ශ්‍රී ලංකා මහවැලි අධිකාරියට අයත් ඉඩම්වල කළුගල් කඩන ව්‍යාපාරිකයන් 85 දෙනෙකුගෙන් ඉඩම් පරිහරණ ගාස්තු වශයෙන් 2024 වර්ෂයට අයවිය යුතු රුපියල් විසිනවකෝටි අසූතුන්ලක්ෂ හැට දෙදහස් අටසීය විසිනවයක මුදලක් (රු.298,362,829.00) අයකරගෙන නොතිබූ බව ජාතික විගණන කාර්යාලය මගින් මාර්තු මස 1 වැනි දින නිකුත් කරන ලද  විගණන වාර්තාවක සඳහන් වේ.

  කැණීම්කරුවන් 27 දෙනෙකුගෙන් අයකරගත යුතු රුපියල් හයකෝටි අනූහතර ලක්ෂ විසිතුන්දහස් තුන්සීයක මුදලින් (රු. 69,423,300.00) කිසිදු මුදලක් අයකර ගෙන නොමැත.

ගෝඨාභය රාජපක්ෂ ජනාධිපති රජය සමයේ එනම්, 2020 වර්ෂයේ දී අමාත්‍ය මණ්ඩල තීරණයක් මගින් කළුගල් ව්‍යාපාරිකයන්ගෙන් අය විය යුතු හිඟ ඉඩම් පරිහරණය ගාස්තු වශයෙන් 75% ක් කපා හැරීමටත් ඉතිරිය වාරික 36 කින් ගෙවීමටත් අවසර ලබා දී තිබේ. ලබා දුන් සහන කාල සීමාව 2024 වර්ෂයේ දෙසැම්බර් 31න් අවසන්ව තිබූ අතර, එම සහනය අවභාවිත කරමින් කැණීම්කරුවන් 38 දෙනෙකු ගෙවීමට ඇති මුදලින් ඉතා සුළු මුදලක් පමණක් ගෙවා නැවත කැණීම් ආරම්භකොට තිබේ.

මෙම කැණීම්කරුවන්ගෙන් අය කරගත යුතු මුදල රුපියල් විසිදෙකෝටි අනුනව ලක්ෂ තිස්නව දහස් පන්සියවිසිනවයකි. (රු.228,939,529.00) ශ්‍රී ලංකා මහවැලි අධිකාරියට අයත් සීඑච්එල් හා වලව කලාප වලට පිහිටි ඉඩම්වල කළුගල් කැණීම් කටයුතු 2024 වර්ෂයේ සිදුකොට තිබේ.