දෛනිකව බවුසර්වලට ඉන්ධන නිකුත් කිරීම සාමාන්‍ය පරිදි සිදුවන නිසා රට තුළ කිසිදු අවස්ථාවක ඉන්ධන හිඟයක් ඇතිවීමේ අවදානමක් නොමැති බව ඛනිජ තෙල් නීතිගත සංස්ථාව සඳහන් කරයි.
අද (02දා) දිනයේදීද සාමාන්‍ය පරිදි ඉන්ධන නිකුත් කිරිම සිදුවූ බවත් දෛනිකව බවුසර 600-700 අතර ප්‍රමාණයක් ඉන්ධන රැගෙන යන බවත් එහි සභාපති ඩී.ජේ රාජකරුණා මහතා අද පුවත් පත කළ විමසීමකදී සඳහන් කළේය.
බෙදුම්කරුවන් සඳහා මෙතෙක් ලබාදුන් 3%ක කොමිස් මුදල සම්බන්ධ ගැටලුවක් මූලික කරගෙන තෙල් හිඟයක් ඇතිවන බවට ඇතැම් පිරිස් ප්‍රකාශ සිදු කළත් ඛනිජ තෙල් ඉන්ධන බෙදා හැරීමේ කටයුතු අඛණ්ඩව සිදුවන බවද හෙතෙම පැවසීය.
පවතින ගැටලුව පිළිබඳව හෙට (04දා) බෙදුම්කරුවන් සමග සාකච්ඡාවක් පවත්වන බවද ඔහු සඳහන් කළේය.
ලංකා පෞද්ගලික ටැංකි හිමිකරුවන්ගේ සංගමයේ ලේකම් ශාන්ත ද සිල්වා සඳහන් කළේ පසුගිය දිනවල ඇනවුම් කළ ඉන්ධන මේ වන විට බෙදා හරිමින් තිබෙන බවය.
පවතින ගැටලුව පිළිබඳව සාකච්ඡා කිරීමට හෙට දිනයේදී ඛනිජ තෙල් සංස්ථාවේ බලධාරීන් අවස්ථාවක් ලබා දී තිබෙන බවද පවසා සිටියේය.
