දුම්පානය කරන ප්‍රමාණය මේ වන විට සැලකි යුතු ප්‍රමාණයකින් අඩු වී තිබෙන බවත්, මේ අනුව දුම්වැටි භාවිතය අවම වන රටවල් අතර මෙරට ප්‍රමුඛ රටක් බවට පත්වෙමින් තිබෙන බවත් මද්‍යසාර සහ මත්ද්‍රව්‍ය තොරතුරු මධ්‍යස්ථානය (ADIC) සඳහන් කරයි.

2023 වසරේදී මෙරට තුළ දුම්වැටි මිලියන දෙදහස් දෙසිය විසිඅටක් භාවිත කර තිබෙන බවත්, එහෙත් පසුගිය වසරේදා භාවිත කර තිබෙන්නේ දුම්වැටි මිලියන එක්දහස් අටසිය තිස්දෙකක ප්‍රමාණයක් බවද එම සංවිධානයේ විධායක අධ්‍යක්ෂ සම්පත් ද සේරම් මහතා සඳහන් කළේය.

මේ අනුව 2023 වසරට සාපේක්ෂව 2024 දී දුම්වැටි භාවිතය මිලියන තුන්සිය අනූහයකින් අඩු වී තිබෙන බවත්, පොදුවේ සැලකීමේදී සමස්ත ජනගහනයෙන් 9%ක් දුම්වැටි භාවිත කරන බවද පවසා සිටියේය.

සමස්ත ජනගහනයෙන් දුම්පානය කරන ප්‍රමාණය 5%ක මට්ටමේ පැවතීම ඉතාමත් හොඳ තත්ත්වයක් ලෙස සලකන බවත්, මේ අනුව මෙරට තුළ දුම්පානය කරන ප්‍රමාණය 5%ක් දක්වා අඩු කර ගැනීම තම සංවිධානයේ ඉලක්කය බවද සඳහන් කළේය.

පොදුවේ සැලකීමේදී දුම්පානය කරන ප්‍රමාණය ක්‍රම ක්‍රමයෙන් අඩු වී යන බවත්, මේ නිසා කාන්තාවන් අතර දුම්පානය ප්‍රචලිත කිරීම සඳහා විවිධ උපක්‍රමයන් සිදුවන බවද පැවසීය.

එහෙත් දුම්පානය කරන සමස්ත ජනගහනය සැලකූ විට දුම්පානය කරන කාන්තාවන්ගේ ප්‍රමාණය සියයට එකට අඩු බවද සඳහන් කළේය.

නැගෙනහිර අප්‍රිකානු රටවල් සැලකීමේදී සමස්ත ජනගහනයෙන් දුම්පානය කරනු ලබන්නේ 4%ත් 5%ත් අතර ප්‍රමාණයක් බවත්, ජනතාවගේ සහයෝගය ලැබෙනවා නම් අප රටටත් කෙටි කලක් තුළදී මෙම තත්ත්වය පත්කර ගත හැකි බවද පැවසීය.