කටාර් හි පැවැත්වෙන මෙවර ලෝක කුසලාන තරඟාවලිය සඳහා ප්‍රවේශපත් මිලියන 1.2කට ආසන්න ප්‍රමාණයක් අලෙවි වී ඇති බව සංවිධායකයන් පළමු වරට විකුණුම් පිළිබඳ සංඛ්‍යාවක් ඉදිරිපත් කරමින් අනාවරණය කළේය.
ප්‍රධාන සංවිධායක හසන් අල්-තවාඩි පැවසුවේ මැද පෙරදිග පැවැත්වෙන පළමු වැනි ලෝක කුසලාන තරඟාවලියට නොවැම්බර්-දෙසැම්බර් සඳහා වාර්තා බිඳ හෙලන ඉල්ලුමක් පවතින බවයි. "මම හිතන්නේ දැනටමත් ටිකට්පත් මිලියන 1.2ක් පමණ මිලදී ගෙන ඇති" ඔහු කටාර් ආර්ථික සංසදයේදී පැවසීය.
මෙම සංඛ්‍යාව සංවිධායක කමිටු නිලධාරීන් විසින් තහවුරු කරන ලද අතර, ඔවුන් පැවසුවේ මාර්ගගත විකුණුම් අදියර දෙකේදී මිලියන 40ක් පමණ ඉල්ලීම් ඇති බවයි.
ප්‍රවේශපත්‍ර මිලියන දෙකක් සම්පූර්ණයෙන් අලෙවි කෙරෙන අතර, තවත් මිලියනයක් ලෝක FIFA සහ අනුග්‍රාහකයින් සඳහා වෙන්කර ඇත.
මිලියන 2.4 ක පමණ ජනගහනයක් සිටින කටාර් අගනුවර වන දෝහා, හෝටල් නවාතැන් අතිශයින් හිඟ වීමත් සමග අමුත්තන්ගේ විශාල ගලාඒමක පෙරනිමිති පෙන්වා තිබේ.
කණ්ඩායම් 32කින් සමන්විත මෙම තරගාවලිය යටිතල පහසුකම් සඳහා විශාල පීඩනයක් එල්ල කරමින් අගනුවර සහ ඒ අවට ක්‍රීඩාංගණ අටකදී පැවැත්වීමට නියමිතය.
හෝටල්, මහල් නිවාස, කෲස් නැව් සහ කාන්තාර කඳවුරුවල කාමර 130,000ක් දැනටමත් සූදානම් කර ඇති අතර, එහි සම්ප්‍රදායික කූඩාරම් 1,000ක් තිබෙන බවත් කටාර් රාජ්‍යය පවසයි. එහිදී රාත්‍රියකට ඩොලර් 85ක් වැනි සුළු මුදලකට හවුල් කාමර ලබා දීමට පොරොන්දු වී ඇත.
දෛනිකව ෂටල් ගුවන් ගමන් 160කට වඩා අසල්වැසි රටවලින් රසිකයින් ගෙන්වා ගන්නා අතර, එය නවාතැන් සඳහා ඇති පීඩනය ලිහිල් කරන බවත්, දෝහා හි ජාත්‍යන්තර ගුවන් තොටුපල දෙකෙහි ධාරිතාව දෙගුණ කර ඇති බවත් සංවිධායකයෝ වැඩිදුරටත් පවසති.
