බූස්ස බන්ධනාගාරයේ විශ්‍රාමික අධිකාරීවරයාට පසුගියදා සිය නිවස ඉදිරිපිට දී වෙඩි තබා ඝාතනය කළ වෙඩික්කරු ව්‍යාජ ගමන් බලපත්‍රයක් භාවිතා කරමින් තායිලන්තය වෙත පැන යාමට කටුනායක ගුවන් තොටුපොළ වෙත පැමිණ සිටියදී 04/15 දින උදෑසන අපරාධ පරීක්ෂණ දෙපාර්තමේන්තු නිලධාරීන් පිරිසක් විසින් අත් අඩංගුවට ගෙන තිබේ .
මෙම අත්අඩංගුවට ගැනීම සදහා කටුනායක ගුවන් තොටුපොළ පිටත්වීමේ පර්යන්තයේ ස්ථාපිත කර ඇති '' මුහුණු හදුනා ගැනීමේ පද්ධතිය " (Face Recognize System ) අපරාධ පරීක්ෂණ දෙපාර්තමේන්තු නිලධාරීන් විසින් සහාය කර ගෙන තිබුණි .
31 හැවිරිදි අම්බලන්ගොඩ , කුළීවත්ත ප්‍රදේශයේ පදිංච් විජේමුනි ලලන්ත ප්‍රීතිරාජ් කුමාර නැමති මොහු දකුණේ සංවිධානාත්මක අපරාධ කල්ලි නායක " කරන්දෙණිය සුද්දා " නැමති අයගේ ප්‍රධාන වෙඩික්කරු ලෙස කටයුතු කරමින් සිටි පුද්ගලයා බව පොලීසිය විසින් අනාවරණය කරගෙන තිබේ .
ඒකනායක මුදියන්සේලාගේ ලකිඳු සංදීප් බණ්ඩාර නැමති ව්‍යාජ නමකින් සකස් කළ ගමන් බලපත්‍රයක් යොදා මොහු රටින් පැන යාම සදහා භාවිතා කර තිබූ අතර මොහු ගාල්ල සහ අම්බලන්ගොඩ පොලිස් බල ප්‍රදේශ වල මිනීමැරුම් සහ මූල්‍ය වංචා රාශියක් සදහා ද පොලීසියට අවශ්‍යව සිටි අයෙකි .
මොහු 04/15 දින උදෑසන 07.50 ට තායිලන්තයේ බැංකොක් නුවර බලා පිටත්ව යන ශ්‍රී ලන්කන් ගුවන් සේවයේ යූ.එල්.- 404 දරන ගුවන් යානය සදහා කටුනායක ගුවන් තොටුපොළ වෙත පැමිණ තිබුණි .
මෙසේ අත් අඩංගුවට ගත් මෙම වෙඩික්කරුවා 04/15 දින උදෑසන 10.00ට පමණ අම්බලන්ගොඩ මුලස්ථාන පොලිසියේ ස්ථානාධිපතිවරයා ඇතුළු නිලධාරීන් පිරිසක කටුනායක ගුවන් තොටුපොළ වෙත පැමිණ රැගෙන ගොස් තිබේ .
