පළාත් පාලන ආයතන ඡන්ද විමසීම් ආඥාපනත යටතේ දිවයිනේ පරිපාලන දිස්ත්‍රික්ක 25 සඳහා තේරීම්භාර නිලධරයන් හා සහකාර තේරීම්භාර නිලධරයන් පත්කරමින් මැතිවරණ කොමිෂන් සභාව විසින් අති විශේෂ ගැසට් නිවේදයක් නිකුත් කරයි.
මේ අනුව ඒ ඒ දිස්ත්‍රික්කයන්හි තේරීම්භාර නිලධරයා ලෙස ඒ ඒ දිස්ත්‍රික්කයේ දිස්ත්‍රික් ලේකම් /දිසාපති පත්කර තිබේ.
සහකාර තේරීම්භාර නිලධාරීන් ලෙස කොළඹ සහ ගම්පහ දිස්ත්‍රික්ක සඳහා එම දිස්ත්‍රික්කයන්හි නියෝජ්‍ය මැතිවරණ කොමසාරිස්/සහකාර මැතිවරණ කොමසාරිස්ද, කළුතර ,මහනුවර ,ගාල්ල ,කුරුණෑගල සහ රත්නපුර දිස්ත්‍රික්ක සඳහා ඒ ඒ දිස්ත්‍රික්කයන්හි නියෝජ්‍ය මැතිවරණ කොමසාරිස්වරුද සෙසු දිස්ත්‍රික්ක සඳහා එම දිස්ත්‍රික්කවල සහකාර මැතිවරණ කොමසාරිස්වරුද පත්කරනු ලැබ සිටිති .
පළාත් පාලන මැතිවරණ ආඥා පනතේ 4(1) වගන්තියෙන් මැතිවරණ කොමිෂන් සභාව වෙත පැවරී ඇති බලතල ප්‍රකාරව මෙම පත්කිරීම් සිදුකරන බව 2025 පෙබරවාරි 28 දාතමින් නිකුත් කරන ලද මෙම අතිවිශේෂ ගැසට් නිවේදනයෙන් ප්‍රකාශයට පත්කර ඇත.
