පකිස්තානයේ පැවති 04 වන දෘශ්‍යාබාධිත විස්සයි විස්ස  ලෝක කුසලාන ශූරතා තරගාවලියට සහභාගී වූ ශ්‍රී ලංකා දෘශ්‍යාබාධිත ක්‍රිකට් කණ්ඩායම එම තරගාවලියේ තුන් වන ස්ථානය දිනා ගෙන 12/05 දින අලුයම කටුනායක ගුවන් තොටුපොළ වෙත පැමිණියහ .

මෙම තරගාවලිය ඉකුත් 11/23 දින සිට 12/03 දක්වා ලෝකයේ රටවල් 07 ක් නියෝජනය කළ දෘශ්‍යාබාධිත ක්‍රිකට් කණ්ඩායම් වල සහභාගීත්වයෙන් පාකිස්තානයේ මුල්ටාන් නුවර පවත්වා තිබුණි .

තරගාවලියේ වීරයා ලෙස ශ්‍රී ලංකා දෘශ්‍යාබාධිත ක්‍රිකට් කණ්ඩායමේ දමිත් සදරුවන් ක්‍රීඩකයා නම් කර තිබූ අතර , මෙම තරගාවලියේ පැවති තරග තුනකදීම , අප ශ්‍රී ලංකා දෘශ්‍යාබාධිත ක්‍රිකට් කණ්ඩායමේ සාමාජිකයන් තිදෙනකු එම තරග වල වීරයා ( Man of the Match ) සම්මානය දිනා ගැනීමට ද සමත් වී තිබුණි .

 ශ්‍රී ලංකා කණ්ඩායම 12/05 දින අලුයම 12.45 ට ඩුබායි සිට පැමිණි ෆ්ලයි ඩුබායි ගුවන් සේවයේ එෆ්.ඉසෙඩ් -549 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණි .

මොවුන් පිළිගැනීම සදහා මෙම ක්‍රීඩකයින්ගේ ඥාතීන් පිරිසක් කටුනායක ගුවන් තොටුපොළ වෙත පැමිණ සිටියද , ඔවුන් වෙත පැවති මූල්‍ය දුෂ්කරතා නිසා , ඔවුන් ගුවන් තොටුපොළ පැමිණීමේ පර්යන්තය වෙත ඇතුළු නොවී සිටියහ.