“ඉසුරු සවිය’‘ නමැති සැමරුම් උත්සවය සඳහා සමුපකාර අරමුදලින් මුදල් වැය කරන ලදැයි කියන සිද්ධියක් සම්බන්ධයෙන් සැකපිට අත්අඩංගුවට ගත් රාජ්‍ය පරිපාලන අමාත්‍යාංශයේ හිටපු ලේකම්වරයකු වූ ප්‍රියන්ත මායාදුන්නේ මහතා ඇප මත මුදාහැරීමට කොටුව මහේස්ත්‍රාත් නිලුපුලී ලංකාපුර මහත්මිය අද (30දා) නියම කළාය.
වසර 14ක කාලයකට පෙර කුරුණෑගල ප්‍රදේශයේ පවත්වා ඇති සැමරුම් උත්සවය සඳහා සමුපකාර අරමුදලින් මුදල් වැය කරන ලදැයි කියමින් සැකපිට අත්අඩංගුවට ගෙන අධිකරණයට ඉදිරිපත් කළ අවස්ථාවේදී ඉදිරිපත් වු කරුණු සැලකිල්ලට ගනිමින් රුපියල් ලක්‍ෂ 02 බැගින් වටිනා ඇපකරුවන් දෙදෙනෙකුගේ ශරීර ඇප මත සැකකරු මුදාහැරීමට මහෙස්ත්‍රාත්වරිය විසින් එසේ නියම කරන ලදි.
සිද්ධියට අදාළව කරන ලද විමර්ශනවල උධෘත පරීක්‍ක්‍ෂා කිරීමෙන් අනතුරුව නීතිපතිවරයා විසින් දෙන ලද උපදෙස්වලට අනුව ඊයේ පෙරවරුවේ අත්අඩංගුවට ගන් ලැබූ ප්‍රියන්ත මායාදුන්නේ මහතා ඊයේ පස්වරුව වන විට අධිකරණයට ඉදිරිපත් කෙරිණ.
සැකකරු අධිකරණයට ඉදිරිපත් කළ රහස් පොලිස් නිලධාරීහු සිද්ධියට අදාළව කරන ලද විමර්ශනවල ප්‍රගතිය දැක්වෙන වාර්තාවක්ද අධිකරණයට ඉදිරිපත් කරමින් 2011 වසරේදී ජාත්‍යන්තර සමුපකාර දිනය සැමරීම වෙනුවෙන් කුරුණෑගල පවත්වා ඇති ඉසුරු සවිය නම් සැමරුම් උත්සවය සඳහා සමුපකාර අරමුදලින් මුදල් වැය කිරීම සම්බන්ධයෙන් කළ විමර්ශනවලට අදාළ උධෘත පරීක්‍ෂා කිරීමෙන් අනතුරුව නීතිපතිවරයා දුන් උපදෙස් මත සැකකරු අත්අඩංගතුවට ගත් බව දැනුම් දුන්හ.
සැකකකරු වෙනුවෙන් පෙනී සිටි නීතිඥවරු කරුණු දක්වමින් මීට වසර 14කට පෙර වූ සිද්ධියක් සම්බන්ධයෙන් අත්අඩංගුවට ගත් තම සේවාදායකයාට ඇප නියම කරන්නැයි ඉල්ලා සිටියහ. කරුණු සලකා බැලීමෙන් අනතතුරුව සැකකරුට ඇප නියම කළ මහෙස්ත්‍රාත්වරිය සිද්ධියට අදාළව කරන විමර්ශනවල ප්‍රගතිය අධිකරණයට වාර්තා කරන ලෙස රහස් පොලීසියට නියම කළාය.
