම්භාවිතාවට අනුව, රැස්වීමක් සැබවින්ම ක්‍රියාත්මක වීමේ අපේක්ෂාවන් තවම නිශ්චිතව ප්‍රකාශ කළ නොහැකි බවයි.
"අපි සෑමවිටම රාජ්‍ය තාන්ත්‍රික කටයුතු සඳහා සූදානම්. රුසියාව ඒ වෙනුවට යුද්ධය තෝරාගතහොත් ඉක්මන් හා දරුණු ප්‍රතිවිපාක පැනවීමටද අපි සූදානම්. දැනට රුසියාව ඉතා ඉක්මනින් යුක්රේනයට දැවැන්ත ප්‍රහාරයක් සඳහා අඛණ්ඩව සූදානමින් සිටින බව පෙනෙනවා" පාස්කි නිවේදනයක් නිකුත් කරමින් කියා සිටියේය.
ප්‍රංශයේ එල්සී මාලිගයේ ප්‍රකාශයකට අනුව, යෝජිත සමුලුව ප්‍රංශ ජනාධිපති එමානුවෙල් මැක්‍රෝන් විසින් බයිඩන් සහ පූටින් සමග නැවත නැවතත් දුරකථන ඇමතුම්වලදී යෝජනා කරන ලද සමුළුවකි.
