අතුරුගිරියේ නගරයේ දි දෙනෝදහසක් දෙනා බලා සිටියදී කාන්තාවකගේ ගෙල බැඳී රුපියල් ලක්ෂ 5 ක් පමණ වටිනා රන්මාලය සහ පෙන්ඩනය කාන්තාවන් දෙදෙනකු විසින් කොල්ලකා ඇතැයි අතුරුගිරිය පොලිසිය කියයි.
එලෙස කොල්ල කන ලද රන් මාලයේ සහ පෙන්ඩනයේ බර පවුම් 3 -1/2 ක් පමණ යැයි පොලිසිය සඳහන් කරයි.
අතුරුගිරිය ප්‍රදේශයේ පදිංචි කාන්තාවක් අවශ්‍යතාවයක් සඳහා නගරයට පැමිණ රූපලාවණ්‍යාගාරයකට ගොස් රූපලාවන්‍ය කටයුත්තක් සිදුකර ගැනීමෙන් අනතුරුව එයින් පිටතට පැමින සතිපොළ වෙත යාමේදී වයස අවුරුදු 70 ක් පමණ සිතිය හැකි ගවුමක් හැඳ සිටි කාන්තාවක් ඇය වෙත පැමිණ ඇතැයි පොලිසිය කියයි.
ඇය වෙත ළං වූ ආගන්තුක කාන්තාව ඇයගේ ස්වාමිපුරුෂයා මත්පැන් පානය කරන බවත් නිවසේ සියලුම දේපල විනාශ කරන බවත් ,ස්වාමිපුරුෂයාගේ හඳහන බලා ගැනීම සඳහා ස්ථානයක් දන්නවාදැයි කාන්තාවගෙන් විමසා තිබූ බව පොලිසිය කියයි.
තමන් එවැනි ස්ථානයක් නිශ්චිතව නොදන්නා බවත් අතුරුගිරිය අධිවේගී පිවිසුම ආසන්නයේ එවැනි ස්ථානයක් තිබෙන බවත් එම කාන්තාවට පවසා තිබූ පැමිණිලිකාර කාන්තාව සුපිරි වෙළඳ සැලකට යාම සඳහා මාර්ගය හරහා මාරුවීමේදී එම කාන්තාව ද ඇය සමගම එකිනෙකා ගැටෙන ආකාරයෙන් ගමන් කර ඇති අතර එම අවස්ථාවේදී පැමිණිලිකාර කාන්තාවටද සැකයක්ද හටගෙන තිබූ බව පොලිසිය කියයි
අනතුරුව ඇය සුපිරි වෙළඳ සැලට යාමේ අදහස අත්හැර නිවසට යාම සඳහා බස් නැවතුම වෙත යාමේදී " අනේ චුට්ටක් ඉන්නකෝ ඔයා හොඳ කෙනෙක් වගේ මට පොඩ්ඩක් උදව් කරන්නකෝ" යැයි කියනවා සමගම පැමිණිලි කාන්තාව පසුපස බැලීමත් සමගම එකවරම පෙර කාන්තාව ඇයගේ ගෙල බැඳි රන් මාලය කොල්ලකා ඇති අතර ඇය ආසන්නයේ රැඳී සිටි ඩෙනිම් කලිසමක් හැඳ සිටි දේහධාරි කාන්තාවක් සමග තීරෝද රථයක නැග ගොඩගම දෙසට පලා ගොස් ඇතැයි පොලිසිය සඳහන් කරයි
පැමිණිලි කාර කාන්තාව සිය රන්මාලය කොල්ලකා පලා යන බවට පවසමින් මාර්ගයේ ගමන් ගත් වාහන වලින් උදව් ඉල්ලුවද කිසිවෙකුවත් ඉදිරිපත් නොවූ බව ඇය පොලිසිය සමග පවසා ඇත
අතුරුගිරිය පොලිසියේ ස්ථානාධිපති ප්‍රධාන පොලිස් පරීක්ෂක ශාරද ප්‍රනාන්දු මහතාගේ උපදෙස් මත විමර්ශන සිදු කෙරේ
