අයවැයෙන් කප්පාදු කිරීමට යෝජනා කර තිබෙන සෞඛ්‍ය සේවකයන්ගේ දීමනා ගැටලුවලට අද(03දා) විසඳුම් නොලැබුණ හොත් 06 වැනි දින පැය 24 ක වැඩ වර්ජනයක් සිදුකරන බව සෞඛ්‍ය වෘත්තීයවේදීන්ගේ සම්මේලනය සඳහන් කරයි.
මෙම වැඩ වර්ජනය අතුරු වෛද්‍ය හා පරිපූරක වෛද්‍ය සේවාවලට අයත් පිරිස් විසින් සිදුකරන බවත් මිට සමගාමීව අදාළ ඉල්ලීම් මුල්කර ගෙන හෙද නිලධාරින් විරෝධතා ව්‍යාපාර පැවැත් වීමට සැලසුම් කර තිබෙන බවද එම සම්මේලනයේ සමකැඳවුම්කරු රවී කුමුදේශ් මහතා සඳහන් කළේය.
අදාළ ගැටලු විසඳීමට සෞඛ්‍ය අමාත්‍යවරයා පසුගිය 24 වැනි දින සතියක කාලයක් ඉල්ලා සිටියත් අදාළ ගැටලු විසඳීමට අවශ්‍ය කිසිදු ක්‍රියා මාර්ගයක් මේ වන තෙක් ගෙන නොමැති බවත් ඔහු පවසා සිටියේය.
අයවැය යෝජනාවලින් සෞඛ්‍ය වෘත්තීයවේදීන්ට දීමනා ලබා දීමේදී අසාධාරණයක් සිදුව ඇති බවට සෞඛ්‍ය ඇමතිවරයා එදින පිළිගත් බවත්, මේ අනුව මුදල් අමාත්‍යාංශය සහ රජය සමග සාකච්ඡා කර ගැටලුව විසඳීමට සතියක කාලයක් ඉල්ලා සිටි බවත් හෙතෙම පැවසීය.
තවමත් අදාළ ගැටලුවට විසදුම් ලබා දීමට ස්‍යෙඛ්‍ය අමාත්‍යවරයා ඇතුළු බලධාරීන් කටයුතු කර නොමැති බවද අදාළ ඉල්ලීම් දිනාගැනීම සඳහා හෙද, පරිපූරක, අතුරු වෛද්‍ය සේවාවල වෘත්තීය සමිති විස්සක් මේ වන විට ඒකාබද්ධ වී කටයුතු කරන බවද රව කුමුදේශ් මහතා සඳහන් කළේය.
පරිපූරක වෛද්‍ය, හෙද, අතුරු වෛද්‍ය වෘත්තිකයන් විසින් මෙතෙක් භුක්ති විඳි අතිකාල, රේට් අගයට ලබා දීම සහ නිවාඩු දින දීමනාවලට අදාළව අයවැයෙන් සිදු කළ වෙනස නිවැරදි කළ යුතු බවද ඔහු පවසා සිටියේය.
අයවැයෙන් සිදු කළ වෙනස ක්‍රියාත්මක වුවහොත් අප්‍රේල් මාසයේ සිට සෞඛ්‍ය සේවකයන්ට මාසයකට රු.10000-රු.20000 අතර මුදලක් අහිමි වී යන බවද හෙතෙම පෙන්වා දුන්නේය.
සෞඛ්‍ය වෘත්තිකයන්ට නිවාඩු දිනවල වැඩ කිරීම වෙනුවෙන් දශක දෙකකට වැඩි කාලයක් තිස්සේ ගෙවූ, දිනකට මාසික වැටුපෙන් විස්සෙන් එකක දීමනාව, තිහෙන් එක දක්වා අඩු කර තිබෙන බවත්, පරිපූරක වෛද්‍ය හා හෙද සේවාවේ අතිකාල පැයක් සඳහා ගෙවූ, මාසික වැටුපෙන් එකසිය හැටෙන් එකක අතිකාල දීමනාව, දෙසීයෙන් එක දක්වා අඩු කර තිබෙන බවත් ඔහු සඳහන් කළේය.
පරිපූරක වෛද්‍ය, හෙද, අතුරු වෛද්‍ය වෘත්තිකයන් විසින් වසර විස්සකට වැඩි කාලයක් මෙම වරප්‍රසාද භුක්ති විඳින බවද හෙතෙම පවසා සිටියේය.
පොදු චක්‍රලේඛ ප්‍රතිපාදන හරහා ලබා දී ඇති සහ මෙතෙක් කිසිදු රජයක් කප්පාදු නොකළ සතිඅන්ත හා නිවාඩු දින දීමනා රේට් අගය වන 1/20 හා අතිකාල දීමනා වශයෙන් ලබාදුන් මුදල නොවෙනස්ව ලබා දිය යුතු බවද සඳහන් කළේය.
