ආකර්ෂණීය පොලී මුදලක් ලබා දෙන බවට මුහුණු පොත ඔස්සේ දැන්වීම් පළ කරමින් දිවයිනේ විවිධ ප්‍රදේශවල පුද්ගලයන් රවටමින් රු.ලක්ෂ 450කට ආසන්න මුදලක් වංචා ලෙස ලබා ගත් කාන්තාවක් ඊයේ (09දා) අත්අඩංගුවට ගෙන අද (10දා)අධිකරණයට ඉදිරිපත් කිරිමෙන් අනතුරුව මේ මස 18 වැනි දින දක්වා රක්ෂිත බන්ධනාගාරගත කිරීමට හැටන් මහේස්ත්‍රාත් එම්.ෆරුක්ඩීන් මහතා නියෝග කළේය.
මෙසේ රක්ෂිත බන්ධනාගාර ගත කරනු ලැබුවේ බදුල්ල කන්දේගෙදර ප්‍රදේශයේ පදිංචිව සිටි දිලිනි ශාමේන් සොක්මන් (31) නැමති තිදරු මවකි.
සැකකාර කාන්තාව හැටන් ප්‍රදේශයේ කාන්තාවකගෙන් මේ ආකාරයකට රු.ලක්ෂ පහක මුදලක් ලබා ගෙන එම මුදලට පොලිය හෝ ලබාගත් මුදල නොගෙවීම සම්බන්ධයෙන් මුදල් ලබා දුන් කාන්තාව විසින් හැටන් පොලීසිය වෙත කරන ලද පැමිණිල්ලක් මත එම කාන්තාව හැටන් පොලීසිය මගින් අත්අඩංගුවට ගෙන හැටන් මහේස්ත්‍රාත් අධිකරණය වෙත ඉදිරිපත් කිරිමෙන් පසු දැඩි ඇප කොන්දේසි මත මුදාහැර සිට ඇත.
ඇය සෑම මසකම අවසන් ඉරු දින හැටන් පොලීසියේ අපරාධ විමර්ශන අංශයේ පෙනී සිට අත්සන් කළ යුතුව ඇතත්, එසේ අත්සන් නොකර මාස පහක් තිස්සේ නඩුවාර තුනක් මගහැර සිටිම හේතුව මත වරෙන්තු ලබා සිටි සැකකාරිනියක් බව හැටන් පොලීසිය පවසයි.
සිය සැමියාගෙන් සහ දරුවන්ගෙන් වෙන් වී මහනුවර තැන්නේගෙදර සැඟව සිට ඇති සැකකාර කාන්තාව ඇගේ යෙහෙළියක් හමුවීමට දුම්රියෙන් ඊයේ (09දා) පස්වරුවේ හැටන් දුම්රිය ස්ථානයට පැමිණෙන බවට හැටන් පොලීසියේ පාලන අංශයේ ස්ථානාධිපති පොලිස් පරීක්ෂක නිශාන්ත ද සිල්වා මහතා වෙත ලද තොරතුරක් මත හැටන් කොට්ඨාස භාර පොලිස් අධිකාරි ප්‍රදීප් වීරසේකර සහ හැටන් මූලස්ථාන ප්‍රධාන පොලිස් පරීක්ෂක රංජිත් ජයසේන යන මහතුන්ගේ අධීක්ෂණය යටතේ සැකකාරිනිය හැටන් දුම්රිය ස්ථානයේ දී අත්අඩංගුවට ගෙන අධිකරණය වෙත ඉදිරිපත් කර ඇත.
සැකකාරිනිය හැටන්, ගම්පොල, වැලිකඩ, වැල්ලවාය, දඹුල්ල, මහනුවර, බුත්තල ඇතුළු දිවයිනේ තවත් ප්‍රදේශ රැසක පුද්ගලයන්ගෙන් මෙවැනි ආකාරයට රවටමින් මුදල් ලබාගත් බවත් එම මුදල් ලබා දුන් අය විසින් හැටන් පොලීසිය වෙත දුරකථනය ඔස්සේ සම්බන්ධ වෙමින් තොරතුරු ලබා දුන් බවත්, මුදල් ලබා දුන් පුද්ගලයන් විසින් ඔවුන් පදිංචි පොලිස් ස්ථානවල පැමැණිලිකර ඇති බවට තොරතුරු ලබා දුන් බවත් හැටන් පොලීසිය කියයි.
සැකකාර කාන්තාව විවිධ පුද්ගලයන්ගෙන් ලබාගත් මුදලට විශ්වාසය තහවුරු කර ගැනීම සඳහා මාස කිහිපයක් පොරොන්දු වූ පොලී මුදලද ගෙවා ඇති අතර , මෙසේ වංචාකර ලබා ගත් මුදල්වලින් ස්වර්ණාභරන ව්‍යාපාරයක් සිදු කිරිම සඳහා සැකකාරිනිය ඉන්දියාවට ගොස් ඇති බවද ඇය විසින් පාපොච්චාරණය කර ඇති බව හැටන් පොලීසිය කියයි.
